ରାୟଗଡା: କାମରେ ଲାଗୁନି ରାୟଗଡା ଜିଲ୍ଲା ସିଲ୍ଟିଗୁଡା ଡ୍ୟାମ୍। ରକ୍ଷଣବେକ୍ଷଣ ଅଭାବ ସାଙ୍ଗକୁ ତଳମୁଣ୍ଡ କେନାଲ ଭାଙ୍ଗିରୁଜି ଯାଇ ପାଣି ନଆସିବାରୁ ପାଣି ଟୋପାଏ ପାଇପାରୁ ନାହାନ୍ତି ଚାଷୀ। ଚାଷବାଷ ବନ୍ଦ ହୋଇ ଜମି ପଡିଆ ପଡିଥିବା ଯୋଗୁଁ ଚାଷୀ ମହଲରେ ଅସନ୍ତୋଷ ଦେଖାଦେଇଥିବା ବେଳେ ଶୀଘ୍ର କେନାଲ ମରାମତି କରି ପାଣି ଯୋଗାଇବାକୁ ଚାଷୀ ମହଲରେ ଦାବି ହୋଇଛି। ଏହି ଡ୍ୟାମରେ ପାଣି ଅଛି, ହେଲେ ଚାଷୀଙ୍କ କାମରେ ଲାଗୁନି।ଗୋଟିଏ ଗାଁର ଲୋକଙ୍କୁ ଛାଡିଦେଲେ ବାକି ଗାଁ ଲୋକେ ଜଳସେଚନ ସୁବିଧା ପାଇ ପାରୁ ନାହାନ୍ତି। ଏପରିକି ଡ୍ୟାମ୍‌ର କଡକୁ ଲାଗି ରହିଥିବା ଜମିଗୁଡିକରେ ପାଣି ନ ମାଡିବାରୁ ଚାଷବାଷ ନହୋଇ ପଡି ରହିଛି।

Advertisment

ଦୀର୍ଘଦିନ ଧରି କେନାଲ ଗୁଡିକ ରକ୍ଷଣବେକ୍ଷଣ ନହାବାରୁ କେତେକ ପୋତି ହୋଇ ପଡିଥିବା ବେଳେ ଅନେକ କେନାଲ ଭାଙ୍ଗିରୁଜି ଯିବାକୁ ବସିଲାଣି। ପାଣି ନଆସିବାରୁ କେନାଲ ଗୁଡିକ ଶୁଖିଲା ହୋଇ କୃତ୍ରିମ ଜଙ୍ଗଲ ସୃଷ୍ଟି ହୋଇଗଲାଣି। ଡ୍ୟାମ୍‌ରୁ ପାଣି କୁଆଡେ ଯାଉଛି କେହିବି ଜାଣି ପାରୁନାହାନ୍ତି। ଚାଷୀ ପାଣି ନପାଇ ଜଳକର ବର୍ଷକୁ ବର୍ଷ ବାନ୍ଧୁଥିବା ବେଳେ ବର୍ଷ ତମାମ କେନାଲରେ ଜଳ ନଆସିବାରୁ ଚାଷୀ ବାର୍ଷା ଦିନେ ବର୍ଷା ପାଣି ଉପରେ ଭରସା କରି କପା, ମାଣ୍ଡିଆ ଓ ମକା ଭଳି ଚାଷ କରୁଥିବା ବେଳେ ଅନ୍ୟ ଦିନମାନଙ୍କରେ ପାଣି ନମିଳିବାରୁ ଜମି ଶୁଖିଲା ପଡୁଥିବା ଚାଷୀ ଅଭିଯୋଗ କରିଛନ୍ତି। ବିଭାଗୀୟ ଅଧିକାରୀଙ୍କ ଠାରୁ ଆରମ୍ଭ କରି ନେତା ମନ୍ତ୍ରୀ ସମସ୍ତଙ୍କ ନିକଟରେ ଚାଷୀ ଯେତେ ଅଭିଯୋଗ କଲେବି କୌଣସି ସମସ୍ୟାର ସମାଧାନ ହଉନଥିବା ଚାଷୀ ସୁନ୍ଦୁରୁ ବେନିଆ ଓ ଆନନ୍ଦ ରାଓ ଅଭିଯୋଗ କରିଛନ୍ତି। ଯଥାଶୀଘ୍ର କେନାଲ ମରାମତି କରି ତାଙ୍କୁ ପାଣି ଯୋଗାଇଦେଲେ ସେମାନେ ବର୍ଷକ ବାରମାସ ବିଭିନ୍ନ ପ୍ରକାର ଚାଷ ସହ ପନିପରିବା ଚାଷ କରି ଲାଭବାନ ହେବେ।

publive-image Sambad

ଏଥିସହ ନିଜ ପରିବାର ପ୍ରତିପୋଷଣ କରିପାରିବେ ବୋଲି ଚାଷି ଆକୁଳ ନିବେଦନ କରିଛନ୍ତି। ଚାଷୀଙ୍କୁ ଜଳସେଚନର ସୁବିଧା ଯୋଗାଇଦେବାର ଲକ୍ଷ ନେଇ ଗତ ୧୯୮୯-୯୦ ମସିହାରେ କୋଟି କୋଟି ଟଙ୍କା ବ୍ୟୟରେ ତିଆରି ହୋଇଥିଲା ସିଲ୍ଟିଗୁଡା କ୍ଷୁଦ୍ର ଜଳସେଚନ ପ୍ରକଳ୍ପ। ସିଲ୍ଟିଗୁଡା, ଦେବଦଳା, କୁଲଜିଂ, ଖଲିଗୁଡା, ଭାକୁରୁଗୁଡା ଭଳି ଗ୍ରାମର ପ୍ରାୟ ୧୨ ଶହ ହେକ୍ଟର ଚାଷ ଜମିରେ ପାଣି ଯୋଗାଇବା ପାଇଁ ଲକ୍ଷ ରହିଥିଲା। କିନ୍ତୁ ଉକ୍ତ ପ୍ରକଳ୍ପର ଜଳ ଧାରଣର କ୍ଷମତା ହରାଇଥିବାରୁ ତଳ ମୁଣ୍ଡରେ ଥିବା ପ୍ରାୟ ୯ ଶହ ହେକ୍ଟର ଚାଷ ଜମିକୁ ଜଳ ସେଚିତ ହୋଇପାରୁ ନାହିଁ। ଫଳରେ ଜମି ପଡିଆ ପଡିବା ଫଳରେ ଅନେକ  କୃଷକ ପରିବାରର ଜୀବନ ଜୀବିକା ବିପନ୍ନ ହୋଇପଡିଛି। ଜଳସେଚନ ବିବାଗ ଉକ୍ତ ପ୍ରକଳ୍ପକୁ ପୁନରୁଦ୍ଧାର ପାଇଁ ଉଦ୍ୟମ ନକରି କେବଳ ସୌନ୍ଦର୍ଯ୍ୟ କରଣ ନାମରେ ଲକ୍ଷ ଲକ୍ଷ ଟଙ୍କା ଖର୍ଚ କରୁଛନ୍ତି ତାହା କେତେଦୂର ଯୁକ୍ତିଯୁକ୍ତ ବୋଲି ଚାଷୀ ଅଭିଯୋଗ କରିଛନ୍ତି। ବିଭାଗ ଏହାର ତୁରନ୍ତ ମରାମତି କରି ଚାଷୀଙ୍କ ପାଇଁ ଉପଯୋଗୀ କରାଯିବ ବୋଲି କହୁଥିବା ବେଳେ ଅନ୍ୟଦିଗରେଏକ ବିଶେଷଜ୍ଞ ଦଳକୁ ନେଇ ପରିକ୍ଷା କରାଯିବା ସହିତ ସରକାରଙ୍କ ସହ ଆଲୋଚନା କରି ଚାଷୀ କିପରି ଯଥାଶୀଘ୍ର ପାଣି ପାଇ ପାରିବେ ସେଥିପ୍ରତି ଦୃଷ୍ଟି ଦେବେ ବୋଲି ରାୟଗଡା ବିଧାୟକ ମକରନ୍ଦ ମୁଦୁଲି ପ୍ରକାଶ କରିଛନ୍ତି।