ଭାପୁର: ଢେଙ୍କାନାଳ ଭାପୁର ଫାଣ୍ତି ଅନ୍ତର୍ଗତ ପୁରୁଣା କଟକ-ସମ୍ବଲପୁର ରାସ୍ତାର ଓସ୍ତପାଳ ପୋଲ ନିକଟରେ ଗତକାଲି ସକାଳ ୮ଟା୩୦ରେ ଏକ ପିକଅପ୍‌ ଭ୍ୟାନ୍‌ (ଓଆର‌୍‌ ୦୫ ଏଆର‌୍‌ ୫୩୦୩) ଧକ୍କାରେ ଓସ୍ତପାଳର ପ୍ରାଣବନ୍ଧୁ ସାହୁ (୫୫) ଗୁରୁତର ହୋଇଥିଲେ। ତାଙ୍କୁ କଟକ ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ଆଜି ତାଙ୍କର ମୃତ୍ୟୁ ଘଟିଛି। ଏହି ଖବର ପହଞ୍ଚିବା ପରେ ତାଙ୍କ ପରିବାର ଓ ଗାଁରେ ଶୋକର ଛାୟା ଖେଳିଯାଇଛି। ଗତକାଲି ପ୍ରାଣବନ୍ଧୁ ସାପୁଆ ନଈରୁ ଗାଧୋଇ ଘରକୁ ଫେରୁଥିଲେ। ସେହି ସମୟରେ ଏକ ସାବୁନ୍‌ ବୋଝେଇ ଭ୍ୟାନ୍ ତାଙ୍କୁ ଧକ୍କା ଦେଇଥିଲା। ପରେ ଲୋକେ ଏହି ଭ୍ୟାନରୁ ଦୁଇ ଲକ୍ଷ ଟଙ୍କାର ସାମଗ୍ରୀ ବୋହି ନେଇଥିଲେ। ଭାପୁର ପୁଲିସ୍‌ ଘଟଣାସ୍ଥଳରେ ପହଞ୍ଚିବାରେ ଡେରି ହେବାରୁ ଏହି ସବୁ ସାମଗ୍ରୀ ଲୋକେ ନେଇଯିବାରେ ସକ୍ଷମ ହେଲେ ବୋଲି ଡ୍ରାଇଭର କହିଛନ୍ତି। ଭାପୁର ପୁଲିସ୍‌ ଗାଡ଼ିକୁ ଜବତ କରିଛି। ମୃତକଙ୍କ ପରିବାର ବର୍ତ୍ତମାନ ସୁଦ୍ଧା ରିପୋର୍ଟ ଦେଇନଥିବାରୁ କେସ୍‌ ରୁଜୁ ହୋଇନଥିବା ପୁଲିସ୍‌ ପ୍ରକାଶ କରିଛି।