ପ୍ରେମ ସମ୍ପର୍କକୁ ନେଇ ଛୁରା ମାଡ: ପୁରୀରୁ ଆସିଥିବା ନୃତ୍ୟ କଳାକାର ଯୁବତୀକୁ ଛୁରୀ ଭୁସିଲା ପ୍ରେମିକ

ଉମରକୋଟ: ପ୍ରେମ ସମ୍ପର୍କକୁ ନେଇ ଆଜି ଉମରକୋଟ ସହରରେ ପୁରୀରୁ ଆସିଥିବା ଜଣେ ଯୁବତୀ ନୃତ୍ୟ କଳାକାରଙ୍କୁ ଛୁରୀରେ ଆକ୍ରମଣ କରିଛି ବିଫଳ ପ୍ରେମିକ। ମିଳିଥିବା ସୂଚନା ଅନୁସାରେ ୫ ଜଣ ନୃତ୍ୟ କଳାକାର ଯୁବତୀମାନେ ପୁରୀରୁ ଆସି ଉମରକୋଟରେ ଏକ ଭଡ଼ା ଘରେ ରହି ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମରେ ନୃତ୍ୟ ପରିବେଷଣ କରି ଅର୍ଥ ରୋଜଗାର କରୁଥିଲେ। ସୋମବାର ଦିନ ରାତି ପ୍ରାୟ ୮ ଟା ସମୟରେ ଉମରକୋଟ ସ୍ଥିତ ଭଡା ଘରେ ଥିବା ସମୟରେ ଘରର ପାଚେରୀ ଡେଇଁ ବିହାର ରାଜ୍ୟର ରୋହିତ ଘରକୁ ପଶି ଆସିଥିଲେ ଏବଂ ଲିପ୍ସା ନାୟକଙ୍କୁ ଛୁରୀରେ ଅତର୍କିତ ଆକ୍ରମଣ କରି ଫେରାର ହେଇ ଯାଇଥିଲେ।

ଲିପ୍ସାଙ୍କ ଚିତ୍କାର ଶୁଣି ଘର ଭିତରେ ଥିବା ଅନ୍ୟ ସହକର୍ମୀ ମାନେ ଆସି ତାଙ୍କୁ ତୁରନ୍ତ ଉମରକୋଟ ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ।ଛୁରୀ ମାଡ଼ରେ ଯୁବତୀଙ୍କ ଜଙ୍ଘ, ଛାତି, ବାମ ହାତରେ ଗଭୀର ଆଘାତ ଲାଗିଛି । ଘଟଣାସ୍ଥଳରେ ଉମରକୋଟ ଥାନା ଅଧିକାରୀ ଡମ୍ବୁରୁଧର ପ୍ରଧାନ, ଅକ୍ଷୟ ମିଶ୍ର ପହଞ୍ଚି ଘଟଣାର ତଦନ୍ତ କରୁଛନ୍ତି। ଛୁରୀ ମାଡ଼ କରି ଯୁବକ ଜଣକ ଫେରାର ହୋଇଯାଇଛନ୍ତି ।ଯୁବତୀ ଓ ଯୁବକଙ୍କ ମଧ୍ୟରେ ଦୀର୍ଘ ଦିନ ହେଲା ପ୍ରେମ ସମ୍ପର୍କ ରହିଥିଲା | କିଛିଦିନ ପୂର୍ବରୁ ପ୍ରେମରେ ପୂର୍ଣ୍ଣଛେଦ ପଡିବାରୁ ଯୁବକ ଏଥିରେ ରାଗି ଯାଇ ଏଭଳି କାଣ୍ଡ କରିଛନ୍ତି ବୋଲି ଲିପ୍ସା ସୂଚନା ଦେଇଛନ୍ତି। ବର୍ତ୍ତମାନ ଝିଅ ପକ୍ଷରୁ ଅନ୍ୟ ସହପାଠୀମାନେ ଥାନାକୁ ଯାଇ ଲିଖିତ ଅଭିଯୋଗ କରିଛନ୍ତି।