୩ ଟ୍ରକ ଗୋମାଂସ ଜବତ, ୬ ଅଟକ
ଖୋର୍ଦ୍ଧା: ଆଜି ସକାଳେ ୧୬ ନମ୍ବର ଜାତୀୟ ରାଜପଥର ବାଟମଙ୍ଗଳା ବାଇପାସ୍ ନିକଟରୁ ୩ଟି ତାମିଲନାଡ଼ୁ ପଂଜୀକୃତ କଣ୍ଟେନର ଭର୍ତ୍ତି ଗୋମାଂସ ଜବତ ହୋଇଛି । ସୂଚନାନୁସାରେ, ଆଜି ଭୋର ସାଢ଼େ ୪ଟା ବେଳେ ଖୋର୍ଦ୍ଧା ଗୋ ସୁରକ୍ଷା ମଂଚର ସଦସ୍ୟମାନେ ସନ୍ଦେହରେ କୋଲକାତାରୁ ଚେନ୍ନାଇ (ତାମିଲନାଡ଼ୁ)ଯାଉଥିବା ୩ଟି କଣ୍ଟେନରକୁ ଗଡ଼ଖୋର୍ଦ୍ଧା ଛକ ନିକଟରେ ଅଟକାଇଥିଲେ । ତେବେ ଟ୍ରକ ଚାଳକମାନେ ଗାଡ଼ି ଅଟକାଇବା ପରିବର୍ତ୍ତେ ସେମାନଙ୍କ ଉପରେ ମାଡ଼ି ଚାଲିଯିବାକୁ ଚେଷ୍ଟା କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ଶେଷରେ ବାଟମଙ୍ଗଳା ବାଇପାସ୍ ନିକଟରେ ଅଣଓସାରିଆ ରାସ୍ତାରେ ଟ୍ରକ୍ ତିନିଟିକୁ କୌଣସି ମତେ ଅଟକାଇ ଶିଳ୍ପାଞ୍ଚଳ ପୁଲିସକୁ ସୂଚନା ଦେଇଥିଲେ । ପୁଲିସ ପହଂଚି (ଟିଏନ ୯୩ ବି ୪୭୯୯, ଟିଏନ୍ ୮୮ଏ ୮୭୯୩ ଓ ଟିଏନ୍ ୯୩ଡି ୯୫୯୯) ଗାଡ଼ି ଜବତ କରିବା ସହ ୬ଜଣ ଟ୍ରକ ଚାଳକଙ୍କୁ ଅଟକ ରଖିଛି । ତେବେ ପ୍ରାଥମିକ ଯାଂଚରେ ଟ୍ରକର ସମସ୍ତ ମାଂସକୁ ନେଇ ପ୍ରସ୍ତୁତ କରାଯାଇଥିବା କାଗଜପତ୍ର ଜାଲ ଥିବା ଓ ପୋଢ଼ ମାଂସ ନାମରେ ଗୋମାଂସ ଚାଲାଣ ହେଉଥିବା ଜଣାଯାଇଛି । ଏନେଇ ଖୋର୍ଦ୍ଧା ଟାଉନ ଥାନାର ଭାରପ୍ରାପ୍ତ ଅଧିକାରୀ ତାରିକ ଅହମ୍ମଦ କହିଛନ୍ତି ଯେ ଯାଂଚ ପାଇଁ ମାଂସର ନମୁନା ପଠାଯାଇଛି । ଟ୍ରକଗୁଡିକ ଆଇଆରବି ବାଟାଲିଅନ ପଡ଼ିଆରେ ରଖାଯାଇଛି । ଯାଂଚ ରିପୋର୍ଟ ଆସିବା ପରେ ପରବର୍ତ୍ତୀ ପଦକ୍ଷେପ ନିଆଯିବ ।