ରାୟଗଡା: ଗତ ଦୁଇଦିନ ହେଲା ବିଭିନ୍ନ ରାଜନୈତିକ ଦଳ ପୂର୍ବତନ ସାଂସଦ ଏନ. ଭାସ୍କର ରାଓଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣି ଗଣମାଧ୍ୟମରେ ତାକୁ ପ୍ରଚାର ପ୍ରସାର କରିଥିଲେ। ଟ୍ରକ ଆସୋସିଏସନରେ ଥିବାବେଳେ ପୂର୍ବତନ ସାଂସଦ ନକ୍ସଲ ନାମରେ ଟଙ୍କା ଆଦାୟ କରୁଥିବା ଅଭିଯୋଗ କରାଯାଇଥିଲା। ଏହା ପୂର୍ବରୁ ଟ୍ରକ ଆସୋସିଏସନର ମାଲିକମାନେ ମଧ୍ୟ ଏନେଇ ଅଭିଯୋଗ କରିଥିଲେ।

Advertisment

ତେବେ ଏହାର ଆଜି ଜବାବ ରଖିଛନ୍ତି ଭାସ୍କର ରାଓ। ସାମ୍ବାଦିକ ସମ୍ମିଳନୀରେ ସେ ଉତ୍ତର ରଖି ସମସ୍ତ ଅଭିଯୋଗକୁ ମନଗଢା, ଭିତ୍ତିହୀନ ତଥା ରାଜନୈତିକ ପ୍ରଣୋଦିତ ବୋଲି କହିଥିଲେ। ସେ ପୁଣି ଦୋହରାଇଥିଲେ ଯେ ରାୟଗଡା ଜିଲ୍ଲା ନକ୍ସଲ ପ୍ରବଣ ଜିଲ୍ଲା।ଏଠାରେ ଦୀର୍ଘବର୍ଷ ଧରି ରାଜ୍ୟ ଓ କେନ୍ଦ୍ର ସରକାରଙ୍କ ଗୁଇନ୍ଦା ବିଭାଗ ନକ୍ସଲଙ୍କର ସମସ୍ତ ଗତିବିଧି ଉପରେ ସୂଚନା ପ୍ରଦାନ କରୁଛନ୍ତି। ଆଜି ପର୍ଯ୍ୟନ୍ତ କେବେ ବି ଗୁଇନ୍ଦା ବିଭାଗ ଟ୍ରକ ମାଲିକ ସଂଘ କିମ୍ବା ମୁଁ ନକ୍ସଲ ନାମରେ ପାଣ୍ଠି ଯୋଗାଉଥିବାର ଅଭିଯୋଗ ନାହିଁ। ଏହା କେବଳ ରାଜନୈତିକ ଉଦେଶ୍ୟ ଏବଂ ବ୍ୟକ୍ତିଗତ ସ୍ବାର୍ଥ ଲାଗି କିଛି ବ୍ୟକ୍ତି ବିଶେଷ ଓ କିଛି ରାଜନୈତିକ ଦଳ ଯେଉଁ ଅଭିଯୋଗ ଆଣିଛନ୍ତି, ତାହା ସଂପୂର୍ଣ୍ଣ ମିଥ୍ୟା ଏବଂ ଭିତ୍ତିହୀନ। ପ୍ରକାଶ ଥାଉକି ଗତ ପୌର ନିର୍ବାଚନରେ କିଛି ବ୍ୟକ୍ତି, ବିଶେଷକରି ବିଜେଡି ଓ କଂଗ୍ରେସ ଦଳର କିଛି କୁଜି ନେତା ବିଜେଡିର ପୌରାଧ୍ୟକ୍ଷ ଟିକେଟ ଆଶାୟୀ ଥିଲେ। ଏଥିରେ ସେମାନେ ବଞ୍ଚିତ ହେଲେ। ସେମାନଙ୍କର ନିଜର ରାଜନୈତିକ ସ୍ବାର୍ଥ ସାଧନ ନହେବାରୁ ଏଭଳି ଷଡଯନ୍ତ୍ର କରି ମୋତେ ବଦନାମ କରିବାକୁ ପାଇଁ ଚେଷ୍ଟା କରୁଥିବା ସେ କହିଥିଲେ।ଆଗାମୀ ସାଧାରଣ ନିର୍ବାଚନକୁ ଭଣ୍ଡୁର କରିବା ପାଇଁ ଏହି କୁଚକ୍ରୀ ଗୋଷ୍ଠୀ ଏକତ୍ରୀତ ହୋଇ ଯୋଜନା କରୁଥିବା କହିଥିଲେ।

ସେ ପୁଣି କହିଥିଲେ ଯେ ଯିଦ କୌଣସି ତଦନ୍ତ କରାଯାଏ ତେବେ ମୁଁ ସମସ୍ତ ତଦନ୍ତର ସାମ୍ନା କରିବାକୁ ଚାହେଁ। ଟ୍ରକ ମାଲିକ ସଂଘ ଏକ ସଂଘ ନୁହେଁ ଏକ ପରିବାର। ଏହି ଟ୍ରକ ମାଲିକ ସଂଘ କିଛି ସ୍ବଳ୍ପ ମାଲିକଙ୍କୁ ନେଇ ଗଠିତ ହୋଇଥିଲା। ସମୟାନୁକ୍ରମେ କିଛି କିଛି ମାଲିକଙ୍କ ସହଯୋଗରେ ଏବଂ ବହୁ ଘାତ ପ୍ରତିଘାତର ସାମ୍ନା କରି ଆଜି ଏହି ସଂଘ ଗୋଟିଏ ସୁଦୃଢ ଅନୁଷ୍ଠାନ ଭାବରେ ଛିଡା ହୋଇଛି। ଏହି ଯାତ୍ରାରେ ସ୍ବର୍ଗତ ଅଶୋକ ପାଣିଗ୍ରାହୀ, ବି.ଆପ୍ପାରାଓ, ଇ. ରାମକ୍ରିଷ୍ଣା ଏମାନଙ୍କର ଅବଦାନକୁ କେବେ ବି ଭୁଲିବା ଉଚିତ ନୁହେଁ ବୋଲି କହିଥିଲେ। ଏହି ସଂଘ ପାଇ ଯେଉଁମାନେ କୁମ୍ଭୀର କାନ୍ଦଣା କାନ୍ଦୁଛନ୍ତି, ସେମାନେ ବହୁବାର ଏହାକୁ ନିଜ ଅକ୍ତିଆରକୁ ନେବା ପାଇଁ ଚେଷ୍ଟା କରି ବିଫଳ ହୋଇଥିଲେ। ଏବେ ଯେଉଁମାନେ ଏହି କାର୍ଯ୍ୟ ଚଳାଇଛନ୍ତି ସେହି ଗୋଷ୍ଠୀ ସେଥିର ଅଂଶବିଶେଷ ବୋଲି କହିଥିଲେ। କୁଚକ୍ରି ଗୋଷ୍ଠୀକୁ ସେ ଅନୁରୋଧ କରିଥିଲେ ଯେ ସେମାନେ ଏଭଳି ହୀନ ରାଜନୀତି ଛାଡନ୍ତୁ। ତେବେ ଏଥିପାଇଁ ଦରକାର ପଡିଲେ ସେ ନ୍ୟାୟାଳୟର ସାହାରା ନେବେ ବୋଲି ମଧ୍ୟ ଚେତାବନୀ ଦେଇଛନ୍ତି। ତାଙ୍କ ଇଜ୍ଜତ ଉପରେ ଆଞ୍ଚ ଆସିଥିବାରୁ ସେ ନିଜର ଲିଗାଲ ଆଡଭାଜରଙ୍କ ସହ ଆଲୋଚନା ପରେ ଏହି ପଦକ୍ଷେପ ନେବେ ବୋଲି କହିଥିଲେ।