କୋରାପୁଟ: ଦଶମନ୍ତପୁର ବ୍ଲକର ବଦଳିକୁଡୁମ ଗାଁରେ ମା’ର ମୃତ୍ୟୁ ପରେ ବୁଧବାର ଅପରାହ୍ଣ ଠାରୁ ଭୋକରେ ଥିବା ୩ ଅନାଥ ଶିଶୁଙ୍କୁ କୋରାପୁଟ ଜିଲ୍ଲା ପ୍ରଶାସନ ତରଫରୁ ସହାୟତା ମିଳିଛି। ଗଣମାଧ୍ୟମରେ ଖବର ପ୍ରସାରିତ ହେବା ପରେ ଜିଲ୍ଲା ପ୍ରଶାସନ ସହାୟତାର ହାତ ବଢ଼ାଇଛି। ଜିଲ୍ଲା ରେଡକ୍ରସ୍ ପକ୍ଷରୁ ୧୦ ହଜାର ଟଙ୍କା ଓ ୨୦ କେଜି ଚାଉଳ ଦିଆଯାଇଛି। ସେହିପରି ମା’ର ଦଶାହ ପରେ ୩ ପିଲାଙ୍କୁ ଆଣି ଶିଶୁ କଲ୍ୟାଣ ଅନୁଷ୍ଠାନରେ ରଖାଯିବାକୁ ଜିଲ୍ଲା ପ୍ରଶାସନ ନିଷ୍ପତ୍ତି ନେଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ମା’ର ମୃତ୍ୟୁ ପରେ ତିନି ଜଣ ଅନାଥ ପିଲାଙ୍କୁ ବୁଧବାର ଅପରାହ୍ନ ପରଠାରୁ ଖାଇବାକୁ ମିଳି ନ ଥିଲା। ବ୍ଲକ ମୁଖ୍ୟାଳୟ ନିକଟ ବଦଳିକୁଡୁମ ଗାଁରେ ଏଭଳି ଅଭାବନୀୟ ଘଟଣା ଘଟିବା ନେଇ ଗଣମାଧ୍ୟମରେ ଖବର ପ୍ରକାଶ ପାଇଥିଲା।
ତିନି ଅନାଥଙ୍କ ମା’ ବୁଧବାର ସେମାନଙ୍କୁ ଘରେ ଛାଡି ଜଙ୍ଗଲକୁ କାଠ ଆଣିବାକୁ ଯାଇ ଆଉ ଘରକୁ ଫେରି ନ ଥିଲେ। ମାତୃହରା ପିଲାମାନେ ମା’ଙ୍କୁ ହରାଇବାର ୨ ବର୍ଷ ପୂର୍ବରୁ ବାପାଙ୍କୁ ହରାଇ ସାରିଛନ୍ତି। ସୂତ୍ର ଅନୁସାରେ ଅନାଥ ପିଲାମାନଙ୍କୁ ପଡୋଶୀ ବୁଧବାର କିଛି ଖାଦ୍ୟ ଦେଇଥିଲେ। ମାତ୍ର ଆଜି ସେମାନଙ୍କୁ କିଛି ଖାଦ୍ୟ ମିଳି ନ ଥିଲା। ସବୁଠାର କ୍ଷୋଭର ବିଷୟ ଯେ, ୧୦ ବର୍ଷର ଝିଅ ଓ ତା’ର ୫ ଓ ୨ ବର୍ଷିଅ ଭାଇକୁ ଅଙ୍ଗନବାଡ଼ିରୁ ମଧ୍ୟ ଖାଇବାକୁ ଦିଆଯାଇ ନ ଥିଲା।