ଗାଧୋଇବାକୁ ଯାଇ କୁଆଖାଇ ନଦୀରେ ବୁଡ଼ିଗଲେ ୪ ଛାତ୍ର; ଜଣେ ମୃତ, ୩ ଉଦ୍ଧାର
ବାଲିଅନ୍ତା: ଆଜି ପୂର୍ବାହ୍ନ ୧୧ଟା ସମୟରେ ସହିଦନଗର ଥାନା ଅଧୀନ ବାସୁଆଘାଇ ପାର୍ଶ୍ବସ୍ଥିତ କୁଆଖାଇ ନଦୀରେ ଗାଧୋଇବା ବେଳେ ପାଣିରେ ବୁଡ଼ିଯାଇ ଜଣେ ୧୩ ବର୍ଷର ନାବାଳକର ମୃତ୍ୟୁ ଘଟିଛି । ସୌଭାଗ୍ୟବଶତଃ ତାଙ୍କ ସହ ଆସିଥିବା ଅନ୍ୟ ୩ ସାଙ୍ଗ ଅଳ୍ପକେ ରକ୍ଷା ପାଇଯାଇଛନ୍ତି । ମୃତ ନାବାଳକ ଜଣକ ହେଲେ ଲକ୍ଷ୍ମୀସାଗର ଥାନା ଅଧୀନ ବୁଦ୍ଧେଶ୍ବରୀ କଲୋନି ମଣ୍ଡପ ସାହି ଅଞ୍ଚଳର ମହେଶ୍ବର ପୃଷ୍ଟି । ମହେଶ୍ବର ଲକ୍ଷ୍ମୀସାଗରର ଅନ୍ୟ ଜଣେ ସାଙ୍ଗ ଓ ବଡ଼ଗଡ଼ର ଆଉ ୨ ଜଣ ସାଙ୍ଗଙ୍କ ସହ କୁଆଖାଇକୁ ଗାଧୋଇବାକୁ ଆସିଥିଲେ । ଜଣେ
Sambad is now on WhatsApp
Join and get latest news updates delivered to you via WhatsApp
ପ୍ରତ୍ୟକ୍ଷଦର୍ଶୀଙ୍କ ସୂଚନାନୁସାରେ ମହେଶ୍ବର ପାଣିରେ ବୁଡ଼ିଯାଉଥିବା ଦେଖି ପାଖରେ ଗାଧୋଉଥିବା ଅନ୍ୟ ସାଙ୍ଗମାନେ ପ୍ରଥମେ ତାଙ୍କୁ ଉଦ୍ଧାର କରିବାକୁ ଚେଷ୍ଟା କରିଥିଲେ । ପାଣିରେ ବୁଡ଼ିଯାଉଥିବା ମହେଶ୍ବରଙ୍କ ହାତ ଧରି ଜଣେ ସାଙ୍ଗ ଟାଣି ଆଣିବାକୁ ହାତ ବଢ଼ାଇଥିଲେ । ହେଲେ ପାଣିରେ ବୁଡ଼ିଯିବା ପୂର୍ବରୁ ବର୍ତ୍ତି ଯାଇଥିଲେ । ଏହାପରେ ୩ ଜଣଯାକ ପାଣି ଉପରକୁ ଆସି ବଞ୍ଚାଅ ବଞ୍ଚାଅ କହି ଚିତ୍କାର କରିଥିଲେ । ସେମାନଙ୍କ ପାଟିଶୁଣି ଆଖପାଖରେ ଥିବା ଲୋକମାନେ ସେଠାରେ ପହଞ୍ଚି ବହୁ ଖୋଜାଖୋଜି କରିଥିଲେ । ପରେ ପରେ ବାଲିଅନ୍ତା ଓ ବାଲିପାଟଣା ଅଗ୍ନିଶମ ସେବା କେନ୍ଦ୍ର କର୍ମଚାରୀ ତୁରନ୍ତ ଘଟଣାସ୍ଥଳରେ ପହଞ୍ଚି ଖୋଜାଖୋଜି କରିଥିଲେ । ଏହାର କିଛି ସମୟ ପରେ ଓଡ୍ରାଫ ଟିମ ମଧ୍ୟ ପହଞ୍ଚି ସେମାନଙ୍କ ସହ ମିଶି ଖୋଜାଖୋଜି କରିଥିଲେ । ଦୀର୍ଘ ଦୁଇଘଣ୍ଟା କାଳ ଖୋଜାଖୋଜି କରିବା ପରେ ଓଡ୍ରାଫ ଟିମର ଜଣେ କର୍ମଚାରୀ ମହେଶ୍ବରଙ୍କୁ ଉଦ୍ଧାର କରିବାରେ ସଫଳ ହୋଇଥିଲେ । ହେଲେ ସେତେବେଳକୁ ତାଙ୍କର ମୃତ୍ୟୁ ହୋଇଯାଇଥିଲା । ଅଗ୍ନିଶମ ସେବା କେନ୍ଦ୍ର କର୍ମଚାରୀ ଗାଡ଼ିରେ କ୍ୟାପିଟାଲ ହସ୍ପିଟାଲକୁ ନେଇଯାଇଥିଲେ । ସହିଦନଗର ଥାନା ପୁଲିସ ହସ୍ପିଟାଲରେ ପହଞ୍ଚି ଶବ ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିଛି ।
ମିଳିଥିବା ସୂଚନା ଅନୁସାରେ ମହେଶ୍ବର ଲକ୍ଷ୍ମୀସାଗର ସରକାରୀ ସ୍କୁଲରେ ୭ମଶ୍ରେଣୀର ପାଠ ପଢ଼ନ୍ତି । ଆଜି ସେ ବଡ଼ଗଡ଼ ଅଞ୍ଚଳର ଅନ୍ୟ ୩ ଜଣ ସାଙ୍ଗଙ୍କ ସହ ଫୋନରେ କଥା ହୋଇ କୁଆଖାଇ ନଦୀକୁ ଗାଧୋଇବାକୁ ଯୋଜନା କରି ୩ଟି ସାଇକେଲରେ ଆସିଥିଲେ । କୂଳରେ ସାଇକେଲ ଓ ଚପଲ ରଖି ଗାଧୋଇଥିଲେ । ହେଲେ ବାଲିତଡ଼ା ହେବା ଦ୍ବାରା ନଦୀର ପାଣିର ଗଭୀରତା ଜାଣିପାରି ନଥିଲେ । ଆଉ ଗଭୀର ପାଣିରେ ବୁଡ଼ିଯାଇ ତାଙ୍କର ମୃତ୍ୟୁ ହୋଇଯାଇଥିଲା । ଘଟଣାସ୍ଥଳଠାରୁ ମାତ୍ର କିଛି ଦୂରରେ ଦିନ ୧ଟା ସମୟରେ ଉଦ୍ଧାରକାଳରୀ ଦଳ ତାଙ୍କୁ ଖୋଜି ପାଇବାରେ ସଫଳ ହୋଇଥିଲେ ।