ରେଳ ଧାରଣାରୁ ଦୁଇ ମହିଳା ଓ ଶିଶୁପୁତ୍ର ଉଦ୍ଧାର
ଉଭୟ ଘଟଣାରେ ସ୍ବାମୀଙ୍କ ଚରିତ୍ରକୁ ସନ୍ଦେହ କରି କରୁଥିଲେ ଆତ୍ମହତ୍ୟା ଉଦ୍ୟମ
କଟକ: ଦୁଇଟି ଭିନ୍ନ ଘଟଣାରେ ରେଳ ଧାରଣାରେ ଶୋଇ ଆତ୍ମହତ୍ୟା ଉଦ୍ୟମ କରିଥିବା ଦୁଇ ଜଣ ମହିଳାଙ୍କୁ ଆରପିଏଫ୍ ପୁଲିସ ଉଦ୍ଧାର କରିଛି। ଜଣେ ମହିଳାଙ୍କ ସହିତ ଗୋଟିଏ ଶିଶୁପୁତ୍ରକୁ ବି ଉଦ୍ଧାର କରାଯାଇଛି। ଦୁଇଟି ଘଟଣା ଭିତରେ କୌଣସି ସଂପର୍କ ନଥିଲେ ବି ଆତ୍ମହତ୍ୟା ଉଦ୍ୟମର କାରଣ କିନ୍ତୁ ସମାନ ରହିଛି। ପ୍ରେମ ବିବାହ କରିଥିବା ଦୁଇ ଜଣଯାକ ମହିଳା ସେମାନଙ୍କ ସ୍ବାମୀଙ୍କ ଚରିତ୍ରକୁ ସନ୍ଦେହ କରି ଏଭଳି ଆତ୍ମହତ୍ୟା ପାଇଁ ପଦକ୍ଷେପ ନେଇଥିବା କୁହାଯାଇଛି। ସୂଚନା ଅନୁଯାୟୀ, କଟକ ନିଆଳିର ଅଧ୍ୟାପକ ଦମ୍ପତି ଭୁବନେଶ୍ବରରେ ଦୁଇଟି ଘରୋଇ ଇଞ୍ଜିନିୟରିଂ କଲେଜରେ ଚାକିରି କରନ୍ତି। ଗଲା ୩ ବର୍ଷ ହେବ ଉଭୟଙ୍କ ପ୍ରେମ ସମ୍ପର୍କ ଥିବା ବେଳେ ୭ ମାସ ତଳେ ସେମାନେ ବିବାହ କରିଥିଲେ। କିନ୍ତୁ ବିବାହ ପରେ ସ୍ବାମୀଙ୍କ ଚରିତ୍ରକୁ ସନ୍ଦେହ କରି ନିୟମିତ ସେମାନଙ୍କ ମଧ୍ୟରେ କଳହ ଲାଗି ରହୁଥିଲା। ଆଜି ଅଧ୍ୟାପିକା ପତ୍ନୀ ବସରେ କଟକ ଚାଲି ଆସିଥିଲେ। କଟକରେ ପହଞ୍ଚି ରାତି ପ୍ରାୟ ୭ଟା ୨୦ ବେଳେ ଆରପିଏଫ୍ ଥାନା ପଛପଟ ରେଳ ଧାରଣାରେ ଆତ୍ମହତ୍ୟା କରିବାକୁ ଶୋଇପଡ଼ିଥିଲେ। ଆରପିଏଫ୍ ପୁଲିସ କର୍ମଚାରୀ ପାଟ୍ରୋଲିଂ କରୁଥିବା ବେଳେ ମହିଳା ଜଣକ ରେଳ ଧାରଣାରେ ଶୋଇଥିବା ଦେଖିବାକୁ ପାଇ ତାଙ୍କୁ ଉଦ୍ଧାର କରି ଥାନାକୁ ଆଣିଥିଲେ। ମହିଳାଙ୍କ ପରିବାର ଲୋକଙ୍କୁ ଏ ସଂକ୍ରାନ୍ତରେ ପୁଲିସ ପକ୍ଷରୁ ଖବର ଦିଆଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ଅନ୍ୟ ଏକ ଘଟଣାରେ ବ୍ରହ୍ମପୁରର ଜଣେ ମହିଳା କେନ୍ଦ୍ରାପଡ଼ାର ଜଣେ ସୁପରଭାଇଜରଙ୍କୁ ପ୍ରେମ ବିବାହ କରିଥିଲେ। ଉଭୟ ପରିବାର ସଦସ୍ୟ ଏହି ବିବାହକୁ ଗ୍ରହଣ କରୁ ନଥିବା ବେଳେ ସେମାନେ ପରିବାର ଲୋକଙ୍କ ବିରୋଧରେ ଯାଇ ବାହା ହୋଇଥିଲେ। ସୁପରଭାଇଜରଙ୍କ ସହିତ ମହିଳା ଜଣକ ମଙ୍ଗଳାବାଗରେ ଏକ ଘର ଭଡ଼ା ନେଇ ରହୁଥିଲେ। ଗଲା ୨୫ ଦିନ ତଳେ ମହିଳାଙ୍କର ଏକ ଶିଶୁପୁତ୍ର ଜନ୍ମ ହୋଇଥିଲା। କିନ୍ତୁ ସୁପରଭାଇଜର ସ୍ବାମୀ ଅନ୍ୟ ଜଣେ ମହିଳାଙ୍କ ସହିତ ଅନୈତିକ ସମ୍ପର୍କ ରଖୁଥିବା ସନ୍ଦେହରେ ମହିଳା ଜଣକ ତାଙ୍କ ସ୍ବାମୀଙ୍କୁ ବିରୋଧ କରୁଥିଲେ। ଏହି ଘଟଣାକୁ କେନ୍ଦ୍ର କରି ଦମ୍ପତିଙ୍କ ମଧ୍ୟରେ କଳହ ଲାଗି ରହିଥିଲା। ଗତକାଲି ରାତି ପ୍ରାୟ ୭ଟା ବେଳେ ମହିଳା ଜଣକ ଘରୁ ବାହାରି ଆସିଥିଲେ। ରାତି ପ୍ରାୟ ୧୦ଟା ବେଳେ ରେଳ ଧାରଣାର ୨ ନମ୍ବରର ରୁଟ୍ରେ ନବଜାତ ଶିଶୁ ସହିତ ଆତ୍ମହତ୍ୟା ପାଇଁ ବସି ରହିଥିଲେ। ଏହି ସମୟରେ ରେଳ ଧାରଣା ନିକଟରେ ଏସଆଇ ରୋଜି ମହାନନ୍ଦ, ଏଏସଆଇ ସ୍ମୃତି ରଞ୍ଜନ ସାହୁ ଏବଂ ଅନ୍ୟ ପୁଲିସ କର୍ମଚାରୀ ପାଟ୍ରୋଲିଂ କରୁଥିବା ବେଳେ ମହିଳାଙ୍କୁ ଦେଖି ତାଙ୍କୁ ଉଦ୍ଧାର କରିଥିଲେ। ଆରପିଏଫ୍ କର୍ମଚାରୀଙ୍କ ଠିକଣା ସମୟରେ ପଦକ୍ଷେପ ଯୋଗୁଁ ଦୁଇ ମହିଳା ଓ ଜଣେ ଶିଶୁର ଜୀବନ ବର୍ତ୍ତି ଯାଇଛି ବୋଲି ଥାନା ଆଇଆଇସି ଅନିଲ କୁମାର ସିଂହ ସୂଚନା ଦେଇଛନ୍ତି।