ଦ୍ରୁତଗତିରେ ଆସୁଥବା ଟ୍ରକ ଯୋଗୁଁ ବାଇକ୍ ଆରୋହୀଙ୍କ ଜୀବନ ଗଲା
ଭବାନୀପାଟଣା: ଲକଡାଉନ୍ ବେଳେ ଜନସାଧାରଣଙ୍କ ପାଇଁ ଲକଡାଉନ କଟକଣା ଥିବାବେଳେ ମାଲ ପରିବହନ ପାଇଁ ରାସ୍ତା ଖୋଲା ଛାଡ଼ିଥିବାବେଳେ ଜଣେ ଟ୍ରକ ଡ୍ରାଇଭରର ବେପରୁଆ ଗାଡ଼ି ଚାଳନା ଯୋଗୁଁ ଆଜି ଜଣେ ବାଇକ୍ ଆରୋହୀଙ୍କ ଦୁଃଖଦ ମୃତ୍ୟୁ ଘଟିଛି । ଘଟଣାଟି ଅଞ୍ଚଳରେ ଚାଞ୍ଚଲ୍ୟ ସ୍ରୁଷ୍ଟି କରିଥିବାବେଳେ ଟ୍ରକଟି ଦୁର୍ଘଟଣା ଘଟାଇ ଦ୍ରୁତଗତିରେ ପଳାଉଥିବା ବେଳେ ଅଧା ରାସ୍ତାରେ ପୁଣି ଦୁର୍ଘଟଣାଗ୍ରସ୍ତ ହେବା ଘଟଣା ସାଧାରଣରେ ଚର୍ଚ୍ଚାର ବିଷୟ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ପ୍ରାପ୍ତ ସୂଚନାରୁ ପ୍ରକାଶ ଯେ, କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ଗୋବର୍ଧନପୁର ପଞ୍ଚାୟତ ଗୋପାଳପୁର ଗାଁର ପୁରୁଷୋତ୍ତମ ବାଗ(୪୮) ଆଜି ସକାଳ ସାଢେ ୭ ଟା ସମୟରେ ନିଜ ବାଇକ୍ ରେ ଭବାନୀପାଟଣା ଯାଉଥିଲେ । ୬ ନମ୍ବର ରାଜ୍ୟ ରାଜପଥ ବଡ଼ ଛତିକୁଡ଼ା ନିକଟରେ ଭବାନୀପାଟଣା ପଟୁ ଦ୍ରୁତଗତିରେ ଆସୁଥବା ଟ୍ରକନଂ ସିଜି-୧୨-ଏସ୍-୯୨୨୨ ତାଙ୍କୁ ଧକ୍କା ଦେବା ସହ ବାଇକ୍ ସହ କିଛି ଦୂର ଘୋଷାଡ଼ି ନେଇଥିଲା ଘଟଣାସ୍ଥଳରେ ପୁରୁଷୋତ୍ତମ ମୁର୍ମୂଷୁ ଅବସ୍ଥାରେ ପଡ଼ିଥିବାବେଳେ ଟ୍ରକଟି ଦୁର୍ଘଟଣା ଘଟାଇ ସିକେରକୁପା ପଟେ ଦ୍ରୁତଗତିରେ ପଳାଉଥିଲା । ଫଳରେ କଦଳୀଘାଟିରେ ପୁଣି ଦୁର୍ଘଟଣାଗ୍ରସ୍ତ ହୋଇଥିଲା । ଖବର ପାଇ ସଦର ଥାନା ପୁଲିସ ଆଇ ଆଇସି ପ୍ରଦୀପ କୁମାର ଧରୁଆ ଘଟଣାସ୍ଥଳରେ ପହଞ୍ଚିବା ସହ ପୁରୁଷୋତ୍ତମଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ ଭବାନୀପାଟଣା ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ପୁରୁଷୋତ୍ତମଙ୍କ ତାଙ୍କର ମୃତ୍ୟୁ ହୋଇଥିଲା ।
ପୁଲିସ ପକ୍ଷରୁ ଶବକୁ ଜବତ କରିବା ସହ ବ୍ୟବଚ୍ଛେଦ କରିବା ପରେ ପରିବାର ବର୍ଗଙ୍କୁ ହସ୍ତାନ୍ତର କରିଥିଲେ । ଏନେଇ ସଦର ଥାନା ପକ୍ଷରୁ କେସ୍ ନଂ ୧୯୩/୨୦ରେ ଏକ ମାମଲା ରୁଜୁ କରି ଏଏସ୍ଆଇ ସଚିନ୍ଦ୍ର ପ୍ରଧାନ ତଦନ୍ତ କରୁଛନ୍ତି । ଅପରପକ୍ଷରେ ଆଜି ଅପରାହ୍ନରେ ଗାଁରେ ପୁରୁଷୋତ୍ତମ ଙ୍କ ମୃତ ଶବ ପହଞ୍ଚିବା ପରେ ଏକ ଶୋକାକୁଳ ପରିବେଶ ସ୍ରୁଷ୍ଟି ହୋଇଥିଲା । ମୃତ ପୁରୁଷୋତ୍ତମ ପରିବାରର ଜଣେ ମାତ୍ର ରୋଜଗାରକ୍ଷମ ବ୍ୟକ୍ତି ହୋଇଥିବାବେଳେ ଘରେ ବିଧବା ପତ୍ନୀ, ତିନିପୁଅ ଓ ଗୋଟିଏ ଝିଅ ଅଛନ୍ତି । ଏଣୁ ତାଙ୍କ ପରିବାରକୁ ତୁରନ୍ତ ସରକାରୀ ସହାୟତା ପ୍ରଦାନ ପାଇଁ ଦାବି ହେଉଛି । ଆଜି ଖବର ପାଇ ଗୋବର୍ଧନପୁର ସରପଞ୍ଚ ସୁରେନ୍ଦ୍ର ମାଝୀ ହରିଶ୍ଚନ୍ଦ୍ର ଯୋଜନାରୁ ଆର୍ଥିକ ସହାୟତା ପ୍ରଦାନ କରିଛନ୍ତି ।