ବାମରା : ବାମରା ବ୍ଲକ ରଙ୍ଗିଆଟିକିରା ପଞ୍ଚାୟତ କହପାଣି ଗ୍ରାମର ଜଣେ ଶିଶୁ ପୋଖରୀରେ ବୁଡ଼ି ମୃତ୍ୟୁବରଣ କରିଛି । ଏ ନେଇ ଗୋବିନ୍ଦପୁର ପୁଲିସଏକ ଅପମୃତ୍ୟୁ ମାମଲା ରୁଜୁ କରି ଅନୁସନ୍ଧାନ ଆରମ୍ଭ କରିଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ, ଗୁରୁବାର ଦିନ ୧୨ଟା ବେଳେ କହପାଣି ଗ୍ରାମର ପ୍ରକାଶ ବେହେରାଙ୍କ ଏକମାତ୍ର ପୁଅ ସ୍ୱାଗତ ବେହେରା(୯) ନିଜ ୫/୬ ଜଣ ସାଙ୍ଗ ସାଥୀଙ୍କ ସହ ମିଶି ନିକଟରେ ଥିବା ଏକ ପୋଖରୀ(ବନ୍ଧ) କୁ ଗାଧୋଇବାକୁ ଯାଇଥିଲେ । ସମସ୍ତେ ପ୍ରାୟ ୧ ଘଣ୍ଟା ଧରି ଡିଆଁ ମାରି ଗାଧୋଉଥିବା ବେଳେ, ସ୍ୱାଗତ ମଧ୍ୟ ଡିଆଁ ମାରି ଗଭୀର ପାଣି ଭିତରକୁ ପଶି ଯାଇଥିଲା । ସେ କିଛି ସମୟ ପରେ ବାହାରକୁ ବାହାରି ଆସିବ ଭାବି ସବୁ ଛୁଆ ଘାଟ ଉପରେ ଚାହିଁ ରହିଥିଲେ । ଦୀର୍ଘ ସମୟ ପରେ ମଧ୍ୟ ସ୍ୱାଗତ ପାଣିରୁ ନ ବହାରିବାରୁ, ଅନ୍ୟ ଶିଶୁମାନେ ଭୟରେ କାହାକୁ କିଛି ନ କହି ନିଜ ନିଜ ଘରକୁ ଚୁପଚାପ ଫେରି ଯାଇଥିଲେ । ଏହାର କିଛି ସମୟ ପରେ କୌଣସି ସୂତ୍ରରୁ ଖବର ପାଇ ଘର ଲୋକେ ଆସି ଗୁରୁତର ଅବସ୍ଥାରେ ପାଣିରୁ ବାହାର କରିଥିଲେ । ତୁରନ୍ତ ୧୦୮ ଆମ୍ବୁଲାନ୍ସ ଯୋଗେ ବାମରା ଡାକ୍ତରଖାନାକୁ ନେଇଥିଲେ ହେଁ,ସେଠାରେ ତାଙ୍କର ମୃତ୍ୟୁ ହୋଇଥିଲା । ଏ ନେଇ ଗୋବିନ୍ଦପୁର ଥାନାରେ ଅପମୃତ୍ୟୁ ମାମଲା ୫/୨୧ ରୁଜୁ କରି ତଦନ୍ତ ଚାଲିଥିବା ଏଏସ୍ଆଇ ଯୋଗେଶ୍ୱର କିସାନଙ୍କ ଠାରୁ ପ୍ରକାଶ । ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି । ଏକମାତ୍ର ପୁଅର ମୃତ୍ୟୁ ପରେ ପରିବାର ଲୋକେ ଶୋକରେ ଭାଙ୍ଗି ପଡିଛନ୍ତି । ଶୋକାକୁଳ ପରିବେଶ ଭିତରେ ଅନ୍ତିମ ସଂସ୍କାର ସମ୍ପନ୍ନ ହୋଇଥିଲା ।