ବସ୍ତା: କଥାରେ ଅଛି ସ୍ୱାସ୍ଥ୍ୟ ହିଁ ସମ୍ପଦ,ସ୍ୱାସ୍ଥ୍ୟ ଭଲ ଥିଲେ ସବୁ ରହିବ ଭଲ । ତେଣୁ ସୁସ୍ଥ ଏବଂ ଫିଟ୍ ରହିବା ପାଇଁ ବ୍ୟାୟାମ କରିବା ନିତ୍ୟାନ୍ତ ଆବଶ୍ୟକ । ଯୁବପିଢି ନିଜର ସ୍ୱାସ୍ଥ୍ୟକୁ ସୁନ୍ଦର ଭାବେ ଗଢି ତୋଳିବା ପାଇଁ ବ୍ୟାୟାମଶାଳାରେ ଘଣ୍ଟା ଘଣ୍ଟା ସମୟ ଅତିବାହିତ କରୁଛନ୍ତି ଆଉ ଏଥିରୁ ବାଦ ପଡି ନାହାନ୍ତି ବସ୍ତା ବିଧାୟକ ନିତ୍ୟାନନ୍ଦ ସାହୁ । ୭୫ ବର୍ଷ ବୟସରେ ବି ନିଜକୁ ଫିଟ୍ ରଖିବା ପାଇଁ ସେ ବ୍ୟାୟାମ କରୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ବାଲେଶ୍ୱର ଜିଲ୍ଲା ବସ୍ତା ବ୍ଲକ ମୁକୁଳିସି ପଞ୍ଚାୟତରେ ପ୍ରତିଷ୍ଠା ହୋଇଥିବା ବ୍ୟାୟାମଶାଳାରେ ଦେଖିବାକୁ ମିଳିଥିଲା ବସ୍ତା ବିଧାୟକ ନିତ୍ୟାନନ୍ଦ ସାହୁଙ୍କୁ । ୭୫ ବର୍ଷ ବୟସରେ ମଧ୍ୟ ନିଜକୁ ଫିଟ ରଖିବା ପାଇଁ ପ୍ରତିଦିନ ସକାଳ ଏବଂ ସନ୍ଧ୍ୟାରେ ବ୍ୟାୟାମଶାଳାରେ ଝାଳ ବୁହାଉଛନ୍ତି ବିଧାୟକ । ନିଜର ପାରମ୍ପରିକ ପୋଷାକ ଧୋତି ଓ ପଞ୍ଜାବୀ ପିନ୍ଧି ପ୍ୟାଡେଲ୍ସ,ବଟରଫ୍ଲାୟ ,ଡମ୍ବଲ୍ସ ମାରିବା ସହିତ ମେସିନ ସାହାଯ୍ୟରେ ବିଭିନ୍ନ ପ୍ରକାର ବ୍ୟାୟାମ କରୁଛନ୍ତି ନିତ୍ୟାନନ୍ଦ । ଆଉ ଏହା କରିବା ଦ୍ୱାରା ଶରୀର ସୁସ୍ଥ ରହିବା ସହିତ ରୋଗ ପ୍ରତିଷେଧକ ଭଳି କାମ କରିବ ବୋଲି ଫିଟନେସ୍ ମନ୍ତ୍ର ଦେଉଛନ୍ତି ବିଧାୟକ ।
ମୁକୁଳିସି ପଞ୍ଚାୟତ ପରିସରରେ ଓଡିଶା ସରକାରଙ୍କ ଆମ ଗାଁ ଆମ ବିକାଶ ଯୋଜନା ମାଧ୍ୟମରେ ୨ ଲକ୍ଷ ଟଙ୍କା ବ୍ୟୟରେ ନିର୍ମାଣ କରାଯାଇଛି ଏକ ବ୍ୟାୟାମଶାଳା ଆଉ ଏଠାରେ ବ୍ୟାୟାମ କରିବା ପାଇଁ ପ୍ରତିଦିନ ସକାଳ ଏବଂ ସନ୍ଧ୍ୟାରେ ଲାଗୁଛି ଲୋକଙ୍କ ଭିଡ । ଯୁବକଙ୍କଠାରୁ ଆରମ୍ଭ କରି ବୟସ୍କ ଲୋକ ପର୍ଯ୍ୟନ୍ତ ସମସ୍ତେ ଏଠାକୁ ଆସି ମେସିନ ସାହାଯ୍ୟରେ ବିଭିନ୍ନ ପ୍ରକାର ଏକ୍ସରସାଇଜ୍ କରୁଛନ୍ତି । ତେବେ ଏହା ଦେୟମୁକ୍ତ ହୋଇଥିବାରୁ ଲୋକଙ୍କୁ ଆଉ କୌଣସି ଘରୋଇ ଜିମକୁ ଯାଇ ଅଧିକ ଖର୍ଚ୍ଚାନ୍ତ ହେବାକୁ ପଡୁ ନାହିଁ ।
ତେବେ ଯଦି ପ୍ରତି ପଞ୍ଚାୟତରେ ଏଭଳି ଦେୟ ମୁକ୍ତ ବ୍ୟାୟାମଶାଳା ନିର୍ମାଣ କରାଯାଇପାରନ୍ତା ତାହା ହେଲେ ଗ୍ରାମାଞ୍ଚଳର ଲୋକେ ଏହାଦ୍ୱାରା ବେଶ୍ ଉପକୃତ ହୋଇ ପାରନ୍ତେ ବୋଲି ବୃଦ୍ଧିଜୀଜୀମାନେ ମତ ଦେଇଛନ୍ତି ।