ରଜ ମଉଜରେ ରାଜନୀତିର ମଜା

କଟକ: କଟକର ବିଭିନ୍ନ ଅନୁଷ୍ଠାନ ପକ୍ଷରୁ ଆୟୋଜିତ ରଜ ମହୋତ୍ସବ କାର୍ଯ୍ୟକ୍ରମ ଆଜି ସହରରେ ବିଭିନ୍ନ କାରଣରୁ ଚର୍ଚ୍ଚାର ପ୍ରସଙ୍ଗ ହୋଇଛି। ବିଶେଷ କରି କଟକ ପୌର ନିଗମ ପକ୍ଷରୁ ପ୍ରଥମ ଥର ପାଇଁ ଆୟୋଜିତ ରଜ ମହୋତ୍ସବ କାର୍ଯ୍ୟକ୍ରମରେ ଅନେକ ରୋଚକ ଆଉ ଚର୍ଚ୍ଚିତ ଦୃଶ୍ୟ ଦେଖିବାକୁ ମିଳିଛି। ବସ୍ତିର ଯୁବତୀ ମାନଙ୍କୁ ନେଇ ବିକାଶ ଭବନରେ ଆୟୋଜିତ ଏହି ରଜ ମହୋତ୍ସବ କାର୍ଯ୍ୟକ୍ରମରେ ମେୟର ସୁବାସ ସିଂହ ନିଜେ ଦୋଳିରେ ବସି ଝୁଲିବା ସହିତ ବାରବାଟୀ-କଟକ ବିଧାୟକ ଇଂଜିନିୟର ମହମ୍ମଦ ମୋକିମ୍ ଓ ଚୌଦ୍ବାର-କଟକ ବିଧାୟକ ସୌଭିକ ବିଶ୍ବାଳଙ୍କୁ ଦୋଳିରେ ବସାଇ ଝୁଲାଇବାର ଦୃଶ୍ୟ ଚର୍ଚ୍ଚାର ପ୍ରସଙ୍ଗ ହୋଇଛି।

Sambad

ଅନ୍ୟପଟେ ବିଧାୟକ ଶ୍ରୀ ମୋକିମ୍ ମେୟରଙ୍କୁ ପାନ ଖୁଆଇ ଦେବାର ଦୃଶ୍ୟ ବି ଆଲୋଚନାର ପ୍ରସଙ୍ଗ ହୋଇଛି। ଏହି କାର୍ଯ୍ୟକ୍ରମରେ ଅନେକ ମହିଳା କର୍ପୋରେଟର ଦୋଳି ଖେଳି ମଜା ନେବାର ଦୃଶ୍ୟ ବି ଦେଖିବାକୁ ମିଳିଛି। ଗୋଟିଏ ପଟେ ଏଭଳି କାର୍ଯ୍ୟକ୍ରମ ସହିତ ଅନ୍ୟପଟେ ଚାଉଳିଆଗଂଜରେ ଆୟୋଜିତ ରଜ ମହୋତ୍ସବ କାର୍ଯ୍ୟକ୍ରମରେ ବାରବାଟୀ-କଟକ ବିଧାୟକ ଇଂଜିନିୟର ମହମ୍ମଦ ମୋକିମ୍ ଦୋଳିରେ ଝୁଲିବା ଦେଖିବାକୁ ମିଳିଛି। ଚୌଦ୍ବାର-କଟକ ଅଞ୍ଚଳରେ ବାରବାଟୀ-କଟକ ବିଧାୟକଙ୍କ ଦୋଳି ଖେଳ ଅନେକ କାରଣରୁ ଚର୍ଚ୍ଚାର ଖୋରାକ ଯୋଗାଇଛି। କିନ୍ତୁ ପୂର୍ବତନ ବିଧାୟକ ଦେବାଶିଷ ସାମନ୍ତରାୟ ଅଥବା ପ୍ରଭାତରଂଜନ ବିଶ୍ବାଳଙ୍କୁ କେଉଁଠି ଦୋଳିରେ ବସି ଝୁଲିବା ଦେଖିବାକୁ ମିଳି ନାହିଁ।