ଜଳେଶ୍ବର ରେଞ୍ଜରେ ଶିମିଳିପାଳ ହାତୀପଲ, ଲୋକେ ଆତଙ୍କିତ
ଓଲମରା : ଶିମିଳିପାଳର ଏକ ହାତୀପଲ ଗତକାଲି ଜଳେଶ୍ବର ରେଞ୍ଜର ଟିକପଦା ଦେଇ ଲୁହାପଡ଼ାରେ ପସିଥିବା ଜଣାପଡ଼ିଛି । ଗତ ସପ୍ତାହରେ ଶିମିଳିପାଳ ହାତୀ ଜଳେଶ୍ବର ରେଞ୍ଜର ଆମତୁମ୍ବା, ଦୁଧିଅଷୋଳ, କ୍ଷୀରକୋଳିସାହି, ଲୁହାପଡ଼ା ଅଞ୍ଚଳରେ ବ୍ୟାପକ ଧାନଫସଲ ନଷ୍ଟ କରି ରାସଗୋବିନ୍ଦପୁର ରେଞ୍ଜର ହରିଣାଷୋଳ ଓ ବାଁସୁଳି ଜଙ୍ଗଲକୁ ପଳାଇଯାଇଥିବା ବେଳେ ଗତକାଲି ରାତିରେ ପୁଣି ଏହି ଅଞ୍ଚଳକୁ ସେମାନଙ୍କ ପ୍ରବେଶ ସ୍ଥାନୀୟ ଚାଷୀ ଓ ଜନସାଧାରଣଙ୍କୁ ଚିନ୍ତାରେ ପକାଇଦେଇଛି।
Sambad is now on WhatsApp
Join and get latest news updates delivered to you via WhatsApp
ବର୍ତ୍ତମାନ ଧାନ ଅମଳ ଚାଲିଥିବାରୁ ବିଲରେ ଧାନ କଟାଯାଇ ପଡ଼ିଛି। ହାତୀମାନଙ୍କ ଏହି ଉପଦ୍ରବରୁ ଧାନ ଘରକୁ କିପରି ଆସିବ ତାହା ସବୁଠୁ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି । ସେପଟେ ବନବିଭାଗ ଅଳ୍ପ କିଛି ବାଣ ଓ ମଶାଲ ଧରି ହାତୀ ଘଉଡ଼ାଇବା ପାଇଁ ଜଗିଥିବା ଦେଖିବାକୁ ମିଳିଛି । ହାତୀ ଟ୍ରେଞ୍ଚ୍ ମଧ୍ୟ ଅଳ୍ପ ଖୋଳାଯାଇଛି । ଯଦି ଆଉ ଗୋଟିଏ ଟ୍ରେଞ୍ଚ୍ ଲୁହାପଡ଼ାରୁ କେନ୍ଦୁଖୁଣ୍ଟା ଆଡ଼କୁ ଖୋଳା ହୋଇପାରନ୍ତା ତା’ହେଲେ ହାତୀଙ୍କ ଆତଯାତ ଉପରେ ରୋକ୍ ଲଗାଯାଇପାରନ୍ତା ବୋଲି ସ୍ଥାନୀୟ ଲୋକ କହୁଛନ୍ତି । ଯଥାଶୀଘ୍ର ଟ୍ରେଞ୍ଚ୍ ଖୋଳିବା ନେଇ ସ୍ଥାନୀୟ ବାସିନ୍ଦା ବାରମ୍ବାର ଦାବି କରିଆସୁଛନ୍ତି ।