ବ୍ରହ୍ମବରଦା: ବ୍ରହ୍ମବରଦା ଥାନା ଅଧୀନ ରାଉତରାପୁର ପଞ୍ଚାୟତ କୁଣ୍ତପାଟଣା ଗ୍ରାମର ଦର୍ଶନ ଉଚ୍ଚବିଦ୍ୟାଳୟରୁ ଗତକାଲି ବିଳମ୍ବିତ ରାତିରେ ଚୋରି ହୋଇଛି। ଅଭିଯୋଗ ପରେ ବ୍ରହ୍ମବରଦା ପୁଲିସ ୧୩୭/୨୩ରେ ମାମଲା ରୁଜୁ କରିବା ସହ ଘଟଣା ସ୍ଥଳରେ ପହଞ୍ଚି ତଦନ୍ତ ଜାରି ରଖିଛି। କେହି ଦୁର୍ବୃତ୍ତ ପାଚେରି ଚଢ଼ି ବିଦ୍ୟାଳୟ ପରିସରରେ ପଶିବା ସହ ଶ୍ରେଣୀଗୃହ କବାଟ ଓ ତାଲା ଭାଙ୍ଗି ଇ-ଲାଇବ୍ରେରି କକ୍ଷରୁ ୪ଟି କମ୍ପ୍ୟୁଟର, ଗୋଟିଏ ଘଣ୍ଟି, କିଛି ଖେଳ ସାମଗ୍ରୀ ଓ ବହି ଚୋରି କରିନେଇଥିବା ପ୍ରଧାନଶିକ୍ଷୟିତ୍ରୀ ସୁଷମା ସାମଲ ବ୍ରହ୍ମବରଦା ଥାନାରେ ଅଭିଯୋଗ କରିଛନ୍ତି। ଏହି ଅଞ୍ଚଳରୁ ଏକାଧିକ ଥର ଚୋରି ହୋଇଥିବା ବେଳେ ବ୍ରହ୍ମବରଦା ପୁଲିସ ଅଭିଯୁକ୍ତଙ୍କୁ ଧରିବାରେ ସଫଳ ହୋଇନାହିଁ। ସରପଞ୍ଚ ସ୍ବର୍ଣ୍ଣଲତା ସାହୁ କହନ୍ତି ଯେ ଉକ୍ତ ୫-ଟି ବିଦ୍ୟାଳୟରେ ଜଣେ ରାତ୍ର ଜଗୁଆଳ ନିଯୁକ୍ତି ପାଇଁ ନୋଟିସ ଦିଆଯାଇଥିଲା। ମା’ କାଳୀ ସ୍ବୟଂ ସହାୟକା ଗୋଷ୍ଠୀ ପକ୍ଷରୁ ନିଯୁକ୍ତି ପାଇଁ ଆବେଦନ କରାଯାଇଥିଲା। ହେଲେ ଏଯାଏ କାହାରିକୁ ନିଯୁକ୍ତି ଦିଆଯାଇ ନଥିବାରୁ ଏଭଳି ଘଟଣା ଘଟିଛି ବୋଲି ସରପଞ୍ଚ କହିଛନ୍ତି।