ସଙ୍କଟରେ ଗଜରାଜଙ୍କ ଜୀବନ, ବିଜେପି ରେଞ୍ଜରେ ପୁଣି ଏକ ମାଈ ହାତୀର ମୃତ୍ୟୁ
ବାଂଶପାଳ: ସଙ୍କଟରେ ଗଜରାଜଙ୍କ ଜୀବନ | କେନ୍ଦୁଝରରେ ଲୋପ ପାଇବାକୁ ବସିଲାଣି ହାତୀ ବଂଶ | ମାସକ ଭିତରେ ବାଂଶପାଳ ବ୍ଲକ ବିଜେପି ରେଞ୍ଜରେ ୪ ହାତୀଙ୍କ ମୃତ୍ୟୁ ଘଟିଲାଣି, ଯାହା ବନ୍ୟଜନ୍ତୁ ପ୍ରେମୀଙ୍କୁ ହତାଶ କରିଛି | ବନବିଭାଗର ଅପାରଗତା ଯୋଗୁଁ ଆଜି ପୁଣି ଏକ ମାଈ ହାତୀର ମୃତ୍ୟୁ ଘଟିଛି | ଗତ ୧୯ ତାରିଖରେ ରବ ଗାଁ ନିକଟ ଜଙ୍ଗଲରେ ୨ଟି ଓ ୪ଦିନ ତଳେ ଚମ୍ପେଇ ଜଙ୍ଗଲରେ ଗୋଟିଏ ହାତୀର ମୃତ୍ୟୁ ହୋଇଥିଲେ ହେଁ ମୃତ୍ୟୁର କାରଣ ଆଜି ପର୍ଯ୍ୟନ୍ତ ସ୍ପଷ୍ଟ ହୋଇପାରିନାହିଁ |
Sambad is now on WhatsApp
Join and get latest news updates delivered to you via WhatsApp
ମାସକ ବ୍ୟବଧାନରେ ଆଜି ସାରୁକୁଦର ଗାଁ ନିକଟ ଜଙ୍ଗଲରେ ଏକ ମାଈ ହାତୀର ମୃତ୍ୟୁ ଘଟିଛି ଯାହା ସମସ୍ତଙ୍କୁ ଚକିତ କରିଛି | ସୂଚନାନୁସାରେ ବିଜେପି ରେଞ୍ଜର ତଳ ଚମ୍ପେଇ ପଂଚାୟତ ସାରୁକୁଦର ପାରାବାଡି ସାହି ନିକଟରେ ଏକ ମାଈ ହାତୀ ମରିପଡିଥିବା ଗ୍ରାମବାସୀ ଆଜି ଦେଖିବାକୁ ପାଇଥିଲେ | ହାତୀଟି ଗତକାଲିଠାରୁ ମରିପଡିଥିବା ଅନୁମାନ କରାଯାଉଛି |
ମାଈ ହାତୀଟିର ବୟସ ପାଖାପାଖି ୨୦ ବର୍ଷ ହେବ ବୋଲି ଜଣାପଡିଛି | ବନବିଭାଗ ହାତୀ ପଲଙ୍କୁ ନିୟମିତ ଟ୍ରାକିଂ କରୁଥିଲେ ହେଁ ହାତୀ ମୃତ୍ୟୁ ବିଷୟରେ ବନ କର୍ମଚାରୀମାନେ କିପରି ଜାଣିପାରିଲେ ନାହିଁ ବୋଲି ଗ୍ରାମବାସୀ କହିଛନ୍ତି | ହାତୀ ମୃତ୍ୟୁର କାରଣ ଜଣାପଡିନଥିଲେ ହେଁ ବିଷକ୍ରିୟା କିମ୍ବା ଅନ୍ୟ କୌଣସି କାରଣରୁ ମୃତ୍ୟୁ ଘଟିଥିବା ସନ୍ଦେହ କରାଯାଉଛି |