ଆଚାର୍ଯ୍ୟ ହରିହର କର୍କଟ ଚିକିତ୍ସା କେନ୍ଦ୍ରରେ ନାହିଁ ପେଟ୍ ସିଟି ସ୍କାନ୍; ନିରାମୟରେ ମିଳୁ ନାହିଁ ଗୁରୁତ୍ବପୂର୍ଣ୍ଣ ଔଷଧ
ଗରିବ ଲୋକ ହନ୍ତସନ୍ତ; ହାଇକୋର୍ଟରେ ଜନସ୍ବାର୍ଥ ମାମଲା
କଟକ: ଆଚାର୍ଯ୍ୟ ହରିହର କର୍କଟ କେନ୍ଦ୍ର (ଆଚାର୍ଯ୍ୟ ହରିହର ପୋଷ୍ଟ ଗ୍ରାଜୁଏଟ୍ ଇନଷ୍ଟିଚ୍ୟୁଟ ଅଫ୍ କ୍ୟାନସର)ରେ ପେଟ୍ ସିଟି ସ୍କାନ୍ ମେସିନ୍ ନାହିଁ। ଫଳରେ କର୍କଟ ରୋଗୀମାନେ ବାହାରେ ଘରୋଇ ହସ୍ପିଟାଲ ଓ ପ୍ରତିଷ୍ଠାନରେ ଅଧିକ ଖର୍ଚ୍ଚାନ୍ତ ହୋଇ ପେଟ୍ ସିଟି ସ୍କାନ କରାଉଛନ୍ତି। ଦୁଇ ଦିନ ତଳେ ‘ସମ୍ବାଦ’ରେ ଏ ଖବର ବାହାରି ଥିବା ବେଳେ ଏଭଳି ଅଭିଯୋଗ ନେଇ ହାଇକୋର୍ଟରେ ଏକ ଜନସ୍ବାର୍ଥ ମାମଲା ଦାୟର ହୋଇଛି। କଟକର ଅନିତା ବୁଦ୍ଧିଆଙ୍କ ପକ୍ଷରୁ ଏ ନେଇ ଜନସ୍ବାର୍ଥ ଆବେଦନ ଦାୟର କରାଯାଇଛି। ଆବେଦନରେ ଦର୍ଶାଯାଇଛି ଯେ ଅନିତା ନିଜେ ଜଣେ କର୍କଟ ରୋଗୀ ହୋଇଥିବା ବେଳେ ଗତ ବର୍ଷ ତାଙ୍କର ରୋଗ ଚିହ୍ନଟ ହୋଇଥିଲା। ରାଜ୍ୟ ବାହାରେ ଚିକିତ୍ସିତ ହେବା ପରେ ସେ ନିଜ ସହର କଟକରେ ଅଚାର୍ଯ୍ୟ ହରିହର କର୍କଟ କେନ୍ଦ୍ରକୁ ଯାଇଥିଲେ। କିନ୍ତୁ ଏଠାରେ ପେଟ୍ ସିଟି ସ୍କାନ ନଥିବାରୁ ଘରୋଇ ପ୍ରତିଷ୍ଠାନରେ ଏହି ପରୀକ୍ଷା ତାଙ୍କୁ କରିବାକୁ ପଡିଥିଲା। ଗତ ବର୍ଷ ଚାରିଥର ସେ ପେଟ୍ ସିଟି ସ୍କାନ କରିଥିବା ବେଳେ ଏଥି ପାଇଁ ଲକ୍ଷାଧିକ ଟଙ୍କା ତାଙ୍କୁ ଦେବାକୁ ପଡିଥିଲା।
Sambad is now on WhatsApp
Join and get latest news updates delivered to you via WhatsApp
ପ୍ରତିଦିନ ଆଚାର୍ଯ୍ୟ ହରିହର କର୍କଟ କେନ୍ଦ୍ରକୁ ୫ଶହରୁ ଅଧିକ ରୋଗୀ ଚିକିତ୍ସା ପାଇଁ ଆସୁଥିବା ବେଳେ ପ୍ରାୟ ୨୫ରୁ ଅଧିକ ରୋଗୀଙ୍କୁ ପେଟ୍ ସିଟି ସ୍କାନ ପାଇଁ ପରାମର୍ଶ ଦିଆଯାଉଛି। ଶରୀର ଯେଉଁ ସ୍ଥାନରେ କର୍କଟ ରୋଗ ଚିହ୍ନଟ ହୋଇଥାଏ ତା ବାଦ ଅନ୍ୟ ସ୍ଥାନକୁ ଏହି ରୋଗ ବ୍ୟାପିଛି କି ନାହିଁ ସେ ନେଇ ପେଟ୍ ସିଟି ସ୍କାନରୁ ଜଣା ପଡୁଥିବା ବେଳେ ଅଧିକାଂଶ ରୋଗୀଙ୍କୁ ନିୟମିତ ଭାବେ ଏହି ପରୀକ୍ଷା କରିବାକୁ ପଡିଥାଏ। ରୋଗୀମାନଙ୍କୁ ଏହି ପରୀକ୍ଷା ପାଇଁ ଘରୋଇ ପ୍ରତିଷ୍ଠାନରେ ପ୍ରାୟ ୨୩ ହଜାର ଟଙ୍କା ଦେବାକୁ ପଡୁଛି। ଭୁବନେଶ୍ବରର ଏକ ଘରୋଇ ହସ୍ପିଟାଲ ସହିତ କଟକ ସହର ଓ ଉପକଣ୍ଠରେ ଥିବା ଦୁଇଟି ସ୍ବାସ୍ଥ୍ୟ ପ୍ରତିଷ୍ଠାନରେ ପେଟ୍ ସିଟି ସ୍କାନ ରହିଛି। ରୋଗୀଙ୍କୁ ଖର୍ଚ୍ଚାନ୍ତ ହୋଇ ଏହି ସବୁ ଘରୋଇ ପ୍ରତିଷ୍ଠାନରେ ପେଟ୍ ସିଟି ସ୍କାନ୍ କରିବାକୁ ପଡୁଛି। ଆଚାର୍ଯ୍ୟ ହରିହର କର୍କଟ କେନ୍ଦ୍ର ପୂର୍ବ ଭାରତର ପ୍ରମୁଖ କର୍କଟ ଚିକିତ୍ସା କେନ୍ଦ୍ର ହୋଇଥିବା ବେଳେ ସବୁ ଜିଲ୍ଲାରୁ ଓ ରାଜ୍ୟ ବାହାରୁ ରୋଗୀ ଏଠାକୁ ଆସୁଛନ୍ତି। ଏଭଳି ସ୍ଥିତିକୁ ଦୃଷ୍ଟିରେ ରଖି ବିଗତ ବର୍ଷ ଗୁଡିକରେ ଏହି କର୍କଟ ଚିକିତ୍ସା କେନ୍ଦ୍ରରେ ଶଯ୍ୟା ସଂଖ୍ୟା ବୃଦ୍ଧି କରାଯାଇଛି। ଭିତ୍ତିଭୂମିର ବିକାଶ ପାଇଁ ସରକାର ଶହ ଶହ କୋଟି ଟଙ୍କା ଖର୍ଚ୍ଚ କରୁଛନ୍ତି। ଚିକିତ୍ସା ପାଇଁ ଆଧୁନିକ ଯନ୍ତ୍ରପାତି କିଣା ଯାଉଛି। କିନ୍ତୁ କେଉଁ ପରିସ୍ଥିତିରେ ପେଟ୍ ସିଟି ସ୍କାନ ଭଳି ଜରୁରୀ ମେସିନ ବ୍ୟବସ୍ଥା କରାଯାଉ ନାହିଁ ତାକୁ ନେଇ ଆବେଦନକାରୀ ପ୍ରଶ୍ନ ଉଠାଇଛନ୍ତି।
ଗରିବ କର୍କଟ ରୋଗୀ ବାହାରେ ଖର୍ଚ୍ଚାନ୍ତ ହୋଇ ପେଟ୍ ସିଟି ସ୍କାନ କରିବା ସମ୍ଭବ ହେଉ ନଥିବା ବେଳେ ସେମାନଙ୍କ ମୃତ୍ୟୁ ହେବା ନିଶ୍ଚିତ। ଘରୋଇ ହସ୍ପିଟାଲ ଗୁଡିକୁ ସୁହାଇବାକୁ ଏପରି ସ୍ଥିତି ସୃଷ୍ଟି କରାଯାଇଛି। ଏଥି ସହିତ ଇନଡୋର୍ ଓ ଆଉଟଡୋର୍ ରୋଗୀଙ୍କୁ ମାଗଣା ଔଷଧ ପ୍ରଦାନ ପାଇଁ ସରକାରଙ୍କ ତରଫରୁ ନିରାମୟ କେନ୍ଦ୍ର ଖୋଲା ଯାଇଛି। କିନ୍ତୁ ଅନେକ ସମୟରେ ନିରାମୟରେ ଆବଶ୍ୟକ ଔଷଧ ମିଳୁ ନାହିଁ। ମୂଲ୍ୟବାନ ଓ ଗୁରୁତ୍ବପୂର୍ଣ୍ଣ ଔଷଧ ନିରାମୟରେ ନ ମିଳିବାରୁ ସାଧାରଣ ରୋଗୀ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ନିରାମୟ ଯେଉଁ ଉଦ୍ଦେଶ୍ୟ ରଖି ଖୋଲା ଯାଇଥିଲା ତାହା ପୂରଣ ହୋଇ ପାରୁ ନାହିଁ। ଏଭଳି ସ୍ଥିତିରେ ଆଚାର୍ଯ୍ୟ ହରିହର କର୍କଟ ଚିକିତ୍ସା କେନ୍ଦ୍ରରେ ପେଟ୍ ସିଟି ସ୍କାନ୍ ସହିତ ଏମଆରଆଇ ଓ ସିଟି ସ୍କାନ ଭଳି ମେସିନ୍ ବ୍ୟବସ୍ଥା ପାଇଁ ସରକାରଙ୍କୁ ନିର୍ଦ୍ଦେଶ ଦିଆଯାଉ। ନିରାମୟରେ୨ ୪ ଘଣ୍ଟା ସବୁ ପ୍ରକାରର ଔଷଧ ଯେପରି ମିଳିବ ତାହା ସୁନିଶ୍ଚିତ କରାଯାଉ ବୋଲି ଆବେଦନକାରୀ ଦର୍ଶାଇଛନ୍ତି। ମାମଲାରେ ରାଜ୍ୟ ସ୍ବାସ୍ଥ୍ୟ ସଚିବ, ଡିଏମଇଟି ଓ ଆଚାର୍ଯ୍ୟ ହରିହର କର୍କଟ ଚିକିତ୍ସା କେନ୍ଦ୍ର ନିର୍ଦ୍ଦେଶକଙ୍କୁ ପକ୍ଷଭୁକ୍ତ କରାଯାଇଛି। ଆବେଦନକାରୀଙ୍କ ପକ୍ଷରୁ ଆଇନଜୀବୀ ଅରୁଣ କୁମାର ବୁଦ୍ଧିଆ ମାମଲା ପରିଚାଳନା କରୁଛନ୍ତି।