କଟକରେ ଦିବ୍ୟାଙ୍ଗ ଓ ବରିଷ୍ଠ ନାଗରିକଙ୍କ ପାଇଁ ବିଶେଷ ବ୍ୟବସ୍ଥା
ଫୋନ୍ କଲେ କୋଭିଡ୍ ଟିକା ଓ ପରୀକ୍ଷା ପାଇଁ ଘରେ ପହଞ୍ଚିବ ସିଏମ୍ସି ଗାଡି; ଟିକା ପାଇଁ ୯୭୭୭୦୬୭୨୯୭; ପରୀକ୍ଷା ପାଇଁ ୭୨୦୫୩୩୭୨୧୭
କଟକ: ବସ୍ତିରେ ରହୁଥିବା ଯୁବକ ଯୁବତୀଙ୍କ ପାଇଁ ସ୍ବତନ୍ତ୍ର ଟିକାକରଣ ଅଭିଯାନ ଆରମ୍ଭ କରି କଟକ ମହାନଗର ନିଗମ କର୍ତ୍ତୃପକ୍ଷ ଏକ ଅଭିନବ ପଦକ୍ଷେପ ନେଇଥିବା ବେଳେ ଏବେ ଦିବ୍ୟାଙ୍ଗ ଓ ୭୦ ବର୍ଷରୁ ଅଧିକ ବୟସ୍କଙ୍କ ପାଇଁ କୋଭିଡ୍ ଟିକା ପ୍ରଦାନ ଓ କୋଭିଡ୍ ପରୀକ୍ଷା ପାଇଁ ବିଶେଷ ବ୍ୟବସ୍ଥା ଗ୍ରହଣ କରିଛନ୍ତି। ସେମାନଙ୍କୁ ସେମାନଙ୍କ ଘରେ ଯାଇ ଟିକା ଦେବା ଓ କରୋନା ପରୀକ୍ଷା କରିବାର ବ୍ୟବସ୍ଥା କରାଯାଇଛି। ଏଥିପାଇଁ ନିଗମ ପକ୍ଷରୁ ଗାଡ଼ିରେ କୋଭିଡ୍-୧୯ ଟିକାକରଣ ଓ କରୋନା ପରୀକ୍ଷା କରିବାର ବ୍ୟବସ୍ଥା ହୋଇଛି। ବହୁ ପୂର୍ବରୁ ଦିବ୍ୟାଙ୍ଗ ଓ ବରିଷ୍ଠ ନାଗରିକଙ୍କ ପାଇଁ ଏହି ସୁବିଧା କରିବାକୁ ଦାବି ହୋଇ ଆସୁଥିବା ବେଳେ ଏବେ ସିଏମସି ପକ୍ଷରୁ ଏହାକୁ କାର୍ଯ୍ୟକାରୀ କରାଯାଇଛି। ନିଗମର ବିଭିନ୍ନ ୱାର୍ଡରେ ଥିବା ଦିବ୍ୟାଙ୍ଗ ବ୍ୟକ୍ତି ଓ ୭୦ ବର୍ଷରୁ ଅଧିକ ବୟସ୍କଙ୍କ ନିକଟରେ କୋଭିଡ୍ ଟିକା ଦେବା ଓ କୋଭିଡ୍ ପରୀକ୍ଷା କରିବା ପାଇଁ ସିଏମସିର ଗାଡ଼ି ପହଞ୍ଚିବ।
Sambad is now on WhatsApp
Join and get latest news updates delivered to you via WhatsApp
ନିଗମ ପକ୍ଷରୁ ଦିଆଯାଇଥିବା ଫୋନ୍ ନମ୍ବରରେ ବ୍ୟକ୍ତିଙ୍କ ନାମ, ୱାର୍ଡ ନମ୍ବର, ସଂପୂର୍ଣ୍ଣ ଠିକଣା, ଆଧାର ନମ୍ବର, ଫୋନ ନମ୍ବର ଦେବାକୁ କୁହାଯାଇଛି। କୋଭିଡ୍ ଟିକା ପାଇଁ ୯୭୭୭୦୬୭୨୯୭ ଫୋନ୍ ନମ୍ବର ଓ କରୋନା ପରୀକ୍ଷା ପାଇଁ ୭୨୦୫୩୩୭୨୧୭ ନମ୍ବର ରହିଛି। ସୋମବାର ଠାରୁ ଶୁକ୍ରବାର ପର୍ଯ୍ୟନ୍ତ ସକାଳ ୧୦ଟାରୁ ଅପରାହ୍ନ ୩ଟା ମଧ୍ୟରେ ଉକ୍ତ ନମ୍ବରରେ ଫୋନ୍ କରିବାକୁ କୁହାଯାଇଛି। ଫୋନ କରି ନାମ ପଞ୍ଜୀକରଣ କରିବା ପରେ ଟିକା ଓ ପରୀକ୍ଷା ପାଇଁ ସିଏମ୍ସି ପକ୍ଷରୁ ତାରିଖ ଓ ସମୟ ବିଷୟରେ ସୂଚନା ଦିଆଯିବ ବୋଲି କୁହାଯାଇଛି।