ଠିକାଦାରଙ୍କ ଉପରକୁ ଫାଙ୍କା ଗୁଳିମାଡ଼: ଥାନାରେ ଏତଲା

ଢେଙ୍କାନାଳ: ଗତକାଲି ରାତିରେ ଢେଙ୍କାନାଳର ଜଣେ ଠିକାଦାରଙ୍କ ଉପରକୁ ଫାଙ୍କା ଗୁଳିମାଡ଼ ହୋଇଥିବାର ଖବର ମିଳିଛି। ଢେଙ୍କାନାଳ ଟାଉନ ଥାନା ଅନ୍ତର୍ଗତ ମହାବିର ବଜାର କଚେରୀ ରୋଡ ନିକଟରେ ଠିକାଦାର କାହ୍ନୁ ଚରଣ ସାହୁଙ୍କ ଉପରକୁ ଏହି ଗୁଳିମାଡ଼ କରାଯାଇଛି। ଗୁଳିମାଡ଼ରେ ଅଳ୍ପକେ ବର୍ତ୍ତିଛନ୍ତି କାହ୍ନୁଚରଣ।

ଦୁର୍ବୃତ୍ତମାନେ ଫାଙ୍କା ଗୁଳିମାଡ଼ କରି କାହ୍ନୁଙ୍କୁ ଭୟଭୀତ କରାଇ ଅପହରଣ କରିନେବା ଉଦ୍ଦେଶ୍ୟରେ ଏଭଳି କାଣ୍ଡ କରିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି।ଏହି ଘଟଣାରେ ଚାରିଜଣଙ୍କ ସମ୍ପୃକ୍ତି ରହିଥିବା ଠିକାଦାର କହିଛନ୍ତି। ଅପହରଣ ଉଦ୍ୟମ ଅସଫଳ ହେବାରୁ ଦୁର୍ବୃତ୍ତମାନେ ତାଙ୍କ କାର ଛଡାଇ ନେଇ ପଳାଇଛନ୍ତି। କିଛି ଦିନ ପୂର୍ବରୁ କାହ୍ନୁଙ୍କ କାମାକ୍ଷାନଗର ସ୍ଥିତ ତାଙ୍କ ଘର ଆଗରେ ତାଙ୍କ କାର ଉପରକୁ ବୋମା ମାଡ଼ ମଧ୍ୟ ହୋଇଥିଲା। ଏପଟେ ଟାଉନ ଥାନାରେ କାହ୍ନୁଙ୍କ ଅଭିଯୋଗ ପରେ ପୁଲିସ ତନାଘନା ଆରମ୍ଭ କରିଛି। କାହ୍ନୁଙ୍କ ଉପରକୁ କିଏ ଓ କାହିଁକି ଗୁଳିମାଡ଼ କରିବାକୁ ଚେଷ୍ଟା କରିଛନ୍ତି, ତାହା ଏଯାଏଁ ସ୍ପଷ୍ଟ ହୋଇନାହିଁ।