ଅଦରକାରୀ ବସ୍ତୁରେ ବିଜୁବାବୁଙ୍କ ପ୍ରତିମୂର୍ତ୍ତି ତିଆରି କଲେ ଆଇଟିଆଇ ଛାତ୍ରଛାତ୍ରୀ
ଛତ୍ରପୁର: ଗଞ୍ଜାମ ଜିଲ୍ଲା ଛତ୍ରପୁର ସରକାରୀ ଆଇଟିଆଇ ଛାତ୍ରଛାତ୍ରୀମାନଙ୍କ ଦ୍ବାରା ଅଦରକାରୀ ବସ୍ତୁ (ସ୍କ୍ରାପ୍)ରୁ ପ୍ରସ୍ତୁତ ବିଜୁବାବୁଙ୍କ ପ୍ରତିମୂର୍ତ୍ତି ଓ ତାଙ୍କ ବୀରତ୍ବର ପ୍ରତୀକ ଡାକୋଟା ବିମାନ ସବୁଠି ପ୍ରଶଂସା ସାଉଁଟୁଛି। ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ ଓ ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା ଆଜି ବିଜୁବାବୁଙ୍କ ୧୦୭ତମ ଜୟନ୍ତୀ ଅବସରରେ ଏହି କଳାକୃତିର ଉଦଘାଟନ କରିଥିଲେ। ଅନୁଷ୍ଠାନର ଅଧ୍ୟକ୍ଷ ଇଂ. ପ୍ରିୟବ୍ରତ ପଣ୍ଡା ଓ ଶିକ୍ଷକମାନଙ୍କ ପ୍ରତ୍ୟକ୍ଷ ମାର୍ଗଦର୍ଶନରେ ୱାସର୍, ବାଇଟ ଓ ସାଇକେଲ ଚେନ୍ ଏବଂ ଅନ୍ୟାନ୍ୟ ଅଦରକାରୀ ଘରୋଇ ଉପକରଣକୁ ନେଇ ଇଲେକ୍ଟ୍ରିସିଆନ, ଫିଟର ଓ ମେକାନିକାଲ ଟ୍ରେଡ୍ ସମେତ ବିଭିନ୍ନ ବିଭାଗର ଛାତ୍ରଛାତ୍ରୀମାନେ ମିଳିତ ଭାବେ ଏହାକୁ ନିର୍ମାଣ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ବିଜୁବାବୁଙ୍କ ପ୍ରତିମୂର୍ତ୍ତିର ଉଚ୍ଚତା ପ୍ରାୟ ୮ ଫୁଟ ଓ ଡାକୋଟା ବିମାନର ଉଚ୍ଚତା ୭ ଫୁଟ ଉଚ୍ଚ ଏବଂ ଲମ୍ବ ୨୦ ଫୁଟ ଓ ଓସାର ୨୬ ଫୁଟ ରହିଛି। ଉଦଘାଟନୀ ଉତ୍ସବରେ ଛତ୍ରପୁର ସରକାରୀ ଉପଖଣ୍ଡ ଚିକିତ୍ସାଳୟର ଡାକ୍ତର ଗୋପବନ୍ଧୁ ବେହେରାଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।