କେନ୍ଦୁଝର: ଜଙ୍ଗଲରୁ ଯୁବତୀଙ୍କ ଅର୍ଦ୍ଧନଗ୍ନ ମୁଣ୍ଡବିହୀନ ଗଳିତ ମୃତଦେହ ଉଦ୍ଧାର

କେନ୍ଦୁଝର: କେନ୍ଦୁଝର ଜିଲ୍ଲା ସଦର ଥାନା ଅନ୍ତର୍ଗତ ତାନକୁଳି ଘାଟି ନିକଟସ୍ଥ ବାସୁଦେବପୁର ଜଙ୍ଗଲରୁ ସୋମବାର ଅପରାହ୍ନରେ ଜଣେ ଯୁବତୀଙ୍କ ଅର୍ଦ୍ଧନଗ୍ନ ମୁଣ୍ଡବିହୀନ ଗଳିତ ମୃତଦେହ ଉଦ୍ଧାର ହୋଇଛି।

ସୂଚନାଯୋଗ୍ୟ, ଆଜି ସକାଳେ ବାସୁଦେବପୁରର କିଛି ଲୋକ ଜଙ୍ଗଲକୁ କାଠ ଆଣିବାକୁ ଯାଇଥିଲେ। କାଠ ଆଣୁଥିବା ସମୟରେ ସେମାନଙ୍କୁ ଦୁର୍ଗନ୍ଧ ଆସିଥିଲା। କେଉଁ ସ୍ଥାନରୁ ଏତେ ଜୋର୍‌ରେ ଦୁର୍ଗନ୍ଧ ଆସୁଥିବା ଦେଖିବାକୁ ଯାଇଥିବା ସମୟରେ ସେଠାରେ ଜଣେ ଯୁବତୀଙ୍କ ମୃତଦେହ ପଡ଼ିଥିବା ଦେଖିବାକୁ ପାଇଥିଲେ । ତେବେ ଯୁବତୀଙ୍କ ଏହି ମୃତଦେହ ଅର୍ଦ୍ଧନଗ୍ନ ଥିବା ବେଳେ ମୁଣ୍ଡବିହୀନ ଥିଲା। ଏନେଇ ଗ୍ରାମବାସୀ ଗ୍ରାମର ଅନ୍ୟ ଲୋକଙ୍କୁ ଖବର ଦେବା ସହିତ ପୁଲିସକୁ ବି ଖବର ଦେଇଥିଲେ।

ପୁଲିସ ଖବର ପାଇ ଘଟଣାସ୍ଥଳରେ ପହଞ୍ଚି ଉକ୍ତ ଯୁବତୀଙ୍କ ଅର୍ଦ୍ଧନଗ୍ନ ମୁଣ୍ଡବିହୀନ ଗଳିତ ମୃତଦେହ ଉଦ୍ଧାର କରିଥିଲା। ତେବେ ପ୍ରାଥମିକ ତଦନ୍ତରୁ କେହି ଯୁବତୀଙ୍କୁ ଦୁଷ୍କର୍ମ କରିବା ପରେ ହତ୍ୟା କରିଥିବା ସନ୍ଦେହ କରାଯାଉଛି। ଉଦ୍ଧାର ହୋଇଥିବା ଯୁବତୀଙ୍କ ଗଳିତ ମୃତଦେହ ତିନି/ଚାରି ଦିନର ବୋଲି କୁହାଯାଉଛି।