କାମାକ୍ଷାନଗର/ପଣ୍ଡୁଆ : ଢେଙ୍କାନାଳ ଅନ୍ତର୍ଗତ ତୁମୁସିଂହା ଥାନା ପଣ୍ଡୁଆ ଫାଣ୍ଡିଠାରୁ ମାତ୍ର ଶହେ ମିଟର ଦୂରରେ ଏକ ବଡ଼ଧରଣର ଲୁଟ୍ ହୋଇଛି। ଜଣେ ଅବସରପ୍ରାପ୍ତ ଶିକ୍ଷକଙ୍କ ଘରେ ପଶି ପରିବାର ସଦସ୍ୟଙ୍କୁ କଟୁରିରେ ଆକ୍ରମଣ କରି ନଗଦ ୨ ଲକ୍ଷ ଟଙ୍କା ଓ ୧୩ ଭରି ଓଜନର ସୁନାଗହଣା ଲୁଟି ନେଇଛନ୍ତି। ଫାଣ୍ଡି ନିକଟରେ ସଂଘଟିତ ଏହି ସଶସ୍ତ୍ର ଡକାୟତି ଘଟଣା ଆଖପାଖ ଅଂଚଳରେ କେବଳ ଆଲୋଡ଼ନ ସୃଷ୍ଟି କରିନାହିଁ; ବରଂ ପୁଲିସ ପାଇଁ ଏକ ଶକ୍ତ ଚାଲେଞ୍ଜ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଅବସରପ୍ରାପ୍ତ ଶିକ୍ଷକ ହେଉଛନ୍ତି ସୁଦର୍ଶନ ସାହୁ। ଗତକାଲି ସେସୁର ଲାଇନ୍ମ୍ୟାନ୍ ବୋଲି ପରିଚୟ ଦେଇ ୫ ଜଣ ଦୁର୍ବୃତ୍ତ ତାଙ୍କ ଘରେ ପଶିଥିଲେ। ସେମାନଙ୍କ ମଧ୍ୟରୁ ୩ ଜଣ ମୁଖା ପିନ୍ଧିଥିଲେ। ଏହାପରେ ସେମାନେ କଟୁରିରେ ଅତର୍କିତ ଆକ୍ରମଣ କରିଥିଲେ। ଆକ୍ରମଣରେ ଭୟଭୀତ ହୋଇ ମନୋଜ ତୁରନ୍ତ ଆଲମିରା ଚାବି ବଢ଼ାଇ ଦେଇଥିଲେ। ଦୁର୍ବୃତ୍ତମାନେ ସେଥିରୁ ଟଙ୍କା ଓ ସୁନା ଅଳଙ୍କାର ଲୁଟିବା ପରେ ପରିବାର ଲୋକଙ୍କୁ ବାହାରପଟୁ କବାଟ ବନ୍ଦ କରିଦେଇଥିଲେ। ରାତି ୧୧ଟା ଭିତରେ ଲୁଟପାଟ୍ କରି ସେମାନେ ଚମ୍ପଟ ମାରିଥିଲେ।
ମନୋଜ କବାଟ ଭାଙ୍ଗି ବାହାରକୁ ଆସି ଫାଣ୍ଡିରେ ଜଣାଇଥିଲେ। ଦୁର୍ବୃତ୍ତମାନେ ୨ ଲକ୍ଷ ଟଙ୍କା ଓ ୧୩ ଭରିରୁ ଅଧିକ ସୁନା ଗହଣା ନେଇଯାଇଥିବା ସୁଦର୍ଶନ ଏତଲାରେ ଉଲ୍ଲେଖ କରିଛନ୍ତି। ପୁଲିସ୍ ଘଟଣାର ତଦନ୍ତ କରୁଛି।