ସ୍ପଷ୍ଟ ଦିବାଲୋକରେ ବାଇକ ଚୋରି, ସିସିଟିଭି କ୍ୟାମେରାରେ କଏଦ ହେଲା ଚୋରି ବେଳର ଦୃଶ୍ୟ

ବେତନଟୀସଦର: ଗତ ଦୁଇଦିନ ପୂର୍ବରୁ ବେତନଟୀ ଥାନା ଅଞ୍ଚଳରୁ ଗୋଟିଏ ରାତିରେ ୨ଟି ବାଇକ ଚୋରି ହୋଇ ଯାଥିବାବେଳେ ଶୁକ୍ରବାର ସ୍ପଷ୍ଟ ଦିବାଲୋକରେ ମୟୂରଭଞ୍ଜ ଜିଲ୍ଲା ବେତନଟୀ ମୁଖ୍ୟ ବଜାରର ଜନଗହଳିପୂର୍ଣ୍ଣ ଚଣ୍ଡୀଛକରେ ଥିବା ଏକ ଗହଣା ଦୋକାନ ନିକଟରୁ ପୁଣି ଏକ ମୋଟର ସାଇକେଲ ଚୋରି ହୋଇଯାଇଛି। ଯାହାର ଦୃଶ୍ୟ ସିସିଟିଭି କ୍ୟାମେରାରେ କଏଦ ହୋଇଛି। ସୂଚନା ଅନୁଯାୟୀ, ସ୍ଥାନୀୟ ଭୋଗବାଟି ଗ୍ରାମର ପ୍ରଫୁଲ୍ଲ ସାହୁଙ୍କ ପୁଅ ପ୍ରଦୀପ୍ତ ସାହୁ ତାଙ୍କର ଚଣ୍ଡୀଛକରେ ଅନ୍ନପୂର୍ଣ୍ଣା ଜୁଏଲର୍ସ ନାମରେ ଏକ ଗହଣା ଦୋକାନ ରହିଛି। ସବୁଦିନ ଭଳି ଶୁକ୍ରବାର ପୂର୍ବାହ୍ନରେ ଦୋକାନ ପାଖରେ ଓଡି-୧୧ଏକ୍ସ-୨୮୧୧ନମ୍ବର ବିଶିଷ୍ଟ କଳାରଙ୍ଗର ଟିଭିଏସ ସ୍ପୋର୍ଟ୍ସ ମୋଟର ସାଇକେଲ ରଖି ସେ ଦୋକାନ ଖୋଲିଥିଲେ। ତେବେ କିଛି ସମୟ ପରେ ଦୋକାନ ପାଖରେ ରଖିଥିବା ମୋଟର ସାଇକେଲ ନଥିବାର ଦେଖିବାକୁ ପାଇ ବ୍ୟସ୍ତ ହୋଇ ପଡ଼ିଥିଲେ।

ବହୁ ଖୋଜାଖୋଜି ସତ୍ୱେ ମୋଟର ସାଇକେଲ ନପାଇ ପାଖ ଦୋକାନରେ ସିସିଟିଭି ଫୁଟେଜ ଯାଞ୍ଚ କରିବା ପରେ ଦେଖିବାକୁ ପାଇଥିଲେ କି ଜଣେ କେହି ଅଚିହ୍ନା ଯୁବକ ଅତ୍ୟନ୍ତ ଚତୁରତାର ସହିତ ମୋଟର ସାଇକେଲକୁ ସେଠାରୁ ଗଡ଼ାଇ ଗଡ଼ାଇ ନେଇ ଚମ୍ପଟ ମାରିଥିଲା। ଏନେଇ ପ୍ରଦୀପ୍ତ ବେତନଟୀ ଥାନାରେ ଏତଲା ଦାଏର କରିବା ପରେ ପୁଲିସ ମୁଖ୍ୟବଜାରରେ ଥିବା ବିଭିନ୍ନ ଦୋକାନର ସିସିଟିଭି ଫୁଟେଜ ଯାଞ୍ଚ କରିବା ସହିତ ତଦନ୍ତ ଆରମ୍ଭ କରିଛି ଓ ବାଇକ ଲୁଟେରାକୁ ଧରିବାକୁ ପ୍ରୟାସ ଜାରି ରଖିଛି।