ଖୋର୍ଦ୍ଧା : ଜଟଣୀରେ ନିର୍ମାଣ ହେଉଥିବା ଓଭରବ୍ରିଜ୍ ଯୋଗୁଁ ବିସ୍ଥାପିତ ହୋଇଥିବା ଦୋକାନୀଙ୍କୁ ଥଇଥାନ ନେଇ ଆଜି ପୁଣି ଜଟଣୀ ବିଧାୟକଙ୍କ ନେତୃତ୍ୱରେ ଶତାଧିକ ଦୋକାନୀ ଜିଲ୍ଲାପାଳଙ୍କୁ ସାକ୍ଷାତ କରି ଦାବି ଉପସ୍ଥାପିତ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଆଜି ପୂର୍ବାହ୍ଣ ପ୍ରାୟ ୧୧ଟାରେ ଜଟଣୀ ବିଧାୟକ ସୁରେଶ କୁମାର ରାଉତରାୟଙ୍କ ନେତୃତ୍ୱରେ ଶ୍ରୀରାମଛକ ବ୍ୟବସାୟୀ ସଂଘର ସଦସ୍ୟମାନେ ଜିଲ୍ଲାପାଳଙ୍କୁ ସାକ୍ଷାତ କରିଥିଲେ । ବିଧାୟକ ରାଉତରାୟଙ୍କ କହିବା ଅନୁସାରେ, ୨୦୧୩ରୁ ଏନେଇ ପ୍ରଶାସନକୁ ଅବଗତ କରାଯାଉଛି । ୨୦୧୩ ଜାନୁଆରୀ ୧୬, ଜୁନ୍ ଓ ସେପ୍ଟମ୍ବର ୨୦୧୭, ମାର୍ଚ୍ଚ ଓ ଡିସେମ୍ବର ୨୦୧୮ରେ ଥଇଥାନ ପାଇଁ ଲିଖିତ ଭାବେ ଦିଆଯାଇଥିଲା, କିନ୍ତୁ ଏଯାଏଁ କୌଣସି ପଦକ୍ଷେପ ନିଆଯାଇନାହିଁ । ଓଭରବ୍ରିଜ୍ ଦ୍ୱାରା ୫୮୭ଟି ଦୋକାନ ଉଚ୍ଛେଦ ହୋଇଛି । ଏହା ମଧ୍ୟରୁ ୨୫୦ଜଣ ଦୋକାନୀଙ୍କ ସେଠାର ଦୋକାନ ହିଁ ପ୍ରମୁଖ ରୋଜଗାରର ପନ୍ଥା ଥିଲା । ଦୋକାନ ବନ୍ଦ ହୋଇଯିବା ଦ୍ୱାରା ସେମାନଙ୍କ ରୋଜଗାର ମଧ୍ୟ ବନ୍ଦ ହୋଇଯାଇଛି । ଆଜି ପୁଣି ଜିଲ୍ଲାପାଳଙ୍କୁ ସାକ୍ଷାତ କରି ତୁରନ୍ତ ଥଇଥାନ ବ୍ୟବସ୍ଥା କରିବାକୁ ଅନୁରୋଧ କରାଯାଇଛି ବୋଲି ଶ୍ରୀରାଉତରାୟ କହିଛନ୍ତି ।