ପତ୍ନୀ ହତ୍ୟା ଅଭିଯୋଗରେ ଅଭିଯୁକ୍ତକୁ ଦଣ୍ଡ ଶୁଣାଇଲେ କୋର୍ଟ

ବ୍ରହ୍ମପୁର: ଅଧିକ ଯୌତୁକ ଦାବି କରି ପତ୍ନୀକୁ ନିର୍ଯାତନା ଦେବା ସହ ଦେହରେ କିରାସିନି ଢାଳି ହତ୍ୟା ମାମଲାରେ ଅଭିଯୁକ୍ତ ସ୍ବାମୀ ଆଜି କୋର୍ଟରେ ଦୋ‌ଷୀ ସାବ୍ୟସ୍ତ ହୋଇଥିବା ଜଣାପଡ଼ିଛି। ଜରଡ଼ା ଥାନା ଅଂଚଳରେ ୨୦୧୫ମସିହାରେ ହୋଇଥିବା ଏହି ମାମଲାର ବିଚାରଣା କରି ଗଂଜାମ ଜିଲ୍ଲା ଅତିରିକ୍ତ ଦୌରାଜଜ୍ (ଏଡିଜେ-୩ୟ) ରାଜକୁମାର ଦାସ ଆଜି ଚୂଡ଼ାନ୍ତ ରାୟ ଶୁଣାଇଥିଲେ। ଉପଯୁକ୍ତ ସାକ୍ଷ୍ୟପ୍ରମାଣକୁ ଭିତ୍ତି କରି ଅଭିଯୁକ୍ତ ସ୍ବାମୀକୁ ଦୋଷୀ ସାବ୍ୟସ୍ତ କରିଥିବା ବେଳେ ତା’କୁ ୧୩ବର୍ଷ ୬ମାସ ସଶ୍ରମ କାରାଦଣ୍ଡ ସହ ୧୦ହଜାର ଟଙ୍କା ଜରିମାନା, ଏହା ଅନାଦେୟ ହେଲେ ଅଧିକ ୩ମାସ ସଶ୍ରମ କାରାଦଣ୍ଡାଦେଶ ଦେଇଥିବା ଜଣାପଡ଼ିଛି। ଦୋଷୀ ସାବ୍ୟସ୍ତ ଅଭିଯୁକ୍ତ ହେଲା ଜରଡ଼ା ଥାନା ନନ୍ଦିଗାଁର ବୈରାଗୀ ନାୟକ (୪୭)।

ସୂଚନା ମୁତାବକ, ବୈରାଗୀ ତଣ୍ଡିପୁର ଗ୍ରାମର ସ୍ବପ୍ନାଙ୍କୁ ବିବାହ କରିଥିଲା। କିଛିଦିନ ପରେ ଅଧିକ ଯୌତୁକ ଦାବି କରି ସ୍ବପ୍ନାଙ୍କୁ ନିର୍ଯାତନା ଦେବା ଆରମ୍ଭ କରି ଦେଇଥିଲେ। ଘଟଣା ଦିନ ସେ ସ୍ତ୍ରୀଙ୍କୁ ମାଡ଼ମାରି ପ୍ରଥମେ ଚେତାଶୂନ୍ୟ କରି ଦେଇଥିଲା। ପରେ କିରାସିନି ଢାଳି ନିଆଁ ଲଗାଇ ଦେଇଥିଲା। ଏଥିରେ ସ୍ବପ୍ନାଙ୍କ ଶରୀରର ଅଧିକାଂଶ ଭାଗ ପୋଡ଼ି ଯାଇଥିଲା। ଗୁରୁତର ଅବସ୍ଥାରେ ତାଙ୍କୁ ଚିକିତ୍ସା ପାଇଁ ବ୍ରହ୍ମପୁର ସ୍ଥିତ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। କିନ୍ତୁ ବାଟରେ ତାଙ୍କର ମୃତ୍ୟୁ ହୋଇଯାଇଥିବା ଡାକ୍ତର ଘୋଷଣା କରିଥିଲେ। ବୈରାଗୀ ମଧ୍ୟ ଆହତ ହୋଇ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି ହୋଇଥିଲା। ସ୍ବପ୍ନାଙ୍କ ମା’ ଜରଡ଼ା ଥାନାରେ ଅଭିଯୋଗ କରିବା ପରେ ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ବୈରାଗୀ ସୁସ୍ଥ ହୋଇ ଡାକ୍ତରଖାନାରୁ ଫେରିବା ପରେ ପୁଲିସ ତା’କୁ ଗିରଫ କରି କୋର୍ଟଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ତା’କୁ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଥିଲା। ଏପର୍ଯ୍ୟନ୍ତ ସେ ବାଚରାଧୀନ ବନ୍ଦୀ ଭାବେ ଜେଲ୍‌ରେ ଥିଲା। ଏହି ମାମଲାର ବିଚାରଣା ଏଡିଜେ-୩ୟଙ୍କ କୋର୍ଟରେ ହୋଇଥିଲା। ପୁଲିସର ଚାର୍ଜସିଟ୍ ସହ ୨୩ଜଣଙ୍କ ସାକ୍ଷ୍ୟ ଗ୍ରହଣ ପରେ ଜଜ୍ ଆଜି ଚୂଡ଼ାନ୍ତ ରାୟ ଶୁଣାଇଥିଲେ। ସରକାରଙ୍କ ପକ୍ଷରୁ କ୍ୟାଡର୍‌ ଅତିରିକ୍ତ ପିପି ବିକ୍ରମ କୁମାର କୁଣ୍ଡୁ ମକଦ୍ଦମା ପରିଚାଳନା କରିଥିଲେ।

ସେହିପରି ଧର୍ମଗଡରେ ବି ପତ୍ନୀ ହତ୍ୟାକାରୀ ଅଭିଯୁକ୍ତ ସ୍ବାମୀକୁ ଆଜୀବନ କାରାଦଣ୍ଡ ଶୁଣାଇଛନ୍ତି ଧର୍ମଗଡ ଅତିରିକ୍ତ ଜିଲ୍ଲା ଦୌରାଜଜ। ଗତ ୨୨/୧/୨୦୧୮ ମସିହାରେ କଳାହାଣ୍ଡି ଜିଲ୍ଲା ଜୁନାଗଡ ହଣ୍ଡାଖାଲ ପଡାରେ ମନଜିତ ମେହେର ନିଜର ସ୍ତ୍ରୀ ସବିତା ମେହେରଙ୍କୁ ଯୌତୁକ ପାଇଁ ତଣ୍ଟି ଚିପି ହତ୍ୟା କରିଥିଲା । ଏହାକୁ ନେଇ ଜୁନାଗଡ ପଲାସ ଗ୍ରାମର ସବିତା ମେହେରଙ୍କ ଭାଇ ତୁଲାରାମ ମେହେର ଜୁନାଗଡ଼ ଥାନାରେ ଅଭିଯୋଗ କରିଥିଲେ। ଜୁନାଗଡ଼ ପୁଲିସ ଏତଲାକୁ ଭିତ୍ତି କରି ମନଜିତ ମେହେର ଓ ତାଙ୍କ ମାଆ ଏବଂ ସାନ ଭାଇଙ୍କୁ ଜୁନାଗଡ଼ ଥାନା କେସ ନ ୩୧/୨୦୧୮ ରେ ଗିରଫ କରି କୋର୍ଟ ଚାଲାଣ କରିଥିଲେ। ସମସ୍ତ ସାକ୍ଷ୍ୟ ପ୍ରମାଣକୁ ଆଧାର କରି ଆଜି ବିଚାରପତି ଅଭିଯୁକ୍ତ ମନଜିତ ମେହେରଙ୍କୁ ଧାରା ୩୦୨ରେ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି।