ଅଭିଯୋଗ ବାକ୍ସ ଧରି ପ୍ରାର୍ଥୀଙ୍କ ଅଭିନବ ପ୍ରଚାର
ଫୁଲନଖରା: ନିର୍ବାଚନରେ ଜନମତକୁ ନିଜ ଆଡ଼କୁ ଆକର୍ଷିତ କରିବା ପାଇଁ ପ୍ରାର୍ଥୀମାନେ ନାନାଦି ପ୍ରକାର କୌଶଳ ଅବଳମ୍ବନ କରୁଛନ୍ତି। ଏପରି ଏକ ଅଭିନବ ପ୍ରଚାର ଶୈଳୀ ଦେଖିବାକୁ ମିଳିଛି ବାରଙ୍ଗ ବ୍ଲକ କୁରାଙ୍ଗଶାସନ ପଞ୍ଚାୟତ ଅନ୍ତର୍ଗତ ବଡ଼ଝରିଲୋ ଗ୍ରାମରେ। ଏହି ଗ୍ରାମର ସନ୍ତୋଷକୁମାର ସିହ୍ନା ଚଳିତ ପଞ୍ଚାୟତ ନିର୍ବାଚନରେ ସମିତି ସଭ୍ୟ ପ୍ରାର୍ଥୀଭାବେ ନିର୍ବାଚନ ଲଢୁଛନ୍ତି। ଲୋକମାନଙ୍କ ନିକଟକୁ ଯାଇ ସେମାନଙ୍କ ଅଭାବ, ଅସୁବିଧା ଓ ସମସ୍ୟା ବାବଦରେ ପଚାରି ବୁଝୁଛନ୍ତି। ଏଥିପାଇଁ ସେ ନିଜ ଦୁଇ ଚକିଆ ଯାନରେ ଏକ ଅଭିଯୋଗ ବାକ୍ସ ରଖିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଯାହାର ଯେ କୌଣସି ପ୍ରକାର ସମସ୍ୟା, ଆପତ୍ତି କିମ୍ବା ପରାମର୍ଶ ଥିବ ସେ ସଂକ୍ଷେପରେ ତାକୁ ଲିଖିତ ଆକାରରେ ଉକ୍ତ ବାକ୍ସରେ ପକାଇବାକୁ ଅନୁରୋଧ କରୁଛନ୍ତି। ନିର୍ବାଚନ ପରେ ପ୍ରାର୍ଥୀ ଜିତିଲେ କିମ୍ବା ହାରିଲେ ମଧ୍ୟ ସଂଗୃହୀତ ଅଭିଯୋଗଗୁଡ଼ିକର ତର୍ଜମା କରି ସେ ସବୁର ସମାଧାନ ଦିଗରେ ଉଦ୍ୟମ କରିବେ ବୋଲି ଶ୍ରୀ ସିହ୍ନା କହି ବୁଲୁଛନ୍ତି। ଏପରି ପ୍ରଚାରକୁ ନେଇ କୁରାଙ୍ଗଶାସନ ପଞ୍ଚାୟତର ଜନତାଙ୍କ ମଧ୍ୟରେ କୌତୁହଳ ସୃଷ୍ଟି ହୋଇଛି।