ବ୍ରହ୍ମପୁର: ସାମାନ୍ୟ ବାଇକ୍ ପାର୍କିଂକୁ ନେଇ ଯୁବକଙ୍କୁ ସଂଘବଦ୍ଧ ଆକ୍ରମଣ ଘଟଣା ସାମ୍ନାକୁ ଆସିଛି । ସିସିଟିଭିରେ ଏହି ଘଟଣା କଏଦ ହୋଇଛି। ଜଣେ ଯୁବକଙ୍କୁ ତଳେ ପକାଇ ୪/୫ ଜଣ ଯୁବକ ସଂଘବଦ୍ଧ ଭାବେ ଅତ୍ୟନ୍ତ ଅମାନୁଷିକ ଭାବେ ଆକ୍ରମଣ କରିବା ଦେଖିବାକୁ ମିଳିଛି। ଉକ୍ତ ଯୁବକଙ୍କୁ କ୍ରିକେଟ ବ୍ୟାଟରେ ପିଟି ଚାଲିଛନ୍ତି ଆକ୍ରମଣକାରୀ ଯୁବକ । ଏଥିସହ ଯୁବକଙ୍କୁ ଆକ୍ରମଣକାରୀଙ୍କ କବଳରୁ ବଞ୍ଚାଇବାକୁ ଉଦ୍ୟମ କରୁଥିବା ତାଙ୍କ ମା’ଙ୍କୁ ମଧ୍ୟ ଆକ୍ରମଣକାରୀ ଖଣ୍ଡାରେ ହାଣି ଦେଇଥିବା ଦେଖାଯାଉଛି।
Sambad is now on WhatsApp
Join and get latest news updates delivered to you via WhatsApp
ଗଞ୍ଜାମ ଜିଲ୍ଲା ବୈଦ୍ୟନାଥପୁର ଥାନା ଅଂଚଳରେ ହୋଇଥିବା ଏହି ମରଣାନ୍ତକ ଆକ୍ରମଣର ଭିଜୁଆଲ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଭିଜୁଆଲରେ ଦେଖାଯାଉଛି ଜଣେ ମଣିଷ କିଭଳି ନୃଶଂସ ହୋଇପାରେ। ଏପରିକି ଯୁବକଙ୍କ ମା’ଙ୍କୁ ମଧ୍ୟ ଖଣ୍ଡାରେ ଆକ୍ରମଣ କରିବାକୁ ପଛାଇ ନାହାନ୍ତି ଆକ୍ରମଣକାରୀ। ଏହି ଘଟଣାରେ ପାଖରେ ଥିବା ଲୋକମାନେ ଏଭଳି ଭୟଭୀତ ହୋଇଯାଇଥିଲେ କି ସେମାନେ ପିଟୁଥିବା ଯୁବକଙ୍କୁ ଅଟକାଇ ନ ଥିଲେ ।
ସୂଚନା ଅନୁଯାୟୀ ଗତ ୨୮ ତାରିଖରେ ଏହି ଘଟଣା ଘଟିଥିଲା । ଏଥିରେ ମରଣାନ୍ତକ ଆକ୍ରମଣର ଶିକାର ଯୁବକ ଓ ତାଙ୍କ ମା ଗୁରୁତର ଆହତ ହୋଇଥିଲେ । ପୁଲିସ ନିକଟରେ ହୋଇଥିବା ଅଭିଯୋଗ ଅନୁଯାୟୀ ସ୍ଥାନୀୟ କଲ୍ୟାଣମଣ୍ଡପରେ ଏକ ଭୋଜି ଚାଲିଥିବାବେଳେ ପ୍ରଥମେ ବାଇକ ରଖିଥିଲେ ସୁନୀଲ ମହାରଣା । ଏହି ସମୟରେ ରାଜା ନାମକ ଯୁବକ ଆସି ତାଙ୍କୁ ଗାଳିଗୁଲଜ କରିବା ସହ ଆକ୍ରମଣ କରିଥିଲେ । ଏହାର ଜବାବରେ ସୁନୀଲ ଓ ତାଙ୍କ ସାଙ୍ଗମାନେ ମିଶି ରାଜାଙ୍କୁ ମରଣାନ୍ତକ ଆକ୍ରମଣ କରିଥିଲେ । ଯାହାର ଭିଜୁଆଲ ସିସିଟିଭିରେ କଏଦ ହୋଇଛି । ଏହି ମାମଲାରେ ପୁଲିସ ଉଭୟ ପକ୍ଷର ଅଭିଯୁକ୍ତଙ୍କୁ ଗିରଫ କରିଛି ।