ରକ୍ତ ଭଣ୍ଡାରରେ ରକ୍ତ ନାହିଁ, ରୋଗୀଙ୍କୁ ରକ୍ତ ଦେବା ପାଇଁ ୪ ଜଣ ସ୍ବେଚ୍ଛାସେବୀ ୧୨୦ କିମି ଯାତ୍ରା କରି ନବରଙ୍ଗପୁରରେ ପହଞ୍ଚିଲେ
ଚନ୍ଦାହାଣ୍ଡି: ମାନବ ସେବା ହିଁ ମାଧବ ସେବା । ନବରଙ୍ଗପୁର ଜିଲ୍ଲା ରକ୍ତ ଭଣ୍ଡାରରେ ରକ୍ତ ନାହିଁ। ଚନ୍ଦାହାଣ୍ଡି ବ୍ଲକ ଗମ୍ଭାରୀଗୁଡା ଗାଁର ରମେଶ ଚନ୍ଦ୍ର ସାହୁ ବହୁ ଦିନ ଧରି ଅସୁସ୍ଥ ଥିବାରୁ ଗତ ସୋମବାର ଦିନରୁ ନବରଙ୍ଗପୁର ଜିଲ୍ଲା ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଥିଲେ । ବୁଧବାର ଦିନ ତାଙ୍କୁ ଚିକିତ୍ସା କରୁଥିବା ଡାକ୍ତର ରମେଶଙ୍କୁ ନିହାତି ରକ୍ତ ଆବଶ୍ୟକ ବୋଲି ସୂଚନା ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
ରକ୍ତ ଭଣ୍ଡାର ରେ ଏ-ପଜିଟିଭ୍ ରକ୍ତ ନଥିଲା । ଏପଟେ ତାଲାବନ୍ଦ ଥିବା ଯୋଗୁଁ ରକ୍ତ ମିଳିବା କଷ୍ଟସାଧ୍ୟ ହୋଇଥିଲା । ଏହା ଶୁଣି ଚନ୍ଦାହାଣ୍ଡି ବ୍ଲକ ଗମ୍ଭାରୀଗୁଡା ସରସ୍ବତୀ କଳାକୁଞ୍ଜର ଯୁବ ଗୋଷ୍ଠୀ ସାହାଯ୍ୟ କରିବା ପାଇଁ ଆଗେଇ ଆସିଥିଲେ । ତାଲାବନ୍ଦ ଥିବା ଯୋଗୁଁ ସୁଦୁର ଚନ୍ଦାହାଣ୍ଡିରୁ ନବରଙ୍ଗପୁର ପ୍ରାୟ ୧୨୦ କିମି ଯିବା ସହଜ ନଥିଲା ।
ଅନୁଷ୍ଠାନର କେତେକ ସକ୍ରିୟ ସଦସ୍ୟ ୧୨୦ କିମି ରାସ୍ତା ଯିବା ପାଇଁ ଅର୍ଥ ସଂଗ୍ରହ କରିବା ସହ କିପରି ନବରଙ୍ଗପୁର ଅଭିମୁଖେ ଯାତ୍ରା କରିବେ ଆଲୋଚନା କରିଥିଲେ । ଚନ୍ଦାହାଣ୍ଡି ଥାନା ଅଧିକାରୀଙ୍କଠୁ ଅନୁମତି ପତ୍ର ନେଇ ବାହାରିଥିଲେ ୪ ଜଣ ଯୁବକ ସୌରୀ ରଂଜନ ସାହୁ, ଗୁପ୍ତେଶ୍ୱର ସାହୁ, ସତ୍ୟ ନାରାୟଣ ସାହୁ ଓ ଝୁମୁକଲାଲ ସାହୁ । ଜିଲ୍ଲା ସ୍ୱାସ୍ଥ୍ୟ କେନ୍ଦ୍ର ପହଞ୍ଚି ଝୁମୁକଲାଲ ସାହୁ ଓ ସତ୍ୟ ନାରାୟଣ ସାହୁ ରକ୍ତ ଦାନ କରିଥିଲେ ।ଯୁବଗୋଷ୍ଠୀଙ୍କ ଏହି ଉଦ୍ୟମକୁ ବିଭିନ୍ନ ମହଲରେ ପ୍ରଶଂସା କରାଯାଉଛି ।