ପୁଣି ଜଳିଲା ଶିମିଳିପାଳ: ତାତି ବଢ଼ୁଛି, ୪୭ଟି ସ୍ଥାନରେ ଫାୟାର୍ ପଏଣ୍ଟ୍ ଚିହ୍ନଟ
ବାରିପଦା ଉତ୍ତପ୍ତ ସହର ହେବାର କାରଣ ବନାଗ୍ନି
ବାରିପଦା: ଦେଶର ସର୍ବାଧିକ ଉତ୍ତପ୍ତ ସହର ପାଲଟିଲାଣି ବାରିପଦା। ଏପଟେ ଶିମିଳିପାଳରେ ବନାଗ୍ନି ମଧ୍ୟ ପୁଣି କାୟା ମେଲାଇଲାଣି। ଏବେ ମଧ୍ୟ ଶିମିଳିପାଳ ଅଭୟାରଣ୍ୟ ଜଳୁଥିବା ସାଟେଲାଇଟ୍ ଚିତ୍ରରୁ ଜଣାପଡ଼ୁଛି । ଏସଟିଆର ଉପନିର୍ଦ୍ଦେଶକ ଯଜ୍ଞଦତ୍ତ ପତିଙ୍କ ଅଧୀନରେ ରହିଥିବା ଶିମିଳିପାଳ ସାଉଥ ଅଞ୍ଚଳରେ ଥିବା ପୋଡ଼ାଡିହା ୱାଇଲଡ଼ ଲାଇଫର ଅନନ୍ତପୁରର ଓ ବାଘନ୍ତା ଅଞ୍ଚଳରେ ୬ଟି ସ୍ଥାନ, ଡ଼ୁକୁରା ୱାଇଲଡ଼ ଲାଇଫ ଅଧୀନ ତଳଡିହା ଓ ବହଳଦା ଅଞ୍ଚଳରେ ୮ଟି ସ୍ଥାନରେ, ଜେନାବିଲ ୱାଇଲଡ଼ ଲାଇଫ ଅଧୀନ କୁଳିପାଳ, ଗୁରଣ୍ଡିଆ-୩ ଓ ଗୁରୁଣ୍ଡିଆ-୧ , ସାନପୋଖରୀ-୧ ଅଞ୍ଚଳର ୧୩ଟି ସ୍ଥାନରେ , ନେସନାଲ ପାର୍କ ୱାଇଲଡ଼ ଲାଇଫ ଅଧୀନ ମହାବୀରସାଲ ଅଞ୍ଚଳର ୫ଟି ସ୍ଥାନରେ, ନଅଣା ସାଉଥ ୱାଇଲଡ଼ ଲାଇଫର ଧୁଣ୍ଡୁବସା ଅଞ୍ଚଳର ୪ଟି ସ୍ଥାନରେ, ପିଠାବଟା ୱାଇଲଡ଼ ସାଉଥ ଲାଇଫ ଅଧୀନ ପଳାଶିବେଡ଼ା, ପିଠାବଟା-୧ ଅଞ୍ଚଳର ୭ଟି ସ୍ଥାନରେ, ପିଠାବଟା ନର୍ଥ ୱାଇଲଡ଼ ଲାଇଫ ଅଧୀନ ବଡ଼ଗାଁ ଅଞ୍ଚଳର ୨ଟି ସ୍ଥାନରେ ଏହିପରି ମୋଟ ୪୭ଟି ସ୍ଥାନରେ ନିଆଁ ଜଳୁଥିବାର ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ତେବେ ଶିମିଳିପାଳରେ ନିଆଁ ଜଳୁଥିବା ବିଷୟରେ ସତ୍ୟାସତ୍ୟ ଜାଣିବା ଏବଂ ନିଆଁକୁ ଲିଭାଇବା ନିମନ୍ତେ କେଉଁ ପଦକ୍ଷେପ ଗ୍ରହଣ କରାଯାଇଛି ସେଥି ନିମନ୍ତେ ଏସଟିଆରର ଶ୍ରୀ ପତିଙ୍କ ସହିତ ଯୋଗାଯୋଗ ନିମନ୍ତେ ଉଦ୍ୟମ କରାଯାଇଥିଲେ ମଧ୍ୟ ସମ୍ଭବ ହୋଇ ପାରିନଥିଲା । ଏବିଷୟରେ ପୂର୍ବତନ ଅବୈତନିକ ବନ୍ୟପ୍ରାଣୀ ତତ୍ୱାବଧାରକ ଭାନୁମିତ୍ର ଆଚାର୍ଯ୍ୟ ନିଜ ପ୍ରତିକ୍ରିୟାରେ ବାରିପଦା ତଥା ମୟୂରଭଞ୍ଜ ଜିଲ୍ଲାରେ ତାପମାତ୍ରା ବୃଦ୍ଧି ଶିମିଳିପାଳ ଅଭୟାରଣ୍ୟରେ ଲାଗିଥିବା ନିଆଁ କାରଣରୁ ବୋଲି ପ୍ରକାଶ କରିବା ସାଙ୍ଗକୁ ସରକାର ଓ ବନ ବିଭାଗ ଶିମିଳିପାଳରେ ଲାଗିଥିବା ନିଆଁ ନିୟନ୍ତ୍ରଣାଧୀନ ବୋଲି ଦାବୀ କରୁଥିବା ବେଳେ ଆଜି ସେଟ ଲାଇଟ ଚିତ୍ରରୁ ଶିମିଳିପାଳ ଅଭୟାରଣ୍ୟରେ ନିଆଁ ଜଳୁଥିବାର ଜଣାପଡ଼ିଛି ବୋଲି କହିଛନ୍ତି ।
ସେହିପରି ଶିମିଳିପାଳ ସାଉଥ ଓ ସାଉଥ କୋର ଅଞ୍ଚଳରେ ୪୭ଟି ପଏଣ୍ଟ୍ରେ ନିଆଁ ଜଳୁଛି । ୫୬ ବର୍ଷ ବୟସରେ ଏପରି ନିଆଁ ଲାଗିବା ପ୍ରଥମ ଘଟଣା । କୋର ଏରିଆ ଭିତରେ କୌଣସି ଗ୍ରାମ ବା ଲୋକ ନ ଥିବା ସମୟରେ ସେଠାରେ ନିଆଁ ଲଗାଉଛି କିଏ । ହୁଏତ ବନ ବିଭାଗ ନିଜେ ଲଗାଉଥିବ ଅଥବା ଶିକାରୀମାନେ ନିଆଁ ଲଗାଉଥିବେ । ତେବେ ଶିକାରୀମାନେ ନିଆଁ ଲଗାଇବା ଶତପ୍ରତିଶତ ସତ୍ୟ । କାରଣ ଶିମିଳିପାଳ ଅଭୟାରଣ୍ୟ ଭିତରକୁ ଦୈନିକ ଶତାଧିକ ଶିକାରୀ ପ୍ରବେଶ କରି ଜୀବଜନ୍ତୁ ଶିକାର କରୁଥିବାର ରିପୋର୍ଟ ରହିଛି । ଏଣୁ ଶିମିଳିପାଳରେ ଲାଗିଥିବା ନିଆଁକୁ ନିୟନ୍ତ୍ରଣ କରିବା ନିମନ୍ତେ କମ୍ୟୁନିଟିକୁ ବିଶ୍ୱାସକୁ ନେଇ ସେମାନଙ୍କ ସହିତ ମିଶି କାର୍ଯ୍ୟ କରିବାକୁ ପରାମର୍ଶ ଦେଇଛନ୍ତି ପୂର୍ବତନ ଅବୈତନିକ ବନ୍ୟପ୍ରାଣୀ ତତ୍ୱାବଧାରକ ଶ୍ରୀ ଆଚାର୍ଯ୍ୟ ।