ତତ୍କାଳ ରେଳ ଟିକଟର ଚୋରା କାରବାର : ଧରାପଡ଼ିଲା ଦଲାଲ, ୨୫ ଟିକଟ ଜବତ
କଟକ: ତତ୍କାଳ ରେଳ ଟିକଟ୍ ଚୋରା କାରବାର କରୁଥିବା ଜଣେ ଦଲାଲକୁ ଆରପିଏଫ୍ ପୁଲିସ ଗିରଫ କରିଛି। ଅଭିଯୁକ୍ତ ଜଣକ ସେକ୍ ଗୁଫରନ ଉଦ୍ଦିନ(୨୭)। ନିଶ୍ଚିନ୍ତକୋଇଲି ସୁକରପଡ଼ାର ଗୁଫରନ୍ ଗଲା ୫ ବର୍ଷ ହେବ ସାଲେପୁର କଟିକଟା ବଜାରରେ ଗୁଫରନ୍ କମ୍ୟୁନିକେସନ୍ ନାଁରେ ଦୋକାନ ଖୋଲିଥିଲା। ଏକାଧିକ ୟୁଜର ଆଇଡି ଓ ପାସଓ୍ବାର୍ଡ ବ୍ୟବହାର କରି ତତକାଳ ଟିକଟ୍ କିଣି ସ୍ଥାନୀୟ ଅଞ୍ଚଳରେ ବିକ୍ରି କରିଆସୁଥିଲା। ଏହି ଦୋକାନରେ ଚଢ଼ଉ କରି ଆରପିଏଫ୍ ୨୫ଟି ଟିକଟ, ୨ଟି ମୋବାଇଲ୍ ଫୋନ, ହାର୍ଡ ଡିସ୍କ ଜବତ କରିଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, କଟିକଟା ବଜାରରେ ଦୋକାନ ଖୋଲି ଏଭଳି ଚୋରା କାରବାର ଗୁଫରନ ଚଳାଇଥିବା ସଂକ୍ରାନ୍ତରେ ଦିଲ୍ଲୀ ରେଳବାଇ କାର୍ଯ୍ୟାଳୟରୁ ଗୁଇନ୍ଦା ତଥ୍ୟ ମିଳିଥିଲା। ସେହି ଆଧାରରେ ୨୮ ତାରିଖ ରାତିରେ ଆରପିଏଫ୍ ପୁଲିସ ଏବଂ ଭୁବନେଶ୍ବର ରେଳବାଇର ସାଇବର୍ ସେଲ୍ କଟିକଟାରେ ଥିବା ଦୋକାନରେ ମିଳିତ ଚଢ଼ଉ କରିଥିଲା। ଦୋକାନରୁ ତତ୍କାଳ ଟିକଟ ବି ଜବତ ହୋଇଥିଲା। ଆଇଆରସିଟିସି ଓ୍ବେବସାଇଟରୁ ତତ୍କାଳ ଟିକଟ ବୁକ୍ କରିବାକୁ ରିଅଲ୍ ମ୍ୟାଙ୍ଗୋ ନାମରେ ଏକ ସଫଟଓୟାର ସେ ବ୍ୟବହାର କରୁଥିଲା।
ଏହି ସଫଟଓୟାର ମାଧ୍ୟମରେ ବେଆଇନ ଭାବେ ଅନଲାଇନରେ ଟିକଟ ବୁକ୍ ହେଉଥିବାରୁ ହାର୍ଡ ଡିସ୍କର ଯାଞ୍ଚ ପାଇଁ ଲାବ୍ରୋଟୋରିକୁ ପଠାଇ ଦିଆଯାଇଛି। ଗୁରଫନ୍ ପ୍ରତି ତତ୍କାଳ ଟିକଟକୁ ୨୦୦ ଟଙ୍କା ଅଧିକ ମୂଲ୍ୟରେ ବିକ୍ରି କରିଆସୁଥିବା ତଦନ୍ତରୁ ଜଣାପଡ଼ିଛି। ଗୁଫରନକୁ ଗିରଫ ପରେ ତାକୁ ସାଲେପୁର ଜେଏମଏଫସିଙ୍କ କୋର୍ଟରେ ହାଜର କରାଯାଇ କୋର୍ଟ ଚାଲାଣ କରାଯାଇଛି। ଚଢ଼ଉରେ ଆରପିଏଫ୍ ଆଇଆଇସି ପ୍ରବୀଣ କୁମାରଙ୍କ ସମେତ ଏଆଇ ପ୍ରଶାନ୍ତ କୁମାର ପରିଡ଼ା, ଏଆଇ ପୂର୍ଣ୍ଣଚନ୍ଦ୍ର ପଣ୍ଡା, ଭୁବନେଶ୍ବର ସାଇବର୍ ସେଲ ଏସଆଇ ମନନ ପାଣ୍ଡେ ପ୍ରମୁଖ ସାମିଲ ହୋଇଥିଲେ।