ଜଗା ଦର୍ଶନ ସାରି ଫେରୁଥିଲେ: ଗଛରେ ପିଟି ହେଲା ତୀର୍ଥଯାତ୍ରୀ ବସ, ୬ ଯାତ୍ରୀ ଆହତ

ବୌଦ୍ଧ: ଖୋର୍ଦ୍ଧା-ବଲାଙ୍ଗୀର ୫୭ ନଂ ଜାତୀୟ ରାଜପଥର ବୌଦ୍ଧ ଜିଲ୍ଲା ହରେକୃଷ୍ଣପୁର ନିକଟରେ ଏକ ତୀର୍ଥଯାତ୍ରୀ ବାସ ଭାରସାମ୍ୟ ହରାଇ ରାସ୍ତା କଡର ଏକ ଗଛରେ ପିଟି ହୋଇଛି। ଯାତ୍ରୀଙ୍କ ମଧ୍ୟରୁ ୬ ଜଣ ଗୁରୁତର ଆହତ ହୋଇଛନ୍ତି। ଅନ୍ୟ ୪୦ ଜଣ ଅଳ୍ପକେ ବର୍ତ୍ତି ଯାଇଛନ୍ତି। ପୁରୀରୁ ଜଗା ଦର୍ଶନ ସାରି ନୃସିଂହନାଥ ଅଭିମୁଖେ ଯାଉଥିଲେ। ସମସ୍ତ ତୀର୍ଥଯାତ୍ରୀ ଛତିଶଗଡ଼ର ରାୟପୁର ଅଞ୍ଚଳର ବୋଲି ଜଣାଯାଇଛି। ବୌଦ୍ଧ ମେଡିକାଲରେ ଆହତମାନଙ୍କର ଚିକିତ୍ସା ଜାରି ରହିଛି।

ସୂଚନା ଅନୁଯାୟୀ, ଛତିଶଗଡ଼ର ରାୟପୁର ଅଞ୍ଚଳର ପ୍ରାୟ ୫୦ ଜଣ ତୀର୍ଥଯାତ୍ରୀ ଏକ ବସ ଯୋଗେ ପୁରୀରୁ ଜଗା ଦର୍ଶନ ସାରି ବରଗଡ଼ ଜିଲ୍ଲାର ନୃସିଂହନାଥ ପୀଠ ଦର୍ଶନ ପାଇଁ ଯାଉଥିବା ବେଳେ ଦୁର୍ଘଟଣାର ଶିକାର ହୋଇଛନ୍ତି। ଖବର ପାଇ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଆମ୍ବୁଲାନ୍ସ ଯୋଗେ ବୌଦ୍ଧ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି। ଘଟଣାସ୍ଥଳରେ ବୌଦ୍ଧ ଥାନା ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି।