ବୌଦ୍ଧ :ଦେଶରେ ନୂଆ ମୋଟରଯାନ ଆଇନ ଲାଗୁ ହେବା ପରେ ଲୋକଙ୍କ ନିଦ ହଜିଯାଇଛି । ଆଇନ ଉଂଲ୍ଲଘନ କଲେ ମୋଟା ଅଙ୍କର ଅର୍ଥ ଜରିମାନା ଦେବାକୁ ପଡ଼ୁଛି । ଏଭଳି ସ୍ଥିତିରେ ବୌଦ୍ଧ ଜିଲ୍ଲା ବାମଣ୍ଡା ଗ୍ରାମର ଚାଷୀ ଦିଲୀପ ମହାପାତ୍ର ନିଜ ଉଦ୍ୟମରେ ନିଜ ଖର୍ଚ୍ଚରେ ବ୍ୟାଟେରି ଚାଳିତ କିଷାନ୍ ବାଇକ ତିଆରି କରିଛନ୍ତି । ଏହା ଦେଖିବାକୁ ସିନା ସାଇକେଲ୍ ଭଳି, କାମରେ କିନ୍ତୁ ବାଇକ୍ ସହ ସମାନ ।
Sambad is now on WhatsApp
Join and get latest news updates delivered to you via WhatsApp
ବଡ଼ କଥା ହେଲା ପେଟ୍ରୋଲ୍,ଡିଜେଲ୍ କିମ୍ବା ଇଂଜିନ୍ ଅଏଲ୍ ବିନା ଏହା ଘଣ୍ଟା ପ୍ରତି ୩୦ କିଲୋମିଟର ବେଗରେ ଚାଲିପାରିବ । ଏଥିରେ ଲାଗିଛି ୧୨ ଭୋଲ୍ଟର ଦୁଇଟି ବ୍ୟାଟେରି ଓ ୩୫ ୱାଟର ମୋଟର୍ । ଥରେ ବ୍ୟାଟେରିକୁ ୪ରୁ ୫ ଘଣ୍ଟା ଚାର୍ଜ କଲେ ସାଇକେଲ୍ ୮୦ କିଲୋମିଟର ଚାଲିବ । ବାଇକରେ ଲାଗିଛି ଏକ୍ସଲେଟର୍ । ଗତି କମାଇବା ପାଇଁ ବି ରହିଛି କଣ୍ଟ୍ରୋଲର । ଦିଲ୍ଲୀର କରୋଲବାଗରୁ ଦିଲୀପ ସେ ମୋଟରଟି ଆଣିଥିବା ପ୍ରକାଶ କରିଛନ୍ତି । ବର୍ତ୍ତମାନ ବଜାରରେ ଉପଲବ୍ଧ ବାଇକର ଦାମ୍ ଅତିକମରେ ୫୦ ହଜାର ଟଙ୍କା ରହିଛି ।
ମାତ୍ର ୧୦ ରୁ ୧୫ ହଜାର ଟଙ୍କା ଖର୍ଚ୍ଚରେ ଦିଲୀପ ଏହି ବାଇକ୍ ତିଆରି କରିଛନ୍ତି । ଏହି ବ୍ୟାଟେରି ଚାଳିତ କିଷାନ୍ ବାଇକରେ ଏଲଇଡି ହେଡ୍ ଲାଇଟ୍ ଓ ବ୍ୟାଟ୍ ଲାଇଟ୍ ବି ରହିଛି । ଏହାଦ୍ୱାରା ଶବ୍ଦ କିମ୍ବା ବାୟୁ ପ୍ରଦୂଷଣ ହେବ ନାହିଁ । ଆଗାମୀ ଦିନରେ ଦିଲୀପ ଚାଷୀଙ୍କ ପାଇଁ କମ୍ ଖର୍ଚ୍ଚରେ ବ୍ୟାଟେରି ଚାଳିତ ଶଗଡ଼ ଗାଡ଼ି ତିଆରି କରିବାର ଲକ୍ଷ୍ୟ ରଖିଛନ୍ତି । ତାଙ୍କର ଏହି ପ୍ରୟାସକୁ ଅଂଚଳବାସୀ ପ୍ରଶଂସା କରିଛନ୍ତି ।