ବାଲିଯାତ୍ରାରେ ପୌର ନିଗମ ନେବ ଲାଇସେନ୍ସ, ହୋର୍ଡିଂ, ୟୁଜର୍ସ ଫି
ବର୍ଗଫୁଟ ପିଛା ୮ ଟଙ୍କା; ଉଠା ଦୋକାନୀ ଦେବେ ୨ଶହ ଟଙ୍କା
କଟକ: ବାଲିଯାତ୍ରାରେ ବ୍ୟବସାୟ କରିବାକୁ ଆସୁଥିବା ବ୍ୟବସାୟୀଙ୍କୁ ପୌର ନିଗମ ପକ୍ଷରୁ ଅସ୍ଥାୟୀ ଟ୍ରେଡ୍ ଲାଇସେନ୍ସ ପ୍ରଦାନ କରାଯିବ। ଏଥିପାଇଁ ବ୍ୟବସାୟୀଙ୍କୁ ଲାଇସେନ୍ସ ଫି ଦେବା ସହ ୟୁଜର ଫି, ହୋର୍ଡିଂ ଓ ବ୍ୟାନର ଲଗାଇବା ବାବଦରେ ଅର୍ଥ ଦେବାକୁ ହେବ। ଜିଲ୍ଲା ପ୍ରଶାସନ ପକ୍ଷରୁ ଚଳିତ ବାଲିଯାତ୍ରାରେ ନିଲାମ ପ୍ରକ୍ରିୟାରେ ଅଧିକ ଟଙ୍କାରେ ବ୍ୟବସାୟୀଙ୍କୁ ପ୍ଲଟ କିଣିବାକୁ ପଡ଼ୁଥିବା ବେଳେ ଏବେ ନିଗମର ବିଭିନ୍ନ ଫି ସେମାନଙ୍କ ପାଇଁ ଚିନ୍ତାର କରାଣ ହୋଇଛି। ପ୍ରତିବର୍ଷ ପରି ଚଳିତ ବର୍ଷ ପୌର ନିଗମ ଆଇନ ଅନୁଯାୟୀ ବାଲିଯାତ୍ରା ପଡ଼ିଆରେ ଷ୍ଟଲ ଦେଇଥିବା ବ୍ୟବସାୟୀଙ୍କୁ ଅସ୍ଥାୟୀ ଟ୍ରେଡ୍ ଲାଇସେନ୍ସ ପ୍ରଦାନ କରାଯିବ। ଏଥିପାଇଁ ବ୍ୟବସାୟୀଙ୍କୁ ଟ୍ରେଡ୍ ଲାଇସେନ୍ସ ଓ ୟୁଜର ଫି ଦେବାକୁ ପଡିବ। ଗୋଟିଏ ସ୍ଥାନରେ ବସି ବେପାର କରୁଥିବା ଦୋକାନୀଙ୍କୁ ବର୍ଗପୁଟ ପିଛା ଟ୍ରେଡ୍ ଲାଇସେନ୍ସ ବାବଦରେ ୫ ଟଙ୍କା ଓ ୟୁଜର ଫି ବାବଦରେ ୩ଟଙ୍କା ଦେବାକୁ ପଡ଼ିବ।
Sambad is now on WhatsApp
Join and get latest news updates delivered to you via WhatsApp
ଦୁଇଟି ଫି ବାବଦରେ ପ୍ରତ୍ୟେକ ଦୋକାନୀଙ୍କୁ ମୋଟ ୮ ଟଙ୍କା ଦେବାକୁ ହେବ। ଟ୍ରେଡ୍ ଲାଇସେନ୍ସ ଓ ୟୁଜର ଫି ବାବଦରେ ସର୍ବାଧିକ ଯଥାକ୍ରମେ ୧୫ ହଜାର ଓ ୫ ହଜାର ଟଙ୍କା ଦେବାକୁ ପଡ଼ିବ ବୋଲି ନିଗମ ପକ୍ଷରୁ ଜାରି କରାଯାଇ ଥିବା ଏକ ବିଜ୍ଞପ୍ତିରେ କୁହାଯାଇଛି। ସେହିପରି ଉଠା ଦୋକାନୀଙ୍କ ପାଇଁ ଲାଇସେନ୍ସ ବାବଦକୁ ଦେଢ ଶହ ଟଙ୍କା ଓ ୟୁଜର ଫି ବାବଦକୁ ୫୦ ଟଙ୍କା କରି ମୋଟ ୨ଶହ ଟଙ୍କା ଦେବାକୁ ହେବ। ବାଲିଯାତ୍ରାରେ ବିଜ୍ଞାପନ ପାଇଁ ବିଭିନ୍ନ ସ୍ଥାନରେ ହୋର୍ଡିଂ, ବ୍ୟାନର, ଗେଟ୍ ଆଦି କରିବାକୁ ହେଲେ ନିଗମକୁ ଫି ଦେବାକୁ ହେବ। ବିନା ଆଲୋକରେ ବକ୍ସ ଗେଟ୍ ପାଇଁ ୧୫ଶହ, ବକ୍ସ ଲାଇଟ୍ ଗେଟ୍ ପାଇଁ ୨ ହଜାର, ଫ୍ଲାଟ୍ ଗେଟ୍ ପାଇଁ ୧ ହଜାର ଟଙ୍କା ଫି ଦେବାକୁ ପଡ଼ିବ। ବ୍ୟାନର ଫାଇଁ ବର୍ଗଫୁଟକୁ ୩୦ଟଙ୍କା ଓ ବେଲୁନ ପାଇଁ ଦିନକୁ ୩ଶହ ଟଙ୍କା ବ୍ୟବସାୟୀ ଓ ବ୍ୟବସାୟୀ ପ୍ରତିଷ୍ଠାନଙ୍କୁ ଦେବାକୁ ହେବ। ନିଗମ ଦ୍ବାରା ଧାର୍ଯ୍ୟ ହୋଇଥିବା ଫି ନଦେଲେ ନିୟମ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନିଗମ ପକ୍ଷରୁ କୁହାଯାଇଛି।