ବିବାହିତାଙ୍କୁ ଟଣାଓଟରା: ୪ ଗିରଫ, ବାଳସୁଧାର ଗୃହ ଗଲେ ନାବାଳକ
ରାଉରକେଲା: ସେକ୍ଟର-୫ ଭିଆଇପି ମାର୍କେଟ ପାର୍କିଂ ପରିସରରେ ଜଣେ ବିବାହିତା ମହିଳାଙ୍କୁ ଟଣାଓଟରା ଓ ଅସଦାଚରଣ କରିଥିବା ଅଭିଯୋଗ ହୋଇଛି। ଏନେଇ ସେକ୍ଟର-୭ ପୁଲିସ ୪ ଜଣ ଅଭିଯୁକ୍ତଙ୍କୁ ଗିରଫକରି କୋର୍ଟଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ସେକ୍ଟର-୧୫ ମଲ୍ଲିକ ବସ୍ତିର ଶେଖ୍ କାସିମୁଦ୍ଦିନ(୨୨), ଶେଖ୍ ମୟୁଲ(୧୯), ହମିରପୁରର ଅଭିଶେକ ରଜକ(୨୦) ଓ ଗଞ୍ଜାମପଲ୍ଲୀ ବସ୍ତିର ଶହଦେବ ରାଉତ(୪୦)। ଏହାସହ ଅନ୍ୟତମ ନାବାଳକ(୧୬)ଙ୍କୁ ବାଳସୁଧାର ଗୃହକୁ ପଠାଯାଇଛି।
Sambad is now on WhatsApp
Join and get latest news updates delivered to you via WhatsApp
ମହିଳାଙ୍କ ଅଭିଯୋଗ ଅନୁସାରେ, ଗତ ୨୧ ତାରିଖ ସଂଧ୍ୟା ପ୍ରାୟ ସାଢ଼େ ୬ଟା। ମହିଳା ଜଣକ ଭିଆଇପି ମାର୍କେଟ ପାର୍କିଂ ଅଞ୍ଚଳରେ ତାଙ୍କର ନାବାଳକ ବନ୍ଧୁ(୧୬) ଓ ଆଉ ଜଣେ ବନ୍ଧୁଙ୍କ ସହ ଥିଲେ। ଏତିକିବେଳେ ଅନ୍ୟ ୪ ଜଣ ଯୁବକ ସେଠାରେ ପହଞ୍ଚି ତାଙ୍କର ହାତକୁ ଟାଣିନେବା ସହ ସମ୍ବେଦନଶୀଳ ଅଙ୍ଗରେ ସ୍ପର୍ଶ କରିଥିଲେ। ଉକ୍ତ ୪ ଅଭିଯୁକ୍ତଙ୍କ ମଧ୍ୟରେ ଜଣେ ନିଜକୁ ପୁଲିସ୍ ପରିଚୟ ଦେଇ ସେକ୍ଟର-୧୯ ଥାନା ପାଖକୁ ଜୋର୍ଜବରଦସ୍ତ ନେଇଯାଇଥିଲେ। ସେଠାରେ ମହିଳାଙ୍କ ମୋବାଇଲ ବି ଛଡ଼ାଇନେଇଥିଲେ। ତେବେ ମୋବାଇଲ ନ ଦେଲେ ଆତ୍ମହତ୍ୟା ଧମକ ଦେବାରୁ ଅଭିଯୁକ୍ତମାନେ ତାଙ୍କୁ ଛାଡ଼ି ଘଟଣାସ୍ଥଳରୁ ଫେରାର ହୋଇଯାଇଥିଲେ। ଉକ୍ତଦିନ ମହିଳା ସେକ୍ଟର-୧୯ ଥାନାରେ ଏତଲା ଦେଇଥିଲେ ମଧ୍ୟ ପୁଲିସ ଘଟଣାସ୍ଥଳ ନିଜ ପରିସୀମାରେ ଆସୁନଥିବା କହି ଏତଲା ରଖିବାକୁ ମନା କରିଦେଇଥିଲା। ପରେ ମହିଳା ସେକ୍ଟର-୭ ଥାନାରେ ଏତଲା ଦେଇଥିଲେ।