ଦିବ୍ୟାଙ୍ଗ ଯୁବତୀଙ୍କ ଝୁଲନ୍ତା ଶବ ଉଦ୍ଧାର
ଖୋର୍ଦ୍ଧା: ଗତକାଲି ଖୋର୍ଦ୍ଧା ଟାଉନ୍ ଥାନା ଅନ୍ତର୍ଗତ ପାଟପୁର ଗାଁରେ ମା ଓ ୭ ବର୍ଷର ଝିଅର ଝୁଲନ୍ତା ମୃତଦେହକୁ ପୁଲିସ ଉଦ୍ଧାର କରିଥିଲା । ଏହି ଘଟଣାର ୨୪ ଘଂଟା ନପୂରୁଣୁ ପୁଣି ଥରେ ଖୋର୍ଦ୍ଧା ଉପକଣ୍ଠ ଗଡ଼ନିଆଳ ଗାଁର ଜଣେ ୨୨ ବର୍ଷୀୟ ଦିବ୍ୟାଙ୍ଗ ଯୁବତୀ ଆତ୍ମହତ୍ୟା କରିଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଯୁବତୀଙ୍କ ମା’ ଜଣେ ଆଶାକର୍ମୀ ସେ ଟାଉନ୍ ଥାନାରେ ଦେଇଥିବା ଏତଲା ଅନୁସାରେ, ଆଜି ଦିନ ୧୨ଟାରେ ସେ କୋଭିଡ୍ ପ୍ରଶିକ୍ଷଣ ପାଇଁ ବିଙ୍କୁଡ଼ିଆ ଯାଇଥିଲେ । ସେଠାରୁ ସେ ୨ଟାରେ ଫେରି ଘର ଭିତରପଟୁ ବନ୍ଦ ଥିବା ଦେଖି କବାଟ ବାଡ଼େଇଥିଲେ । କେହି ନଖୋଲିବାରୁ ଝିଅକୁ ଫୋନ୍ କରିଥିଲେ । କିନ୍ତୁ ସେ ଫୋନ୍ ଉଠାଇନଥିଲେ । ଏହାପରେ ଝରକା କବାଟ ଖୋଲି ଦେଖିବା ବେଳେ ଝିଅ ନିଜ ଚୁନିରେ ପଙ୍ଖାରେ ଝୁଲିଥିବା ଦେଖିଥିଲେ ।
ଏନେଇ ଟାଉନ୍ ଥାନାର ଭାରପ୍ରାପ୍ତ ଅଧିକାରୀ ବିକେ ବେହେରାଙ୍କୁ ପଚାରିବାରେ ସେ କହିଛନ୍ତି ଯେ ଯୁବତୀ ଜଣକ ଜଣେ ଆଂଶିକ ଦିବ୍ୟାଙ୍ଗ । ତାଙ୍କ ବାପାଙ୍କ ମୃତ୍ୟୁ ଘଟିଛି । ମା’ ଓ ଝିଅ ଦୁଇଜଣ ଘରେ ରହନ୍ତି । ମା’ ବୃତ୍ତିଗତ କାମରେ ବାହାରକୁ ଗଲେ ଝିଅ ଏକୁଟିଆ ଘରେ ଥାଏ । ତେବେ ଆତ୍ମହତ୍ୟାର କାରଣ ଜଣାପଡ଼ିନାହିଁ । ଶବକୁ ଉଦ୍ଧାର କରିବା ପରେ ବ୍ୟବଚ୍ଛେଦ ପାଇଁ ପଠାଯାଇଛି । ଏନେଇ ୩୨/୨୦୨୧ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଛି । ମାମଲା ସମ୍ପର୍କରେ ଅଧିକ ତଦନ୍ତ ଜାରି ରହିଛି ।