ପ୍ରଧାନଶିକ୍ଷୟିତ୍ରୀଙ୍କ ବଦଳି ବାତିଲ ଦାବି: ରାସ୍ତାରୋକ, ବିଇଓଙ୍କୁ ଦାବିପତ୍ର

ବେଲପଡ଼ା:ବଲାଙ୍ଗୀର ଜିଲ୍ଲା ବେଲପଡ଼ା ବ୍ଲକ୍ ଘାଗୁର୍ଲି ନୋଡାଲ ୟୁପିସ୍କୁଲର ପ୍ରଧାନଶିକ୍ଷୟିତ୍ରୀ ସୁଷମା ପାଣିଗ୍ରାହୀଙ୍କ ବଦଳି ପ୍ରତିବାଦରେ ଛାତ୍ରଛାତ୍ରୀ ଓ ଗ୍ରାମବାସୀମାନେ ଘାଗୁର୍ଲି ମୁଖ୍ୟ ରାସ୍ତା ଅବରୋଧ କରି ପ୍ରତିବାଦ କରିଥିଲେ। ଏଥିସହ ବେଲପଡ଼ା ବିଇଓଙ୍କୁ ମଧ୍ୟ ଦାବିପତ୍ର ପ୍ରଦାନ କରିଛନ୍ତି। ଦାବିପତ୍ରରେ ଶ୍ରୀମତୀ ପାଣିଗ୍ରାହୀଙ୍କ ବଦଳିକୁ ତୁରନ୍ତ ବାତିଲ କରିବା ସହ ନୂତନ ଶିକ୍ଷକ ପ୍ରଦାନ କରିବା ପାଇଁ ଉଲ୍ଲେଖ ଅଛି। ସ୍କୁଲରେ ପ୍ରାୟ ୨୫୦ ଛାତ୍ରଛାତ୍ରୀ ପଢ଼ନ୍ତି।

ତେବେ ସ୍କୁଲରୁ ଜଣକ ପରେ ଜଣେ ଶିକ୍ଷକଙ୍କୁ ବଦଳି କରାଯାଉଥିବା ବେଳେ କାହାରିକୁ ନିଯୁକ୍ତି ଦିଆଯାଉ ନ ଥିବା ଅଭିଯୋଗ ହୋଇଛି। ୨୦୨୧ ପର୍ଯ୍ୟନ୍ତ ଏଠାରେ ୧୦ ଜଣ ଶିକ୍ଷକ ଥିବାବେଳେ ଏହାପରେ ଆଜିପର୍ଯ୍ୟନ୍ତ ଏଠାରୁ ୪ରୁ ଅଧିକ ଶିକ୍ଷକଙ୍କ ବଦଳି ହୋଇଛି। ଦାବିପତ୍ର ପ୍ରଦାନ ସମୟରେ ପରିଚାଳନା କମିଟି ସଭାପତି ସୋମନାଥ ଶବର, ଅରୁଣ ପାଣିଗ୍ରାହୀ, ଲୋକନାଥ ପାଣିଗ୍ରାହୀଙ୍କ ସହ ଗ୍ରାମବାସୀମାନେ ଉପସ୍ଥିତ ଥିଲେ।