ବ୍ରାଉନ ସୁଗାର କାରବାରରେ ଡାକ୍ତରଙ୍କ ହାତ : ଧରିଲା ଯାଜପୁର ଟାଉନ ଥାନା ପୁଲିସ

ଯାଜପୁର: ଯାଜପୁର ସହରରେ ଜଣେ ଯୁବ ଡାକ୍ତର ନିଗମାନନ୍ଦ ଖଟୁଆ ବ୍ରାଉନସୁଗାର ବ୍ୟବସାୟରେ ଲିପ୍ତ ଥିବା ଜଣାପଡ଼ିଛି । ତାଙ୍କଠାରୁ କିଣି ବ୍ୟବସାୟ କରୁଥିବା ୨ ଜଣଙ୍କଠାରୁ ୨୫.୨ ଗ୍ରାମ ବ୍ରାଉନ ସୁଗର ଜବତ କରିଛି ଯାଜପୁର ଟାଉନ ଥାନା ପୁଲିସ। ଏକ ଡେଣ୍ଟାଲ କ୍ଲିନିକ୍ ଚଳାଉଥିବା ଦାନ୍ତଡାକ୍ତର ଜଣକ ବ୍ରାଉନସୁଗାର ବେପାରର ମୁଖ୍ୟ କାର୍ପଟଦାର ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଛି । ଯାଜପୁର ଟାଉନ ଥାନା ମହାବୀର ଛକରେ ତାଙ୍କର କ୍ଳିନିକ ଥିବା ସୂଚନା ମିଳିଛି ।

ସୂଚନା ଅନୁସାରେ ଗତକାଲି ସୁନ୍ଦରେଇ ମୁହଁ ଛକ ନିକଟରେ ବ୍ରାଉନସୁଗାର ବିକୁଥିବା ବେଳେ ଗିରଫ ହୋଇଥିଲେ ଅଭିଯୁକ୍ତ। ଏହି ଘଟଣାରେ ପୁଲିସ ଡାକ୍ତରଙ୍କଠାରୁ ବ୍ରାଉନସୁଗାର କିଣି ବେପାର କରୁଥିବା ଟାଉନ ଥାନା ଅଞ୍ଚଳରେ ସନ୍ଦୀପ କୁମାର ମଲ୍ଲିକ ଓ ରକ୍ଷାକର ଦୀକ୍ଷିତଙ୍କୁ ଗିରଫ କରିଛି। ଜବତ ବ୍ରାଉନସୁଗାରର ମୂଲ୍ୟ ଅଢେଇ ଲକ୍ଷ ଟଙ୍କା ହେବ ବୋଲି ଜଣାପଡ଼ିଛି। ଏ ନେଇ ଏସଡିପିଓ ସତ୍ୟବ୍ରତ ଲେଙ୍କା ସୂଚନା ଦେଇଛନ୍ତି।