ଟ୍ରକ୍ ଧକ୍କାରେ ସାଇକେଲ ଆରୋହୀ ମୃତ

କୋମନା: ନୂଆପଡ଼ା ଜିଲ୍ଲା କୋମନା ଥାନା ଭେଳାସ୍ଥିତ ବିଜୁ ଏକ୍ସପ୍ରେସ୍‌ ୱେରେ ସୋମବାର ପୁଣି ଏକ ସଡ଼କ ଦୁର୍ଘଟଣା ଘଟିଛି। ଟ୍ରକ୍‌ ଧକ୍କାରେ ସାଇକେଲ ଆରୋହୀ ଧର୍ମୁ ଆଡ଼ବଙ୍ଗ (୬୧ବର୍ଷ)ଙ୍କ ମୃତ୍ୟୁ ଘଟିଛି। କୋମନା ଥାନା ସନବାହାଲି ଗାଁର ଧର୍ମୁ କୌଣସି କାମରେ ସାଇକଲ ଯୋଗେ ଭେଳା ଗ୍ରାମକୁ ଯାଉଥିଲେ। ଭେଳା ନିକଟରେ ବିପରୀତ ଦିଗରୁ ଆସୁଥିବା ଏକ ଟ୍ରକ‌୍ (ଓଆର୍ ୦୮ ଜି ୮୨୧୮) ତାଙ୍କୁ ଧକ୍କା ଦେଇଥିଲା।

ସେହି ସମୟରେ ଏହି ରାସ୍ତା ଦେଇ ବୋଡ଼େନ ଯାଉଥିବା ନୂଆପଡ଼ା ଜିଲ୍ଲାପାଳ ହେମକାନ୍ତ ସାଏ ଅଟକିଥିଲେ। ତୁରନ୍ତ ଆମ୍ବୁଲାନ୍ସ ଓ ଅଗ୍ନିଶମ ବିଭାଗକୁ ଯୋଗାଯୋଗ କରି ଚିକିତ୍ସା ପାଇଁ ତାଙ୍କୁ ନୂଆପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ହେଲେ ସେଠାରେ ଧର୍ମୁଙ୍କୁ ଡାକ୍ତର ମୃତ ଘୋଷଣା କରିଥିଲେ। କୋମନା ପୁଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣା ଘଟାଇଥିବା ଗାଡ଼ିକୁ ଜବତ କରିବା ସହ ଡ୍ରାଇଭରଙ୍କୁ ଅଟକ ରଖି ତଦନ୍ତ କରୁଛି। ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା କୋମନା ପୁଲିସ ପକ୍ଷରୁ ସୂଚନା ମିଳିଛି।