ଗୋପ/କଣାସ: ପୁରୀ ଜିଲ୍ଲା ଗୋପର ଖଣ୍ଡିଆକୁଦ ଗାଁରେ କୁଶଭଦ୍ରା ନଦୀରେ ୨୫ ଫୁଟର ଘାଇ ସୃଷ୍ଟି ହୋଇଥିବାରୁ ୮ଟି ପଞ୍ଚାୟତର ପ୍ରାୟ ୫୦ ହଜାର ଲୋକ ଜଳବନ୍ଦୀ ଅବସ୍ଥାରେ ଅଛନ୍ତି | ଜଳସମ୍ପଦ ବିଭାଗ ଅବହେଳା ଯୋଗୁ ଘାଇ ହୋଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ଆଉ ସ୍ଥାନୀୟ ଲୋକମାନେ ଜଳସମ୍ପଦ ବିଭାଗର ଅଧିକ୍ଷଣ ଯନ୍ତ୍ରୀ ଓ ସହ ନିର୍ବାହ ଯନ୍ତ୍ରୀଙ୍କୁ ଅଟକ ରଖିଛନ୍ତି | ସ୍ଥିତି ପରଖିବାକୁ ଯାଇଥିବାବେଳେ ବନ୍ୟା ବିପନ୍ନ ଅଟକ ରଖିଛନ୍ତି | ସେହିପରି କଣାସ ବ୍ଲକ୍ ୩ ପଞ୍ଚାୟତର ପାଖାପାଖି ୧୫ରୁ ୧୮ ଗାଁ ଜଳମଗ୍ନ ହୋଇଛି | ୫ଟି ଗାଁରେ ପ୍ରଶାସନ ପକ୍ଷରୁ ଯାତାୟାତ ପାଇଁ ୧୦ଟି ଡଙ୍ଗା ପ୍ରଦାନ କରାଯାଇଥିବାବେଳେ ଦୋକନ୍ଦା, ବଡାସ,ବଳଭଦ୍ରପୁର ପଞ୍ଚାୟତର ସବୁ ଗାଁ ବୁଡି ରହିଛି । ଦୋକନ୍ଦା, ବାଲିପାଟଣା,ବଡାସ,ତରପଡା, ବୈଦ୍ୟନାଥପାଟଣା, କଖାରୁବସ୍ତ, ସବଳଙ୍ଗ ଗାଁ ପାଣିଘେରରେ ରହିଛି। ବିଶେଷ କରି ଏହି ପଞ୍ଚାୟତର ପୂର୍ବରେ ଦୟାନଦୀ, ପଶ୍ଚିମରେ ରାଜୁତି, ଦକ୍ଷିଣରେ ମଲାଗଣୀ ନଦୀ ଫୁଲୁଥିବାବେଳେ ପ୍ରଶାସନ ପକ୍ଷରୁ ରିଲିଫ ସାମଗ୍ରୀ ପହଞ୍ଚିନଥିବାରୁ ଜନ ଅସନ୍ତୋଷ ଦେଖାଦେଇଛି।
Sambad is now on WhatsApp
Join and get latest news updates delivered to you via WhatsApp
ଅନ୍ୟପଟେ ଖୋର୍ଦ୍ଧା-ବଲାଙ୍ଗୀର ଏନଏଚ୍-୫୭ ବାଘମାରୀଠାର ରାସ୍ତା ବୁଡ଼ିଯାଇଥିବାବେଳେ ଏନଏଚ ଉପରେ ଦେଢଫୁଟର ପାଣି ପ୍ରବାହିତ ହେଉଛି । ସେପଟେ ଅଟ୍ରି ଉଷ୍ମପ୍ରସବଣରେ ୫ ଫୁଟର ବନ୍ୟା ଜଳ ପ୍ରବେଶ କରିଛି । ଖୋର୍ଦ୍ଧାର ରାଜୁଆ ନଦୀରେ ଶହେ ଫୁଟର ଘାଇ ସୃଷ୍ଟି ହୋଇଛି । ତିରିମଲ ନିକଟରେ ଏହି ବଡ ଘାଇ ସୃଷ୍ଟି ହୋଇଛି । ଏବେ ଘାଇରେ ପ୍ରବଳ ବେଗରେ ବନ୍ୟା ଜଳ ପ୍ରବାହିତ ହେଉଛି । ଏହି ଘାଇ ଦେଇ ପ୍ରଚୁର ମାତ୍ରାରେ ବନ୍ୟା ଜଳ ପ୍ରବାହିତ ହେଉଥିବାରୁ ରାତିରେ ଖୋର୍ଦ୍ଧା ଜିଲ୍ଲାର ଶରଧାପୁର, ଅଣ୍ଡା, ଅଁଳାଯୋଡି, ଧବଳପୁର ଗାଁ ପ୍ରଭାବିତ ହେବା ସମ୍ଭାବନା ରହିଛି । ସେପଟେ ପ୍ରଶାସନ ପକ୍ଷରୁ ଗାଁ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପ୍ରୟାସ ଆରମ୍ଭ ହୋଇଛି ।