ପେଟ୍ରୋଲ୍ ଢାଳି ନିଆଁ ଲଗାଇ ସ୍ବାମୀ-ସ୍ତ୍ରୀଙ୍କୁ ହତ୍ୟା ଉଦ୍ୟମ

ହରିଚନ୍ଦନପୁର: କେନ୍ଦୁଝର ଜିଲ୍ଲା ହରିଚନ୍ଦନପୁର୍ ଥାନା ଧଗୋଠ ଗ୍ରାମରେ ଅଘଟଣ | ସ୍ୱାମୀ-ସ୍ତ୍ରୀ ଶୋଇଥିବା ସମୟରେ ବାହାର ପଟୁ ତାଲା ପକାଇ ପେଟ୍ରୋଲ୍ ଢାଳି ନିଆଁ ଲଗାଇଲେ ଦୃବୁର୍ତ୍ତ | ଆଉ ନିଆଁରେ ପୋଡି ହୋଇ ଉଭୟ ସ୍ବାମୀ ସ୍ତ୍ରୀ ଗୁରୁତର ହୋଇପଡିଛନ୍ତି । ଉଭୟଙ୍କୁ ଚିକିତ୍ସା ପାଇଁ କଟକ ବଡ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିବାବେଳେ ଗୁରୁତର ସ୍ୱାମୀ-ସ୍ତ୍ରୀ ହେଉଛନ୍ତି ଧଗୋଠ ଗ୍ରାମର ଉଗ୍ରସେନ ପଲେଇ ଓ ଜୟନ୍ତି ପଲେଇ | ଗତକାଲି ରାତିରେ ଉଭୟ ସ୍ବାମୀ ସ୍ତ୍ରୀ ଖାଇସାରିବା ପରେ ତାଙ୍କ ଘରେ ଶୋଇଥିଲେ | ବିଳମ୍ବିତ ରାତିରେ ଦୃବୁର୍ତ୍ତମାନେ ଆସି ପ୍ରଥମେ ତାଙ୍କ ଘର ସମେତ ଆଖପାଖ ପଡୋଶୀ ଘରଗୁଡିକର ବାହାର ପଟୁ ତାଲା ପକାଇ ଥିଲେ | ପରେ ତାଙ୍କ ଘରେ ପେଟ୍ରୋଲ୍ ପକାଇ ନିଆଁ ଲଗାଇଥିଲେ |

ତାଙ୍କ ଚିତ୍କାର ଶୁଣି ଅନ୍ୟମାନେ ଆସିପାରିନଥିଲେ ।କାରଣ ଆଖପାଖ ପଡୋଶୀ ଘରଗୁଡିକରେ ମଧ୍ୟ ବାହାରପଟୁ ତାଲା ପଡିଥିଲା । କିଛି ସମୟ ପରେ ପଡୋଶୀ ଆସି ପଡିଥିବା ତାଲାକୁ ଭାଙ୍ଗି ଖୋଲିଥିଲେ | ସେତେବେଳେ ଉଭୟ ସ୍ବାମୀ ସ୍ତ୍ରୀ ନିଆଁରେ ପୋଡି ହୋଇ ଗୁରୁତର ହୋଇଯାଇଥିଲେ | ଉଭୟଙ୍କୁ ପ୍ରଥମେ ହରିଚନ୍ଦନପୁର୍ ଗୋଷ୍ଠି ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା | ତେବେ ଅବସ୍ଥା ଗୁରୁତର ହେବାରୁ ଉଭୟଙ୍କୁ କଟକ ବଡ଼ ମେଡିକାଲକୁ ସ୍ଥାନାନ୍ତର କରିଥିବା ସୂଚନା ମିଳିଛି | ଆଜି ସକାଳେ ପୁଲିସ୍ ଘଟଣାସ୍ଥଳରେ ପହଂଚି ତଦନ୍ତ ଚଳାଇଛି |