ବିନିକା: ବାଇକାନି ଯାତ୍ରା ଦେଖି ଡଙ୍ଗାରେ ଫେରୁଥିବା ବେଳେ ଡଙ୍ଗା ବୁଡ଼ି ବାପା ଓ ପୁଅଙ୍କ ଶୋଚନୀୟ ମୃତ୍ୟୁ ଘଟିଛି। ଏହି ଘଟଣା ପରେ ଅଞ୍ଚଳରେ ଶୋକର ଛାୟା ଖେଳି ଯାଇଛି।
Sambad is now on WhatsApp
Join and get latest news updates delivered to you via WhatsApp
ସୁବର୍ଣ୍ଣପୁର ଜିଲ୍ଲା ବିନିକା ନିବାସୀ ସୁଲେମାନ ଖାନ୍ (୫୧), ପୁଅ ଅଜଲାନ ଖାନ (୬), ଝିଅ ଓ ଜଣେ ପଡ଼ୋଶୀ ବାଳକ ମିହିରଙ୍କୁ ନେଇ ଶୁକ୍ରବାର ମହାନଦୀ ଭିତରେ ଥିବା ବାଇକାନି ମନ୍ଦିରକୁ ବାଇକାନି ଯାତ୍ରା ଦେଖିବାକୁ ଯାଇଥିଲେ। ସେମାନେ ଯାତ୍ରା ଦେଖି ରାତି ପ୍ରାୟ ୭ଟାରେ ଏକ ଡଙ୍ଗାରେ ଫେରୁଥିଲେ। ଡଙ୍ଗାଟି ବିନିକା – ଚଢ଼େଇପଙ୍କ ମହାନଦୀ ପୋଲର ପିଲର୍ରେ ପିଟି ହୋଇ ଓଲଟି ପଡ଼ିଥିଲା। ଡଙ୍ଗାରେ ଥିବା ୨ ନାଉରୀ ମିହିର ଓ ସୁଲେମାନଙ୍କ ଝିଅକୁ ଆଣି କୂଳକୁ ଆସିଥିଲେ। ତା’ ପରେ ଫେରାର୍ ହୋଇଯାଇଥିଲେ। ସୁଲେମାନ୍ ପୁଅ ଅଜନାଲକୁ ଆଣି ଆସୁଥିବା ବେଳେ ବୁଡ଼ି ଯାଇଥିଲେ।
ପୁଲିସ ଓ ଦମକଳ ବାହିନୀ ବହୁ ସମୟ ଖୋଜାଖୋଜି ପରେ ପ୍ରଥମେ ବାପା ସୁଲେମାନ୍ ଓ ପରେ ପୁଅ ଅଜଲାନଙ୍କ ମୃତଦେହ ଉଦ୍ଧାର କରି ବିନିକା ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ। ଖବର ପାଇ ସୁବର୍ଣ୍ଣପୁର ଉପଜିଲ୍ଲାପାଳ ନିହାର ରଞ୍ଜନ କହଁରଙ୍କ ନିର୍ଦ୍ଦେଶ କ୍ରମେ ଡାକ୍ତରଖାନାକୁ ବିନିକା ଏବିଡିଓ ନିରଞ୍ଜନ ନାଏକ ଓ ବିଏସ୍ଏସ୍ଓ ଅଶ୍ବିନୀ ପାଣ୍ଡେ ପହଞ୍ଚି ମୃତକଙ୍କ ପରିବାରକୁ ରେଡ୍କ୍ରସ୍ ପାଣ୍ଠିରୁ ୧୦ ହଜାର ଟଙ୍କା ଓ ହରିଶ୍ଚନ୍ଦ୍ର ଯୋଜନାରେ ୬ ହଜାର ଟଙ୍କା ପ୍ରଦାନ କରିଥିଲେ। ଶନିବାର ଶବ ବ୍ୟବଚ୍ଛେଦ ହେବ ବୋଲି ଜଣାଯାଇଛି।