ଚାଲିଛି ଦଣ୍ଡଯାତ୍ରା: ଜମୁଛି ମୟୂରପୁଚ୍ଛ ବେପାର, ବନ୍ଦ ହେଲା ଗାଲେରୀର ମେରୁଯାତ୍ରା

କରୋନା ମହାମାରୀର ଦ୍ବିତୀୟ ଲହରର ପ୍ରାଦୁର୍ଭାବ ବୃଦ୍ଧି ପାଇବାରେ ଲାଗିଛି। ସମ୍ଭାବ୍ୟ ପରିସ୍ଥିତିକୁ ନଜର‌ରେ ରଖି ପ୍ରଶାସନ ପକ୍ଷରୁ ସମସ୍ତ କଟକଣାକୁ ବି କଡ଼ାକଡ଼ି କରାଯାଇଛି। ଏଭଳି ପରିସ୍ଥିତିରେ ଗଞ୍ଜାମ ଜିଲ୍ଲାର ପ୍ରସିଦ୍ଧ ଦଣ୍ଡଯାତ୍ରାକୁ ୨୫ଜଣ ଦଣ୍ଡୁଆଙ୍କ ମଧ୍ୟରେ ସୀମିତ ରଖାଯାଇଛି। ତଥାପି ଭକ୍ତଙ୍କ ପ୍ରବଳ ଭିଡ଼ ଆଶଙ୍କାରେ ଚଳିତବର୍ଷ ଭଞ୍ଜନଗର ବ୍ଲକ୍ ଗାଲେରୀ ଗ୍ରାମର ପ୍ରସିଦ୍ଧ ମେରୁଯାତ୍ରାକୁ ବନ୍ଦ ରଖିବା ଲାଗି ନିଷ୍ପତ୍ତି ନିଆଯାଇଛି। ପ୍ରଶାସନ, ପୁଲିସ୍‌ ଓ ଯାତ୍ରା କମିଟିର ମିଳିତ ବୈଠକରେ ଏଭଳି ଏକ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇଥିବା ସୂଚନା ମିଳିଛି।
ଚଳିତବର୍ଷ ପ୍ରଶାସନର କଟକଣା ସତ୍ତ୍ବେ ଗାଲେରୀ ଦଣ୍ଡଯାତ୍ରାର ପ୍ରଥମ ଦିନରେ ବିଭିନ୍ନ ଗ୍ରାମରୁ ସହସ୍ରାଧିକ ଲୋକଙ୍କ ଭିଡ଼ ଜମିଥିଲା। ବିଭିନ୍ନ ରୀତିନୀତି ଓ ପୂଜାର୍ଚ୍ଚନା ଦେଖିବାକୁ ଗ୍ରାମବାସୀ ରୁଣ୍ଡ ହୋଇଯାଇଥିଲେ। ଆସନ୍ତା ୧୩ ତାରିଖରେ ମେରୁ ଯାତ୍ରାରେ ଶ୍ରଦ୍ଧାଳୁଙ୍କ ଭିଡ଼ ଜମିବା ଆଶଙ୍କା ଥିବାରୁ ଚଳିତବର୍ଷ ଏହାକୁ ବନ୍ଦ ରଖିବା ଲାଗି ସ୍ଥିର ହୋଇଛି। ଗାଲେରୀ ଦଣ୍ଡକାଳୀ ପ୍ରତ୍ୟକ୍ଷ ‌ଠାକୁରାଣୀ ଭାବେ ଶ୍ରଦ୍ଧାଳୁ ମାନଙ୍କ ଭାବାବେଗ ସହିତ ଜଡ଼ିତ ରହିଥିବାରୁ ମେରୁଯାତ୍ରା ଦିନ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଥାଏ। ତାକୁ ଦୃଷ୍ଟିରେ ରଖି ମନ୍ଦିର ମଧ୍ୟରେ ହିଁ ମେରୁଯାତ୍ରା ରୀତିନୀତି ଭିତରେ ସମ୍ପନ୍ନ ହେବ। ପାଟ ଦଣ୍ଡୁଆଙ୍କୁ ୨୧ ଗରା ପାଣି ମାଠିଆ ‌ଗାଧୋଇବା, ଆମ୍ବ ଫୋପଡ଼ା ଓ ଅଗ୍ନିକୁ ଶାନ୍ତ କରିବା ଭଳି କାର୍ଯ୍ୟକ୍ରମ ହାତଗଣତି ଭୁକ୍ତାଙ୍କୁ ନେଇ ଆୟୋଜନ ହେବ। ଯାତ୍ରା ଦିନ ବାହାର ଶ୍ରଦ୍ଧାଳୁଙ୍କୁ ଗ୍ରାମକୁ ‌ଆସିବା ଉପରେ ସଂପୂର୍ଣ୍ଣ ବାରଣ କରାଯାଇଛି। ବର୍ତ୍ତମାନ କୋଭିଡ ନିୟମ ଅନୁଯାୟୀ କେବଳ ଗ୍ରାମ ଭିତରେ ହିଁ ଦଣ୍ଡଯାତ୍ରା ସମ୍ପନ୍ନ ହେଉଥିବା ସୂର୍ଯ୍ୟନାରାୟଣ ଶତପଥୀ ପ୍ରକାଶ କରିଛନ୍ତି।