ଅନ୍ତୋଦୟ ଅନ୍ନ ଯୋଜନା ହିତାଧିକାରୀଙ୍କ କରିସ୍ମା: ଉଭୟ କଳାହାଣ୍ଡି ଓ ବଲାଙ୍ଗୀର ଜିଲ୍ଲାରେ ପାଉଛନ୍ତି ଚାଉଳ
ଭବାନୀପାଟଣା: ଉଭୟ ରାଜ୍ୟ ଓ କେନ୍ଦ୍ର ସରକାର ଖାଦ୍ୟ ନିରାପତ୍ତା ଆଇନ ଅନୁଯାୟୀ ସମସ୍ତ ଗରିବ ଲୋକଙ୍କୁ ବିଭିନ୍ନ ଯୋଜନା ମାଧ୍ୟମରେ ଚାଉଳ ଯୋଗାଇବା ପାଇଁ ବ୍ୟବସ୍ଥା କରାଯାଇଛି । ସରକାରୀ ଯୋଜନାକୁ କାର୍ଯ୍ୟକାରୀ କଲାବେଳେ ଏହାର ପ୍ରଣୟନ ନେଇ ବିଭାଗୀୟ ଅଧିକାରୀମାନେ ଅଣଦେଖା କରୁଥିବା ଯୋଗୁଁ ସଠିକ ଲୋକ ଯୋଜନାର ସୁଫଳ ନପାଇ ଏହାର ବାଟବଣା ହେଉଥିବା ଦେଖିବାକୁ ମିଳିଛି । କଳାହାଣ୍ଡି ଜିଲ୍ଲାରେ ଅନ୍ତୋଦୟ ଅନ୍ନ ଯୋଜନାରେ ହିତାଧିକାରୀ ଉଭୟ ବଲାଙ୍ଗୀର ଓ କଳାହାଣ୍ଡି ଜିଲ୍ଲାରେ ଅନ୍ତୋଦୟ ଚାଉଳ ହାତଉଥିବା ଘଟଣା ସାଧାରଣରେ ଆଲୋଡନ ସୃଷ୍ଟି ହୋଇଛି ।
Sambad is now on WhatsApp
Join and get latest news updates delivered to you via WhatsApp
ପ୍ରାପ୍ତ ସୂଚନାରୁ ପ୍ରକାଶ ଯେ, କଳାହାଣ୍ଡି ଜିଲ୍ଲାର ଭବାନୀପାଟଣା ସଦରବ୍ଲକର ସିକୁଆଁ ପଞ୍ଚାୟତର ସାଲେଗାଁର ଅର୍ଜୁନ ସାହୁ ଅନ୍ତୋଦୟ କାର୍ଡରେ ଦୀର୍ଘବର୍ଷ ଧରି ଚାଉଳ ପାଇ ଆସୁଥିଲେ । ସେହି ଅର୍ଜୁନ ସାହୁ ବଲାଙ୍ଗୀର ଜିଲ୍ଲାର ଟିଟିଲାଗଡ ବ୍ଲକ ଦିଗସିରା ପଞ୍ଚାୟତର ଗୌଡତୋଲା ଗ୍ରାମରେ ଅନ୍ତୋଦୟ କାର୍ଡରେ ଚାଉଳ ପାଇ ଆସୁଛନ୍ତି । ଗୌଡତୋଲା ଗ୍ରାମରେ ଅର୍ଜୁନ ସାହୁଙ୍କ ପତ୍ନୀ ଯଶବତୀ ସାହୁ ସିରିଏଲ ନଂ-୬୪୨, ଅନ୍ତୋଦୟ କାର୍ଡନଂ ୦୫୧୩୦୭୧୦୭୩୮ ରେ ପରିବାରରେ ୪ ଜଣ ସଦସ୍ୟ ଥିବା ବେଳେ ମାସିକ ୩୫ କେଜି ଚାହଉଳ ଉଠାଣ କରିଥାନ୍ତି । ବର୍ତ୍ତମାନ ପର୍ଯ୍ୟନ୍ତ ସେ ଏହି ଚାଉଳ ଦିଗସିରା ପଞ୍ଚାୟତରୁ ପାଇ ଆସୁଛନ୍ତି ।
ସେହିଭଳି ଭବାନୀପାଟଣା ସଦରବ୍ଲକର ସିକୁଆଁ ପଞ୍ଚାୟତର ଅର୍ଜୁନ ସାହୁ ଅନ୍ତୋଦୟ ଯୋଜନାରେ ଦୀର୍ଘବର୍ଷ ଧରି ଚାଉଳ ପାଇ ଆସୁଥିଲେ । ଅଧାରଲିଙ୍କ ହେବା ପରେ ଦୁଇଟି ଜିଲ୍ଲାରେ ଅନ୍ତୋଦୟ କାର୍ଡ ଥିବା ଘଟଣା ଗତ ଫେବୃୟାରୀ ମାସରେ ପ୍ରଘଟ ହୋଇଥିଲା । ତାଙ୍କ ସମ୍ପର୍କିୟ ସମିତିସଭ୍ୟ ଓ ୱାର୍ଡସଭ୍ୟା ଥିବା ଯୋଗୁଁ ପଞ୍ଚାୟତରେ ଏକ ବୈଠକ କରି ରିଜୋଲେସନ ମାଧ୍ୟମରେ ଅର୍ଜୁନ ସାହୁଙ୍କ ଅନ୍ତୋଦୟ କାର୍ଡରେ ତାଙ୍କ ଭାଇ ଲିଙ୍ଗରାଜ ସାହୁଙ୍କ ନାମରେ ଦରଜ କରାଇବାରେ ଚଞ୍ଚକତା କରିଥିଲେ । ଲିଙ୍ଗରାଜ ସାହୁଙ୍କ ପତ୍ନୀ କ୍ଷୀରଦେଇ ସାହୁ , ସିରିଏଲ ନଂ-୧୪୯, ଅନ୍ତୋଦୟ କାର୍ଡ ନଂ -୧୫୦୧୧୦୧୦୬୮୮ରେ ୨ ଜଣ ପରିବାର ସଦସ୍ୟ ଥିବା ବେଳେ ପ୍ରତିମାସରେ ୩୫ କେଜି ଚାଉଳ ପାଇ ଆସୁଛନ୍ତି । ଅର୍ଜୁନ ସାହୁଙ୍କ ଡମି ଭାବରେ ସେହି ପୁରୁଣା ଅନ୍ତୋଦୟକାର୍ଡରେ ଚାଉଳ ନେଉଛନ୍ତି ।
କଳାହାଣ୍ଡି ଜିଲ୍ଲାରେ ବହୁ ଦୁସ୍ଥ, ଗରିବ ଓ ଅସହାୟ ଲୋକଙ୍କୁ ଅନ୍ତୋଦୟ କାର୍ଡ ମିଳି ପାରୁନଥିବା ବେଳେ ଜଣେ ହିତାଧିକାରୀ ୨ଟି ଜିଲ୍ଲାରେ ଅନ୍ତୋଦୟକାର୍ଡରେ ଚାଉଳ ପାଇବା ଘଟଣା ଯୋଗାଣ ବିଭାଗ ଓ ପଞ୍ଚାୟତର କାର୍ଯ୍ୟକାରୀତା ନେଇ ପ୍ରଶ୍ନବାଚୀ ସୃଷ୍ଟି କରିଛି । ଗରିବ ଲୋକେ ଅନ୍ତୋଦୟ କାର୍ଡ ଖଣ୍ଡେ ପାଇବା ପାଇଁ ୱାର୍ଡସଭ୍ୟ ଠାରୁ ଆରମ୍ଭ କରି ସରପଞ୍ଚ ଓ ଯୋଗାଣ ସହାୟକ ପର୍ଯ୍ୟନ୍ତ ଯେତେ ନେହୁରା ହେଲେ ମଧ୍ୟ ମିଳି ପାରେ ନାହିଁ । କିନ୍ତୁ ବର୍ଷବର୍ଷ ଧରି ପଞ୍ଚାୟତ ପ୍ରତିନିଧି ଓ ପଞ୍ଚାୟତ ଅଧିକାରୀ ମାନଙ୍କ ଜାଣତରେ ବର୍ଷବର୍ଷ ଧରି ଜଣେ ହିତାଧିକାରୀ ଅନ୍ତୋଦୟ ଚାଉଳ କିଭଳି ଉଠାଣ କରୁଛି ତାହା ଏବେ ତଦନ୍ତ ସାପେକ୍ଷ ଅଟେ । ଏହା ଏକ ଉଦାହରଣ ହୋଇଥିବା ବେଳେ ଏଭଳି ବହୁ ଡମି ହିତାଧିକାରୀ ବେଧଡକ ଭାବରେ ଚାଉଳ ଉଠାଣ କରିଚାଲିଛନ୍ତି ।
ପଞ୍ଚାୟତ ପ୍ରତିନିଧି ଓ ଅଧିକାରୀମାନେ ବେନାମି କାର୍ଡ ରଖି ଚଞ୍ଚକତା କରି ଚାଉଳ ଉଠାଣ କରି ଚାଲିଥିବା ବେଳେ ଏ ନେଇ କୌଣସି କାର୍ଯ୍ୟାନୁଷ୍ଠାନ ନହେବା ସାଧାରଣରେ କ୍ଷୋଭପ୍ରକାଶ ପାଇଛି । କଳାହାଣ୍ଡି ଜିଲ୍ଲାର ସୀମାନ୍ତ ବ୍ଲକ ମାନଙ୍କରେ ଏଭଳି ଜାଲ ହିତାଧିକାରୀ ବିଭାଗୀୟ ଅଧିକାରୀ ମାନଙ୍କ ଜାଣତରେ ଚାଲିଥିବା ଅଭିଯୋଗ ହୋଇଛି । ୨୦୧୫ ମସିହାରେ ରାସନକାର୍ଡ ସହିତ ଆଧାରଲିଙ୍କ ହୋଇଥିବା ବେଳେ ଭବାନୀପାଟଣା ବ୍ଲକ ଯୋଗାଣ ବିଭାଗ ଓ ସିକୁଆଁ ପଞ୍ଚାୟତ ଅଧିକାରୀମାନେ ଅର୍ଜନୁ ସାହୁଙ୍କ ଅନ୍ତୋଦୟ କାର୍ଡ ୨ଟି ଜିଲ୍ଲାରେ ଥିବା ଜାଣି ପାରିଲେ ନାହିଁ ତାହା ଏବେ ସନ୍ଦେହଜନକ ଅଟେ ।
ବର୍ଷ ବର୍ଷ ଧରି ଚଞ୍ଚକତା କରି ଚାଉଳ ଉଠାଣ ହୋଇଥିବା ବେଳେ ପରେ ଗତ ଫେବୃୟାରୀ ମାସରେ କିଭଳି ଜଣାପଡିଲା ତାହା ଏବେ ସାଧାରଣରେ ଚକିତ କରିଛି । ଏ ନେଇ ସିକୁଆଁ ପଞ୍ଚାୟତ ନିର୍ବାହୀ ଅଧିକାରୀ ଭୂବନେଶ୍ବର ସିଂଙ୍କୁ ପଚାରିବାରୁ ଏ ବିଷୟରେ ମୁଁ କିଛି କହିପାରିବି ନାହିଁ , ସରପଞ୍ଚ ସବୁ ଜାଣିଛନ୍ତି ତାଙ୍କୁ ପଚାରନ୍ତୁ ବୋଲି କହିଥିଲେ । ଭବାନୀପାଟଣା ସଦରବ୍ଲକ ଯୋଗାଣ ଅଧିକାରୀ ସନ୍ତୋଷ ପ୍ରଧାନଙ୍କୁ ପଚାରିବାରୁ ଅର୍ଜୁନ ସାହୁଙ୍କ ପରିବାର କଳାହାଣ୍ଡି ଜିଲ୍ଲାର ସିକୁଆଁ ପଞ୍ଚାୟତ ଓ ବଲାଙ୍ଗୀର ଜିଲ୍ଲାର ଦିଗସିରା ପଞ୍ଚାୟତରେ ଅନ୍ତୋଦୟ ଅନ୍ନ ଯୋଜନାରେ ବହୁ ଦିନରୁ ଚାଉଳ ପାଇ ଆସୁଥିଲେ। ଆଧାର ଲିଙ୍କ ହେବା ପରେ ଚଳିତବର୍ଷ ଫେବୃୟାରୀ ମାସରେ ୨ଟି ସ୍ଥାନରେ ଚାଉଳ ପାଉଥିବା ଜଣାପଡିଥିଲା । ବର୍ତ୍ତମାନ ସିକୁଆଁ ପଞ୍ଚାୟତରୁ ଅନ୍ତୋଦୟ ଚାଉଳ ପାଉଥିବା ବେଳେ ବଲାଙ୍ଗୀର ଜିଲ୍ଲାରୁ ତାଙ୍କର ଅନ୍ତୋଦୟ ଅନ୍ନ ଯୋଜନା କାର୍ଡକୁ କଟା ଯାଇଛି ବୋଲି କହିଥିଲେ । ବର୍ତ୍ତମାନ ମଧ୍ୟ ବଲାଙ୍ଗୀର ଜିଲ୍ଲାର ଦିଗସିରା ପଞ୍ଚାୟତର ଗୌଡତୋଲା ଗ୍ରାମରୁ ଅର୍ଜୁନ ସାହୁଙ୍କ ପରିବାର ଅନ୍ତୋଦୟ ଅନ୍ନ ଯୋଜନାରେ ଚାଉଳ ଉଠାଣ କରୁଛନ୍ତି । ଏହି ଘଟଣାର ଭିଜିଲାନ୍ସ ସ୍ତରୀୟ ତଦନ୍ତ କରାଗଲେ ଅନ୍ତୋଦୟକାର୍ଡର ଗୁମର ଖୋଲିବ ବୋଲି ସାଧାରଣରେ ଦାବୀ ହୋଇଛି ।