ବ୍ରହ୍ମପୁର: ବେକାର ଯୁବକଯୁବତୀଙ୍କୁ ଚାକିରି ନାଁରେ ଠକେଇ । ଏହିପରି ଲକ୍ଷାଧିକ ଟଙ୍କା ଠକି ନେଇଥିବା ଏକ ଗ୍ୟାଙ୍ଗକୁ ଧରିଛି ବ୍ରହ୍ମପୁର ପୁଲିସ । ଗିରଫ ଅଭିଯୁକ୍ତ ଦୁଇ ଜଣ ହେଲେ ଯାଜପୁର ଜିଲ୍ଲା ମଙ୍ଗଳପୁର ଅଂଚଳର ରବିନ୍ଦ୍ର ବେହେରା ଓ ଗଞ୍ଜାମ ଜିଲ୍ଲା ଦିଗପହଣ୍ଡି ଅଂଚଳର ଅରୁଣ ବେହେରା । ଏମାନଙ୍କ ବ୍ୟାଙ୍କ ଖାତା, ଏଟିଏମ କାର୍ଡ, ଜାଲ ପରିଚୟପତ୍ର, ମୋବାଇଲ ଆଦି ସାମଗ୍ରୀ ପୁଲିସ ଜବତ କରିଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ଗତ ୩୦ ତାରିଖରେ ବ୍ରହ୍ମପୁର ଗୋଇଲୁଣ୍ଡି ଅଂଚଳର ଦୁଇ ଜଣ ଯୁବକ ଠକେଇର ଶିକାର ହୋଇଥିବା ନେଇ ବୈଦ୍ୟନାଥପୁର ଥାନାରେ ଅଭିଯୋଗ କରିଥିଲେ । ଏହି ଘଟଣାର ତଦନ୍ତ କରି ଅଭିଯୁକ୍ତଙ୍କୁ ଗିରଫ କରିବାକୁ ପୁଲିସ ସଫଳ ହୋଇଛି ।
ଅଭିଯୁକ୍ତମାନେ ଗଞ୍ଜାମ ଜିଲ୍ଲା ସମେତ ଅନୁଗୁଳ, ପୁରୀ, ତାଳଚେର, ଯାଜପୁର ଅଂଚଳରେ ବେକାର ପିଲାଙ୍କୁ ଫସାଇ ଚାକିରି ଦେବା ନାଁରେ ଲକ୍ଷ ଲକ୍ଷ ଟଙ୍କା ଠକି ନେଇଥିବା ପୁଲିସ ଜାଣିବାକୁ ପାଇଛି । ଏହି ଠକମାନେ କନିଷ୍ଠ କିରାଣୀ, ଆଂଚଳିକ ଶିକ୍ଷା ପ୍ରତିଷ୍ଠାନରେ ନିଯୁକ୍ତି ନାଁରେ ଏହି ଠକେଇ କରୁଥିଲେ । ତେବେ ଏହି ଗ୍ୟାଙ୍ଗର ଚେର କେତେ ଦୂର ଯାଏଁ ଲମ୍ବିଛି ସେ ନେଇ ପୁଲିସ ତଦନ୍ତ କରୁଛି ।