ସମିତିସଭ୍ୟଙ୍କ ବିରୋଧରେ ବିଜୁ ପକ୍କା ଘର ଜାଲିଆତି ଅଭିଯୋଗ
ଖୋର୍ଦ୍ଧା : ବେଗୁନିଆ ବ୍ଲକ ଦେଉଳି ପଂଚାୟତର ଜଣେ ସମିତି ସଭ୍ୟାଙ୍କ ବିରୋଧରେ ଚଂଚକତା କରି ବିଜୁ ପକ୍କାଘର ଓ ବିପିଏଲ୍ କାର୍ଡ ହାସଲ କରିଥିବା ଡଙ୍ଗରପଡ଼ା ଗାଁର କେତେକ ଲୋକ ଜିଲ୍ଲାପାଳଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଅଭିଯୋଗକାରୀଙ୍କ କହିବାନୁସାରେ, ସମିତି ସଭ୍ୟା ଜଣକ ନିଜ ବିଧବା ଶାଶୁଙ୍କୁ ପରିବାର ମୁଖ୍ୟ ଭାବେ ଦର୍ଶାଇ ବେଆଇନ ଭାବେ ଗରିବ ଲୋକଙ୍କ ପାଇଁ ଉଦ୍ଦିଷ୍ଟ ବିଭିନ୍ନ ଯୋଜନା ହଡ଼ପ କରିଛନ୍ତି । ଏପରିକି ତାଙ୍କ ଶାଶୁଙ୍କ ନାମରେ ବିଜୁ ପକ୍କା ଘର ମଧ୍ୟ ପାଇଛନ୍ତି । ତାଙ୍କ ପରିବାରର ସଦସ୍ୟମାନେ ସରକାରୀ ଚାକିରି କରୁଛନ୍ତି । ପୂର୍ବେ ସମିତିସଭ୍ୟାଙ୍କ ଆବେଦନକୁ ସ୍ଥାନୀୟ ଭିଏଲ୍ଡବ୍ଲୁ ସରଜମିନ ତଦନ୍ତ କରିବା ପରେ ନାକଚ କରିଦେଇଥିଲେ । କିନ୍ତୁ ତତ୍କାଳୀନ ଏବିଡିଓ ଏହାକୁ ଅନୁମୋଦନ ଦେଇଥିଲେ ।
ଡଙ୍ଗରପଡ଼ାର ଅଭିଯୋଗକାରୀ କୃଷ୍ଣଚନ୍ଦ୍ର ପାଇକରାୟଙ୍କ କହିବାନୁସାରେ, ୨୦୧୮-୧୯ରେ ସମିତି ସଭ୍ୟାଜଣକ ଚଚଂକତା କରି ବିଜୁ ପକ୍କା ଘର ନେଇଛନ୍ତି । ଏନେଇ ଲିଖିତ ଭାବେ ବେଗୁନିଆ ବିଡିଓଙ୍କୁ ଜଣାଇଥିଲୁ, କିନ୍ତୁ କୌଣସି ପଦକ୍ଷେପ ନିଆଗଲା ନାହିଁ । ଏଣୁ ସେମାନେ ବାଧ୍ୟ ହୋଇ ଜିଲ୍ଲାପାଳଙ୍କୁ ଏନେଇ ଜଣାଇଛନ୍ତି । ଘଟଣାର ତଦନ୍ତ କରି ତୁରନ୍ତ ସମିତିସଭ୍ୟାଙ୍କ ବିରୋଧରେ ପଦକ୍ଷେପ ନେବାକୁ ସେମାନେ ଲିଖିତ ଅନୁରୋଧ କରିଛନ୍ତି ।