ଡେପୁଟି ରେଞ୍ଜରଙ୍କ ସଡକ ଦୁର୍ଘଟଣାରେ ମୃତ୍ୟୁ, ସ୍ଥାନୀୟ ଅଞ୍ଚଳରେ ଉତ୍ତେଜନା

ବନ୍ତଳା:ଅନୁଗୁଳ ବ୍ଲକ ବନ୍ତଳା ଥାନା ଅଞ୍ଚଳରେ ଗତକାଲି ରାତିରେ ଦୁର୍ଘଟଣା ଘଟି ଜଣେ ବନ ବିଭାଗର କର୍ମଚାରୀଙ୍କ ମୃତ୍ୟୁ ହୋଇଥିଲା। ଏହି ଘଟଣାରେ ଆଜି ସକାଳୁ ସ୍ଥାନୀୟ ଲୋକମାନେ ରାସ୍ତା ଅବରୋଧ କରିଥିବା ବେଳେ ପୁରୁଣା କଟକ-ସମ୍ବଲପୁର ରାସ୍ତା ଅବରୋଧ କରିଛନ୍ତି। ସୂଚନାଯୋଗ୍ୟ ଯେ ଗତକାଲି ରାତି ପ୍ରାୟ ୯ଟା ବେଳକୁ ଡେପୁଟି ରେଞ୍ଜର ଜୟନ୍ତ କୁମାର ସାହୁ ବାଇକ ଯୋଗେ ନିଜ ଗାଁ ହମାମିରା ଗ୍ରାମରୁ ବନ୍ତଳା ରେଞ୍ଜ ଅଫିସକୁ ଆସୁଥିଲେ।

ତେବେ ସାରଙ୍ଗପୁର ନିକଟରେ ଥିବା ପୋଲ ପାଖରେ ଥିବା ଏକ ଖାଲରେ ତାଙ୍କ ବାଇକଟି ଭାରସାମ୍ୟ ହରାଇଥିଲା। ସେଠାରେ ସେ ରାସ୍ତା ଉପରେ କଚାଡି ହୋଇ ପଡିବା ପରେ ମୁଣ୍ଡରେ ଶକ୍ତ ଆଘାତ ଲାଗିଥିଲା। ଫଳରେ ସେଠାରେ ତାଙ୍କର ମୃତ୍ୟୁ ଘଟିଥିଲା।

ଏନେଇ ଆଜି ସ୍ଥାନୀୟ ଲୋକମାନେ ଘଟଣାସ୍ଥଳରେ ରାସ୍ତା ଅବରୋଧ କରିବା ସହ ରାସ୍ତା ମରାମତି ପାଇଁ ଅଡ଼ି ବସିଛନ୍ତି। ୨ଘଣ୍ଟା ରୁ ଉର୍ଦ୍ଧ୍ବ ସମୟ ହେଲା ରାସ୍ତା ଅବରୋଧ ହୋଇଥିଲା ବେଳେ ଦୁଇ ପାର୍ଶ୍ଵରେ ଶହ ଶହ ଗାଡି ମୋଟର ଅଟକି ରହିଛନ୍ତି। ପୁଲିସ ଘଟଣାସ୍ଥଳରେ ପହଞ୍ଚି ନଥିବା ଜଣାପଡିଛି।