ସାଇକେଲ ଚୋରିକୁ ନେଇ ବାଇସିଙ୍ଗା ଗାଁରେ ହଣାକଟା

କାମାକ୍ଷାନଗର: ସାଇକେଲ ଚୋରିକୁ ନେଇ ହଣାକଟା। ଢେଙ୍କାନାଳ ଜିଲ୍ଲା କାମାକ୍ଷାନଗର ଥାନା ବାଇସିଙ୍ଗା ଗ୍ରାମରେ ଏଭଳି ଅଭ‌ାବନୀୟ ଘଟଣା ଦେଖିବାକୁ ମିଳିଛି।

ସୂଚନା ଅନୁସାରେ ବାଇସିଙ୍ଗା ଗ୍ରାମ ରଗଡ଼ିସାହିର ଚରଣ ନାୟକଙ୍କ ଘରୁ ଗତକାଲି ବିଳମ୍ବିତ ରାତିରେ ସାଇକେଲ ଚୋରି ହୋଇଥିଲା। ଆଉ ସେହି ସାଇକେଲକୁ ଗାଁର ବାଦଲ ନାୟକ ଚୋରି କରିଥିବା ଅଭିଯୋଗ କରି ଆଜି ସକାଳୁ ଚରଣ ନାୟକ ଓ ତାଙ୍କ ଭାଇମାନେ ବାଦଲକୁ ପଚରାଉଚରା କରିଥିଲେ। ଏହି କଥାକୁ ନେଇ ବାଦଲ ରାଗରେ ଆସି ପାଖରେ ଥିବା ଏକ ଟାଙ୍ଗିଆରେ ଚରଣଙ୍କୁ ହାଣି ଦେଇଥିଲା। ଫଳରେ ଚରଣଙ୍କ ବେକ ପାଖରୁ ପ୍ରବଳ ରକ୍ତ ବାହାରିବାରୁ ପରିବାର ଲୋକ ତାଙ୍କୁ ତୁରନ୍ତ କାମାକ୍ଷାନଗର ମେଡିକାଲରେ ଭର୍ତ୍ତି କରାଇଥିଲେ। ସେଠାରେ ତାଙ୍କ ସ୍ୱାସ୍ଥ୍ୟବସ୍ଥା ଗୁରୁତର ଥିବାରୁ ଡାକ୍ତର ତାଙ୍କୁ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଛନ୍ତି। ଏ ବିଷୟରେ ଖବର ପାଇ କାମାକ୍ଷାନଗର ପୁଲିସ୍‌ ମେଡିକାଲରେ ପହଞ୍ଚି ଟାଙ୍ଗିଆକୁ ଜବତ କରିବା ସହ ଅଧିକ ତଦନ୍ତ ଜାରି ରଖିଛି।

ଅନ୍ୟପକ୍ଷରେ ବାଦଲର ସ୍ତ୍ରୀ ଅଭିଯୋଗ କରିଛନ୍ତି ଯେ ଆଜି ସକାଳୁ ମୋ ସ୍ବାମୀ ଶୈାଚ ପାଇିଁ ଯାଉଥିବା ବେଳେ ଚରଣ ଓ ତାଙ୍କ ଭାଇମାନେ ମିଶି ମୋ ସ୍ବାମୀଙ୍କ ଉପରେ ମରଣାନ୍ତକ ଆକ୍ରମଣ କରିଛନ୍ତିା ଯାହା ଫଳରେ ମୋ ସ୍ବାମୀଙ୍କ ଆଖି, ମୁଣ୍ଡରେ ଗୁରୁତର ଆଘାତ ଲାଗିଛି। ସେ ଗୁରୁତର ଭାବେ କାମାକ୍ଷାନଗର ମେଡିକାଲରେ ଚିକିତ୍ସିତ ହେଉଛନ୍ତି। ଉଭୟ ପକ୍ଷଙ୍କ ଅଭିଯୋଗ ଆଧାରରେ କାମାକ୍ଷାନଗର ପୁଲିସ୍‌ ତଦନ୍ତ ଜାରି ରଖିଛି। ଉଭୟ ଗୁରୁତରଙ୍କୁ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।