ପୂର୍ବ ଶତ୍ରୁତାକୁ ନେଇ ଔଷଧ ଦୋକାନୀଙ୍କୁ ଭୁଜାଲିରେ ହାଣିଲେ ଦୁର୍ବୃତ୍ତ

ବେତନଟା ସଦର: ମୟୁରଭଞ୍ଜ ଜିଲ୍ଲା ବୈଶିଙ୍ଗା ଥାନା ଅଧୀନ ୧୮ନଂ ଜାତୀୟ ରାଜପଥ ପାର୍ଶ୍ୱ କଳମା ଛକ ନିକଟରେ ଜନୈକ ଔଷଧ ଦୋକାନୀକୁ ମୁହଁରେ କପଡା ବାନ୍ଧି ମିଳିତ ଭାବେ ଭୁଜାଲିରେ ଅତର୍କିତ ଆକ୍ରମଣ କଲେ ଦୁର୍ବୁତ୍ତ | ପୂର୍ବ ଶତ୍ରୁତାକୁ ନେଇ ଆକ୍ରମଣ କରାଯାଇଥିବା ସୂଚନା | ସୂଚନା ଅନୁଯାୟୀ କଳମା ଗ୍ରାମର ମନୋରଞ୍ଜନ ଜେନାଙ୍କ ପୁଅ ସରୋଜର କଳମା ଛକ ଉପକଣ୍ଠ ଜାତୀୟ ରାଜପଥ ପାର୍ଶ୍ୱର ଢ଼ାବା ନିକଟରେ ଏକ ଔଷଧ ଦୋକାନ ଅଛି | ସୋମବାର ସନ୍ଧ୍ୟାରେ ସରୋଜ ନିଜ ଦୋକାନରେ ବସିଥିବା ବେଳେ ୪ଜଣ ଦୁର୍ବୁତ୍ତ ମୁହଁରେ କପଡା ବାନ୍ଧି ହଠାତ ଦୋକାନ ଭିତରକୁ ପଶି ଆସି ଅତର୍କିତ ଭାବେ ଗୋଟେ ଭୁଜାଲିରେ ତାଙ୍କୁ ଆକ୍ରମଣ କରି ଘଟଣାସ୍ଥଳରୁ ଚମ୍ପଟ ମାରିଥିଲେ |

ସରୋଜର ପଞ୍ଜରା ନିକଟରେ ଭୁଜାଲିର ଶକ୍ତ ପ୍ରହାର ବାଜିଥିବାବେଳେ ସେ ରକ୍ତ ଜୁଡୁବୁଡୁ ଅବସ୍ଥାରେ ଦୋକାନରେ ପଡି ଚିତ୍କାର କରିବାରୁ ସ୍ଥାନୀୟ ଲୋକ ଦୌଡ଼ି ଆସି ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ପ୍ରାଥମିକ ଚିକିତ୍ସା ଦେଇ ବାରିପଦା ମୁଖ୍ୟ ଡାକ୍ତରଖାନାକୁ ପଠାଇ ଦେଇଥିଲେ | ବିଶେଷ ସୂତ୍ରରୁ ମିଳିଥିବା ସୂଚନା ଅନୁଯାଇ ଏହା ସରୋଜ ସହିତ ପାଖ ଅଞ୍ଚଳର କିଛି ଯୁବକଙ୍କ ସହିତ ପୂର୍ବ ଶତ୍ରୁତା କାରଣରୁ ଘଟିଛି ବୋଲି ଖବର ମିଳିଛି | ଖବର ପାଇ ବୈଶିଙ୍ଗା ଥାନାର ଏଏସଆଇ ଭାବଗ୍ରାହୀ ମହାନ୍ତ ଘଟଣା ସ୍ଥଳରେ ପହଁଛି ତଦନ୍ତ ଆରମ୍ଭ କରିଛନ୍ତି |