ଟାଟା ମୋଟର୍ସରେ ଚାକିରି ନାଁରେ ଠକେଇ ମାମଲା : ବିଧାୟକ ପ୍ରଦୀପ, ଅଭୟକାନ୍ତଙ୍କ ଜାମିନ୍‌ ଆବେଦନ ଖାରଜ

ବ୍ରହ୍ମପୁର : ଟାଟା ମୋଟର୍ସରେ ଚାକିରି ଦେବା ନାଁରେ ଟଙ୍କା ଠକେଇ ଘଟଣାରେ ଗିରଫ ହୋଇଥିବା ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ଓ ଆଇଏଫ୍‌ଏସ୍‌ ଅଧିକାରୀ ଅଭୟକାନ୍ତ ପାଠକଙ୍କ ଜାମିନ୍‌ ଖାରଜ ହୋଇଛି। ଗଞ୍ଜାମ ଜିଲ୍ଲା ଦୌରାଜଜ୍‌ ରାମଶଙ୍କର ହୋତା ବିଧାୟକ ପ୍ରଦୀପଙ୍କ ନାମରେ ଥିବା ୩ଟି ମାମଲା ଓ ଅଭୟକାନ୍ତଙ୍କ ବିରୋଧ‌ରେ ରୁଜୁ ହୋଇଥିବା ଗୋଟିଏ ମାମଲାର ଜାମିନ୍‌ ଆବେଦନ ଖାରଜ କରିଛନ୍ତି। ଜାମିନ୍‌ ପାଇଁ ମାନ୍ୟବର ହାଇକୋର୍ଟରେ ଆବେଦନ କରାଯିବ ବୋଲି ତାଙ୍କର ଓକିଲ ସୂଚନା ଦେଇଛନ୍ତି।

ଟାଟା ମୋଟର୍ସରେ ଚାକିରି ନାଁରେ ଟଙ୍କା ଠକେଇ ନେଇ ବିଧାୟକ ପ୍ରଦୀପଙ୍କ ନାମରେ କଟକ କ୍ରାଇମ୍‌ବ୍ରାଞ୍ଚ ଥାନାରେ ଅଭିଯୋଗ ହୋଇଥିଲା। ପ୍ରାୟ ୪୭ଲକ୍ଷ ଟଙ୍କା ଠକେଇ କରିବା ଅଭିଯୋଗରେ ତାଙ୍କୁ କ୍ରାଇମ୍‌ବ୍ରାଞ୍ଚ ଗିରଫ କରିଥିଲା। ଗତ ଡିସେମ୍ବର ମାସରେ ଗୋଳନ୍ଥରା ଥାନାରେ ଦୁଇଟି ମାମଲା ରୁଜୁ ହୋଇଥିଲା। ସେହିପରି ଜାନୁଆରି ମାସରେ ମଧ୍ୟ ପୁଣି ଏକ ଠକେଇ ମାମଲା ରୁଜୁ ହୋଇଥିଲା। ଏହି ୩ଟି ମାମଲ‌ାରେ ମୋଟ ୧୪ଲକ୍ଷ ଟଙ୍କା ଠକେଇ ନେଇ ଅଭିଯୋଗକାରୀ ମାମଲା ରୁଜୁ କରିଥିଲେ। ଏହି ମାମଲାରେ ଗୋଳନ୍ଥରା ଥାନା ପୁଲିସ ବିଧାୟକ ପ୍ରଦୀପଙ୍କୁ ଭୁବନେଶ୍ବର ଝାରପଡ଼ା ଜେଲ୍‌ରୁ ରିମାଣ୍ଡରେ ଆଣି ବ୍ରହ୍ମପୁର ଏସ୍‌ଡିଜେଏମ୍‌ଙ୍କ କୋର୍ଟରେ ହାଜର କରି ଜଡ଼ିତ କରିଥିଲା। ପରେ ପାଠକ ବାପ-ପୁଅଙ୍କୁ ମଧ୍ୟ ଜଡ଼ିତ କରାଯାଇଥିଲା। ଆଇଏଫ୍‌ଏସ୍‌ ଅଭୟକାନ୍ତଙ୍କ ନାମରେ ଗୋଟିଏ ମାମଲା ଯୋଡ଼ା ଯାଇଥିବା ବେଳେ ପୁଅ ଆକାଶ ପାଠକଙ୍କ ନାମରେ ଦୁଇଟି ମାମଲା ଯୋଡ଼ିଥିଲା ପୁଲିସ। ଏହି ମାମଲାରେ ଜାମିନ୍‌ ପାଇଁ ବିଧାୟକ ପ୍ରଦୀପ ଓ ଅଭୟକାନ୍ତଙ୍କ ଓକିଲ ଜିଲ୍ଲାଜଜ୍‌‌ କୋର୍ଟରେ ଆବେଦନ କରିଥିଲେ। ଆଜି ଶୁଣାଣି ପାଇଁ ଦିନ ଧାର୍ଯ୍ୟ କରାଯାଇଥିଲା। ଜିଲ୍ଲାଜଜ୍‌ ସରକାରୀ ଓକିଲ ଓ ପ୍ରତିପକ୍ଷ ଓକିଲଙ୍କ ଯୁକ୍ତି ଶୁଣିବା ପରେ ଜାମିନ୍‌ ଖାରଜ୍‌ କରିଥିଲେ। ସରକାରଙ୍କ ତରଫରୁ କ୍ୟାଡର୍‌ ପିପି ତ୍ରିଲୋଚନ ପରିଡ଼ା ଏବଂ ବିଧାୟକ ପ୍ରଦୀପ ଓ ପାଠକଙ୍କ ତରଫରୁ ବରିଷ୍ଠ ଆଇନଜୀବୀ ପୀତାମ୍ବର ଆଚାର୍ଯ୍ୟ ଭିସି ଜରିଆରେ ମକଦ୍ଦମା ପରିଚାଳନା କରିଥିଲେ।

ସମ୍ବନ୍ଧିତ ଖବର