ଖୋର୍ଦ୍ଧା: ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟର ରୋଗୀକଲ୍ୟାଣ ସମିତି ବୈଠକ ଆଜି ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି । ଏହି ଅବସରରେ ଜିଲ୍ଲାର କରୋନା ଯୋଦ୍ଧାଙ୍କୁ ସମ୍ମାନିତ କରାଯାଇଥିଲା । ଜିଲ୍ଲାପାଳ ସନତ କୁମାର ମହାନ୍ତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଚିକିତ୍ସାଳୟର ବିକାଶ ନେଇ ବିଭିନ୍ନ ଆଲୋଚନା ହୋଇଥିଲା । ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡା ବିଶ୍ୱରଂଜନ ପତି ଓ ଜିଲ୍ଲା ମୁଖ୍ୟ ଚିକିତ୍ସାଳୟର ଅଧୀକ୍ଷକ ଡା ବିଶ୍ୱମୋହନ ମିଶ୍ର ରୋଗୀ କଲ୍ୟାଣ ସମିତି ପକ୍ଷରୁ ହେଉଥିବା ବିଭିନ୍ନ କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇଥିଲେ । ବୈଠକରୁ ମିଳିଥିବା ସୂଚନାନୁସାରେ, ଚିକିତ୍ସାଳୟ ଚାରିପଟେ ଅଧାପନ୍ତରିଆ ହୋଇ ପଡ଼ିଥିବା ପାଚେରୀର ନିର୍ମାଣ, ୨ଟି ଫାଟକ । ବର୍ଜ୍ୟବସ୍ତୁ ଓ ଜଳ ନିଷ୍କାସନ ବ୍ୟବସ୍ଥା, ପରିସର ମଧ୍ୟରେ ଏକ ଔଷଧୀୟ ଉଦ୍ୟାନ ନିର୍ମାଣ କରାଯିବ ।
Sambad is now on WhatsApp
Join and get latest news updates delivered to you via WhatsApp
ଏହାସହ ଅନେକ ଦିନରୁ ଦାବି ହୋଇ ଆସୁଥିବା ଚିକିତ୍ସାଳୟ ପରିସରରେ ଏକ ପୁଲିସ ଫାଣ୍ଡି ସ୍ଥାପନା, ଗାଡ଼ି ରଖିବା ପାଇଁ ପାର୍କିଂ ବ୍ୟବସ୍ଥା, ରୋଗୀଙ୍କ ପାଇଁ ପ୍ରତୀକ୍ଷାଳୟ, ଚିକିତ୍ସାଳୟରେ ନିର୍ମଳା ପ୍ଲସ ଯୋଜନା କାର୍ଯ୍ୟକାରୀ କରିବା ଆଦି ସମ୍ପର୍କରେ ଆଲୋଚନା ହୋଇଥିଲା । ଅଧୀକ୍ଷକ ଡା ମିଶ୍ର ରୋଗୀ କଲ୍ୟାଣ ସମିତିର ଆୟବ୍ୟୟ ସମ୍ପର୍କରେ ସୂଚନା ଦେଇଥିଲେ । ସୂଚନାନୁସାରେ, ୨୦୨୦-୨୧ରେ ୯ଲକ୍ଷ ୬୯ ହଜାର ଟଙ୍କା ଅନୁଦାନ ମିଳିଛି । ଏହା ମଧ୍ୟରୁ ୪ଲକ୍ଷ ୨୭ ହଜାର ଟଙ୍କା ଖର୍ଚ୍ଚ ହୋଇଛି ।
ସେହିଭଳି ୨୦୨୦-୨୧ରେ ନିଦାନ ଯୋଜନାରେ ୨୧ଳକ୍ଷ ୨୮ହଜାର ଟଙ୍କା ମିଳିଥିବା ବେଳେ ବର୍ତମାନ ସୁଦ୍ଧା ସେଥିରୁ ୬ଲକ୍ଷ ୮୦ ହଜାର ଟଙ୍କା ଖର୍ଚ୍ଚ ହୋଇଛି । ବୈଠକ ପରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ବିଭିନ୍ନ ବର୍ଗର ୧୫ଜଣ କୋଭିଡ୍ ଯୋଦ୍ଧାଙ୍କୁ ସମ୍ମାନିତ କରାଯାଇଥିଲା । ଏହି ବୈଠକରେ ଅନ୍ୟମାନଙ୍କ ମଧ୍ୟରେ ଭୁବନେଶ୍ୱର ସାଂସଦଙ୍କ ପ୍ରତିନିଧି ନିକୁଂଜ ପଟ୍ଟନାୟକ, ବିଧାୟକଙ୍କ ପ୍ରତିନିଧି, ଡିପିଏମ୍ ଗୀତାଂଜଳି ଦାଶଙ୍କ ସମେତ ସ୍ୱାସ୍ଥ୍ୟ, ନିର୍ମାଣ ବିଭାଗର ବିଭିନ୍ନ ଅଧିକାରୀ ଓ ରୋଗୀ କଲ୍ୟାଣ ସମିତିର ସଦସ୍ୟମାନେ ଉପସ୍ଥିତ ଥିଲେ ।