ସୁନ୍ଦରଗଡ଼: ସୁନ୍ଦରଗଡ଼ ବନଖଣ୍ଡରେ ମାତିଛନ୍ତି ହାତୀ। ବିଭିନ୍ନ ଗାଁକୁ ପଶି ଘରଦ୍ବାର ଭାଙ୍ଗିବା ସହ ଧାନ କିଆରୀଗୁଡିକୁ ମାଡିମକଚି ନଷ୍ଟ କରି ଦେଉଛନ୍ତି। ଗତକାଲି ରାତିରେ ବନଖଣ୍ଡର ଜାମତଲିଆ ସେକ୍ସନର କିଞ୍ଜିର୍ମାରେ ତିନି ଟିକିଆ ହାତୀପଲ ଉତ୍ପାତ କରିଛନ୍ତି। ବିଳମ୍ବିତ ରାତିରେ ଗାଁକୁ ପଶି କଳାକର ଜୟପୁରିଆ, ମୁକ୍ତେଶ୍ଵର ଜୟପୁରିଆ, ପଦ୍ମାବତୀ ଅଢା, ଯୁଗେଶ୍ୱର ବିଶ୍ଵାଳ, ଫ୍ଲୋରା ଗୁଡ଼ିଏ, ଏଵଂ ଫିଲମନ ଭେଂଗ୍ରାଙ୍କ ଘର ଭାଙ୍ଗିବା ସହ ଧାନଚାଉଳ ଖାଇ ଆସବାବପତ୍ର ନଷ୍ଟ କରି ଦେଇଛନ୍ତି। ଏ ସମ୍ପର୍କରେ ବନ ବିଭାଗକୁ ଖବର ଦିଆଯାଇଥିଲେ ମଧ୍ଯ ସେମାନେ ରାତିରେ ଆସିନଥିଲେ। ପରେ ଲୋକେ ବହୁ କଷ୍ଟରେ ପ୍ରାୟ ଘଣ୍ଟାଏର କସରତ କରି ହାତୀପଲକୁ ଜଙ୍ଗଲ ଆଡକୁ ଘଉଡାଇ ଦେଇଥିଲେ। ସକାଳୁ ବନ କର୍ମଚାରୀ ଗାଁକୁ ଯିବାରୁ ଲୋକେ ଅସନ୍ତୋଷ ପ୍ରକାଶ କରିଥିଲେ। ବନ କର୍ମଚାରୀ କ୍ଷୟକ୍ଷତିର ଆକଳନ କରି ଫେରିଛନ୍ତି।